Politics-ah Mizo hmeichhiate An thleng sang lo ang!

Democracy ram kan nih vangin Politics awmzia hi sawifiah vak angai awm love. Naupan lai aṭangin Pathian thu leh politics thlipui nuai vel kara cheng kan ni a, a pahnih hian kan hre em em vek a ni. Kan leikang deuh a, nun khawchhuah nan kawng hrang hrang- zirna te, sumdawnna te, politics te, rimawi leh infiamna lamtluang kan zawh hlawm.

Hetianga kawng hrang hrang kan zawh lai hian inthlang ram kan nih vangin Politics hi tui lo mah ila kan hriata, kan ngaihven a ngai hle. Ngaihven duh lo mah ila min nuai vel reng dawn. Chuvangin politics huangchhung lut lo pawhin thu kal lam leh haw lam tal kan hriat a ṭul a ni.

Ram rorelna huangah hian thawk­lehkhata a vawrtawp thlen thut theih a nilo. Tleirawl lai aṭanga hriat a, tuipui ve a ngai. Chumi hnuah thiamna leh rilru a puitling thawkhata hriat chuan politics hi ralthlir mai loin dailuh a ngai. Hetiang chiah hian kan hmeichhiate hian ti ve rawh se. Tuna hmeichhe MLA kan neih nula Vanlalawmpuii hian vawi khat a sawi ka hre tawh a. Congress-ah hian opposition an nih laiin a hniam ber (member satliah) aṭangin bul a ṭan a, a hnuah ṭhalai pawl (MPYC) ah a inhmang leh a. Mipa rual bula nitin party office lawiluh chu tuarchhel ngai a tih thu a sawi. Ani pawh hian a tuar chhuak mek zel niin a lang, a fakawm hle.

Kan hmeichhiate hian politics hi an mausam em ni? Reservation an chang a, an lawm ve em em ringawt! State dang, hmeichhiate tan parchhuah a har em em na ah MLA, minister mai ni lo Chief Minister thlengin an ther fur a; Mizoramah chuan hnasang an thawh hnuah chauh politics an tuipui a. An tan khua a tlai tawh em aw tih a awl. Hei vang hian kan hmeichhiate hi politics huangah an chim chin a sang thei lo niin a lang.

VC/LC leh AMC vela 'women reservation' awm ta hi a lawmawm hle. Mahse politics tuipuia lut duh silo, reservation-in remchang a siamsak hnua sawmchhuah in beisei ang zia zanga, ral aṭanga an thlir tlat hi kan hmeichhiate hian inenfiah an ngai ka ti a ni. A chunga kan sawi ang khian politics-ah chuan dailuh a, party politics boruak hriat a ṭul. Kan hmeichhia tam tak hi hna sang an thawh hnu, pasal an neih hnu te leh zirna sang an pass hnuah chauh politics hi an tuipui niin a lang.

College-ah te University ah te hian mipa chuan politics an tuipui hle tawh a. Politics an tuina hi a tlangpuiin High school an kal vel lai aṭanga inṭan a ni. University-a MA zirlai hmeichhia zingah politics lama bo lutuk ang chi; (an tuipui lo anih pawhin an zirna vangin tlem tal an hre tur a ni) MLA, minister te hming leh an hmel hrelo an tam lutuk hian politics-ah hmeichhiate an thlen san theih a beiseiawm loh tih a tilangin ka hria.

Reservation vang hian hmeichhiate hian hlawkna an hmu ngawt dawn lo; Rel-ah pawh Tribal tan concession a awm a. Mahse chumi hmang ṭangkai tur chuan Rel-a i chuan luh a ngai. Chutiang chiah chuan kan hmeichhiate hi politics-ah zuanglut se, hma an sawn ngei ang.