Mim Kût chungchang

Mizote'na kût kan neih pathum Pawl Kût, Chapchar Kût leh Mim Kût te hi state sorkar hmalaknain mumal takin vawiinah chuan kan lo hmang kim thei ta vek mai a, thil lawmawm tak a ni. Kum 1894-a Kristianna a lo luh aṭang khan heng kûtte hi a ral ve tial tial a, a chhan pawh Mizo sakhaw hlui nena inzawm thilte a awm vang a ni ber awm e. Kum 1952-a district council-a siam a lo nih khan heng kût pathum hman/lawm nan hian chawlhte hial siamin, union territory kan nih (1972) thleng khan kum tin Chapchar Kût tan ni thum, Pawl Kût tan ni hnih leh Mîm Kût tan ni khatte sorkarin chawlh a puang. Chuti chungin pui tham deuh chuan Chapchar Kût tih loh hi chu 2017 thleng khan sorkar phei chuan a huaihawt ngai lem lo. Pawl Kût hi 2018 aṭang khan Social Welfare Deptt.-in a huaihawt ṭan a, kum tin hman a lo ni ta a. Mim Kût hi nikum 2023 aṭang khan hmang ṭanin, tun hi state sorkar hmalakna chuan a vawi hnihna tur a nih chu.

Inhnialna leh thlir dan inang lo tam tak karah Mizote hnam nun zia leh hnam ro chhawm chhohna pawimawh tak a nih avang te, hnam zia leh nun sawhnghehna pawimawh tak a nih avang te, hmasawnna kan sawi apianga ngaihtuah tel ngai ‘ze nghet’ leh ‘tlo’ kan insiamna kawngah heng hnam ro thil chawi nun leh chawi larte hi sorkar chuan ṭha a ti niin a lang. Hnam dang aia kan danglamna leh ngaihnawmna pholanna ṭha tak chu kan kûtte leh kan hman dante hi a ni ngei ang. Tuna heng kût kan hman dan leh ruahmanna kan siam dan en hian sorkar mi pawimawhte mai bakah, kohhran lam pawl aiawh leh tlawmngai pawlte kan inlungrual tlan theih dan berin kan hmang niin a lang.

Mizote hi hun rei lo te chhunga kan lo Kristian tak deuh vek hnuah khan heng kan kût leh sakhaw thar chu inhmeh loa hriatnate chu a han awm ngei a; mahse, kan fing ta telh telh a, kalchar (culture) milin sakhuana pawh a kalpui theih tih kan hrethiam ta zel niin a lang. Chu mai bakah, hnam kalchar siamtu mihring nun peng hrang hranga kan thil tih phungte hi a danglam ve zel a, sakhuana avang chauh lo pawh hian hnam tih phung leh ziarângte chu a inher ve reng a ni.

Kûtah pawh Mîm Kût hi a danglam bik deuh a, a chhan chu mitthite pual a ni tlat. Mitthi sawngbawl dan leh sûn/vûi bakah, a huhoa kût anga hman hi hnam tin hian tihphungah kan nei awm e. Kan tih dan leh tih chhanah inang lo leh inang pawh a awm nuk ang. Kristian zingah pawh Catholic kohhran leh Eastern Orthodox kohhrante chuan ‘All saints Day’ an tih mai ang hi kum 1600 chuang kût angin an lo hmang tawh a. Chinese-te hian ‘Qing Ming Festival’ (thlan phiahfai ni tih bawk) hi kum 2500 chuang an lo hmang tawh bawk. Mexican-ho ve thung chuan hman lai Aztec hun laia an rin dan leh tih dan ṭhenkhat la chhawm chungin 'Mitthite Pual Ni' (Day of the Dead) chu Kristianna an pawm hnuah pawh an seng tel nia ngaih a ni (source History channel). TV leh internet lamahte kan thlir tam pawl USA leh Europe thlang lam ramahte Halloween/All Hallows' Eve/All Saints' Eve te hi Kristiante hun serh ni chung siin, kût anga an hman dan khu han thlir kualin Mizote chuan ‘A va Kristian lo’ tih tur a tam. Eng pawh ni se, hmana an hman chhan ber leh tih dan emaw ang khan vawiinah chuan tih ngawt theih a ni tawh lo.

Mizo chang pawh kan ni lo, India rama hnam hnufual leh tlem zawkte tan chuan hnam anga kan dinchhuah nan leh hmasawn nan heng hnam thil, kan nihna leh ze ṭha lam zawnga humhalh leh chawi lar a, kan irâwm kûtte phei hi chu zin mite hip zawnga sumdawnna nen kan thlun zawm thuai a ṭul. Kan hman nasat ber Chapchar Kûtah pawh ei leh bar lama hlawk phahna tur ang hian kan la kal thui lo hle. Thuneitu lamte'n heng chungchangah hian hma an la turah beisei phawt ila.

Vawiin Mîm Kût thu-ah erawh chuan kal tate hriat reng nan thil ṭha tih leh rilru lam siam thar nan hmang ila. Kan hnam ro thilte tinung bawk, tih phung ṭha zawk neih thar bawk chu a hnam ang pawhin hmasawnna duhawm tak a ni ang. Kan theihna zâwnah ṭheuh mi dang tana malsawmna nih ni-ah i hmang ang u. Mahni kalchar hmuhsit emaw ngaihnep emaw, hnam dang kalcharte ngaihsan bik viau emaw chu kalchar nei mumal lo nen thuhmun reng kan ni, nihnaa chiang lo kan ni reng mai dawn tihna! Nihnaa chiang lo chu nih tur ang nih phak lohna tih a nih kha. Tunah chuan kan kalchar chhunga kan hnam tih dante thuam mawi, chawi san, a nihna ze pawimawh humhim tel sia tihphuisuite kan thiam chho ta deuh e.

Kan kût neih mumal pathumte zingah Chapchar Kût hi chu khèl loin hun rei fè ata tawh kum tin kan hmang a, Pawl Kût hi kum 2018 aṭang khan kan la hmang ziah bawk. Kan hmang kan han tih hian a lawmna turin ruahmanna kan siam a, pisa leh sikul kan khar a, punkhawmna leh intihhlimna hun kan hmang a ni deuh ber. Sorkarin awm ni khama lawm a ti lo a, a ṭul ber lo bawk ang. Kan intodelh loh ngaihtuahin chawlh apui hi kan ngah a, autonomous district council-ahte sawn Mîm Kût pawh hi nikum lawk aṭanga tharthawh leh a ni a, awm ni khama hun hman tih lam sawi a ni lo.

Kan hman dan bawk chu sawi leh ta ila, Sap ṭawng takin ‘government-led’ (sorkarin a kalpui) a la ni. Chumi awmzia chu sorkar lam department-te’n mawh an la a, sum pawh sengin sorkar ruahman sa mila siam ṭhin a ni. Aizawlah leh khawpui deuhah a lawmna hun hi sorkar department-te hmalaknain kalpui a la ni tlangpui. Kristian kan nih hnua kan kûtpui neih thar tak Krismas-te kum thar tihte erawh chu kan kohhrante'n hma an la a, khawtlang/kohhran bilin kan hmang diah diah. Heng hun atan hian sumte pawh kan thawh khawm a, a ṭhen phei chuan kum tir aṭangin thla tin kohhran/pawlah kan chhung lut a, target-te pawh kan nei hial ṭhin. Mahse, kan hnam bil kûtte chungthuah erawh hi chuan sorkar hmalakna va chhim ve chauh ang a ni.

Duhthu han sam ta ila, veng tin khaw tinah hian a huhoin emaw chhungkua/ṭhenrualte pawhin thawh khawm leh mahni insengso zawngin hmang ta zawk ila a ṭha ang em? Pawl Kût leh Chapchar Kût hi chu ni danga khelah dah ta ila. Mîm Kût hi muhil tate pual a nih ang hian a ṭha zawngin lungphun nia tual mei khûka faklâm kan thai a, hrawk kan hrâi a, thlarau lam thuchah kan infah bawk anga hman a ṭhat a rinawm.

Lusûn tawh vek leh la hmabak vek kan ni a, kal tawhte puala hun ṭha tak, hunbi neia hman hi a lo pawimawh khawp mai. An chanchinte kan han chhiar a, kan han sawi thar a, anmahnia zir tur te, ro chi hrang hrang min hnutchhiah han hriat thar leh a, anmahni avanga vawiin thleng kan nihzia kan lo inhrilh chhawnte hian a dam lai ngeite pawh kan lo inchawimawi a lo ni a, inhriat reng dan tur ṭha kan intuh a lo ni.

Sawi ta zel ila, min hringa min thlahtu te, min lo châwma min chawi liantute chawimawi te, anmahnia zir tur awm zir a, kan tu leh fa leh chhuan tharte hnena mumal taka lo inhlan chhawn zel hi a pawimawh khawp mai. Mi dang chawimawi nachang hriat hi mihring sum hlute zinga mi a ni ngei ang. Chhungkua kan inenkawlna kawngah pawh a ni zel. Awm tawh lote chawimawina sang pek leh ngaihsanna thu ziah leh sawite hi kan pi pute nun enin a Zo zia hle.

Tunlaiah dam lai leh hmaichhana infakte kan sawi mawi, ṭhatna a nei reng mai. Thlarau ramah lawmna hi a awm a nih chuan an thih hnua kan fak leh chawimawite hi an lawm viauin a rinawm. Thihna chu nunna a luhna kawngka tih thu vuantute tan chuan, mi tam tak chu ‘Kan ziak mi lo’ tih chhuanlamin kan chanchin ziah sa kan nei lo a, thil tih awm taka ngai kan tlem hle. Kan thih hun tur kan hre lawk vek thei bawk si lo, chawpchilh zetin darkar 3-5 chhung velin mitthi chanchin tlangpui chhiar tlak ve deuh vai phek khat tal ziah fo kan la ngai a nih hi.

‘Mahni infak leh sakhi ngalah engmah a bet lo’ tih lam zawnga ngaihtuah loin, kan chanchin a chhia a ṭhate kan tu leh fate inzir nan ziak emaw, chhinchhiah emaw dan kawng a tam tawh. Pa pakhat, kum tam ve deuh tawh chu a chanchin ziak turin a ṭhianpain a ràwn a, ‘Mahni chanchin ziah meuh chu a, kan ropui lo em mai,’ a ti deuh zet a; mahse, khua rei deuh hnuah a ziak a, a awm ta lo a, a chhungte tana a thu ziak chu a hlu tawlh tawlh.

Kan kût neih chhunte hi hlut ila, awmze nei zawkin i hmang chho zel ang u. Mîm Kût chibai vek u.

- State Tribal Resource & Training Centre, Directorate of Social Welfare & Tribal Affairs

(Thu lakna hnar hi a tam tham ang reng a, hriat belh duh chuan instagram https://www.instagram.com/stor... ah hian rawn zawh mai ni se)