Kelkang-in a kang ve che em?

Tunlaiin Kelkang kal kan intihhmuh viau a, Mizoram hmun hrang hrang aṭangin motor tam tak a kal deuh reng a. Kelkang khawtlang pawh mikhual thlen dan ngaihtuahin an buai ṭhin hle niin an sawi.

Hman deuh khan North Vanlaiphai-ah thil pangngai lo deuh a thleng a, mi pa leh hmeichhia ṭhan kin zet tawhte pawh naute angin an in hria a ni chek ang a, hnute burah bawnghnute an thun a, chu chu an hne a, hnute hneah an inngai a. A ṭhenin nau an vei a, mipa leh hmeichhia an dang chuang lo. Nau an vei hnuah nau nei tak tak anga nau veia na tuara an awm hnuah nau hring ang chiahin an awm leh a, an thlan te pawhin a bual nasa hle ṭhin niin an sawi.

Tunah hian North Vanlaiphaia hlimna mak ang reng tak dawngtute kha engtin nge an awm tak zel ka hre lo a. Kelkang harhnain boruak a nei lian ta em a, North Vanlaiphai hi kan hnuchhawn ta deuh niin a lang.

Kelkang harhna chhim tura Aizawl aṭanga kalho pawh hi an inbuatsaih nasa ṭhin hle a. An kal hma kar khat la awm aṭangin an thawm­hnaw ken tur leh ei in ken tur lam khawmin an hmanhlel a. Chutah a kalna tur motor hlui lam pawh an duh lo a, motor ṭha leh fit thei ang ber ken an duh a, car thar nalh tak tak keng pawh an tam.

Hetiang taka an inbuatsaih a, an ken tur ang angte an lak khawm hnuah a kal tur list an han siam a, "Rilru leh tihtakzeta inpekna nena kal lo tur chu kal loh law law tur," te an ti a, an in fuih nge an in vau! Chutianga an inpeih at hnuah chuan Kelkang chu an pan ta ṭhin a ni.

Kelkang kalte hi an rawn hlim haw deuh tlangpui a, Kohhran leh khawtlangah an langsar a, Thlarau Thianghlimin a chen chilh avangin an hlim a, Pathian fakin an hun tam zawk an hmang ta ṭhin a, an lawm­puiawm a. Amaherawhchu, mah­ni tan ni lo, midang tana kal pasal emaw fate duh mang lo chung hruaia kalte eawh beisei angin an hlim haw lo deuh ṭhin niin a lang.

Ka sawi duh chu mahni tan kan kal a ni emaw mi kan kalpui pawh ni rawh se, chhandamna hi hman remchan lai leh duhthawh lai a nih vanga bawha neih mai theih thil a ni lem lo.

Pathian Thlarau Thiang­hlim hi khawi kipah pawh a awm a, lungin aṭang pawh mi a pianthar thei a ni. Chuvangin, Kel­kangah chauh harhna chan tum lo ila, kan awmna hmunah ṭheuh Kelkang kal tur­te rilru inhawn ang leh inpuahchah anga kan inpuahchah a, tihtakzeta Lalpa kan auh chuan misualte ngaihdam ṭhintu kan Pathian hian min chhang ngei ang.