Book of the year chungchang kha

Kum 1989 aṭang khan Mizo Academy of Letters hian kum khat chhunga Mizo ṭawng lehkhabu chhuak ṭha a tih bu a thlang ṭhin a. Kumin 2015-a lehkhabu ṭha a ṭhlan chu 2014 kuma chhuak kha a ni a, kum 26 a thlanna a ni. Hei hian Mizo ṭawng lehkhabu a hlut phah hlein kan hria.

Vanglaini chanchinbu April 17, 2015 chhuakah khan Mafaa Hauhnar khan MAL Book of the year a thlan ṭhinte kum 26 chhunga mi 5 chauh a pawm thu a rawn ziak a. Hei hi a mi mal ngaihdan a ni a, dem vak bik tur a ni lo vang chu. Kei ve pawh hi MAL-ah hian Executive Committee Member pakhat niin, Life member ka ni ve tawh a. Book of the year thlangtu Sub Committee-ah pawh ka tel ve tawh a. A reltute zingah hian tel mah ila, mi mal ngaidan aiin a tam ber ngaihdan angin Democracy takin kan kal ṭhin. Kei pawh hi a reltu zingah tel mah ila, ka ngaihdan ang apiang chu a tlang vek bik chuang lo. Chuvangin, Mafaa pawh khan Committee pawn lam aṭangin a ngaihdan a rawn sawi ve mai a ni a. “Kela, be be suh, an talh tho tho dawn che,” tih ang vel hi a ngaihdan chu a ni ve tho dawn a ni. Tichuan, Book of the year Sub-Committee chuan kum khat lehkhabu chhuak chu uluk takin a thlir ṭhin a. Book of the year thlan nana tehfungte chu mi dangte pawhin kan hriat ṭhin atan han tarlang law law ila.

Originality & Creativity

A ziaktu irawm chhuak, a suangtuahna ṭhat leh ṭhat loh leh mi tihdan zui lova ama tihdan phung thlirna emaw, Critical Analysis, a chhui dan leh hrilhfiah dan enna. (Marks 30)

Language

Heng hmangte hian teh a ni ang. (Marks 30)

1) Mizo ṭawng dik.

2) =awng kauchheh mawi leh ṭha

3) Mizo ṭawng ziah dan dik

4) Thu rill eh awmze nei

3) General Impression. (Marks 40)

1) A kawm leh a bu pianhmang

2) A thu inrem dan

3) Chhut dik leh fiah

4) Mi a l>m dan

Heng hmang hian Sub-Committee mi ṭhiam thlanchhuah 5-in an en ṭhin a, panga zinga pakhat chu pawn lam mi, mi thiam ruat tel ve ṭhin a ni. Mafaa hian “Pawl tlemtein an duh zawng leh duh sak zawng an thur chhuak a ni ber lo maw,” a tih hi chu pawm theih chi a ni lo. Ani pawh hi Sub-Committee-ah emaw, E.C Committee-ah emaw pawh tel se, a duhsak vang ngawt chuan tu lehkhabu mah MAL hian a thlang bik chuang lo vang. Kum khata lehkhabu chhuak za chuang zet Sub-Committee hian a lakhawm a, chung zinga a ṭha zual bu 20 chu a thlang phawt a. Bu 20 an thlan chu E.C Committee-in a enpui leh a, a pawm chuan bu 20 aṭang chuan sub-committee chuan Top 10 tur a thlang leh a, Top 10 chu Sub-Committee in an en fel hnuah E.C Committee-ah a rawn chhawp chhuak leh a, E.C Committee-in a pawm theih chuan Top 3 an rawn thlang leh a, chuchu E.C Committee-in apawmtheihchuanSub-Committee-in pakhat, Book of the year tur chu an report aṭangin E.C Committee-ah chuan sawiho a nil eh a, E.C Committee in a pawm theih chuan Book of the year chu thlan fel a ni chauh ta a ni. Book of the year tur Sub-Committee-in an rawn chhawp chhuah hi E.C Committee-in a pawm loh chuan Sub-Committee en ṭha leh turin a pe kir leh ṭhin. Hetianga fel taka en chhuah a nih hnuah Book of the year chu pawm leh puan a ni chauh ta a ni.

Book of the year hi kum khata lehkhabu chhuak aṭanga thlan a ni a. Thlan ngei ngei tur a nih avangin lehkhabu chhuak ṭhat vak loh kum pawh a awm thei ve tho. Mafaa’n a thlan theih loh a awm thu a sawi hi a dik ve tho. Kum 1950 vel lai khan kan ṭhianpa chuan “Kei chu Chawngtleng inkhawmpuiah tlangval hmelṭha ber ka ni ve asin,” a ti a. A bula kan ṭhian pakhat chuan, “Chawngtleng inkhawmpuiah chuan tlangval an va hmelchhe awm ve,” a lo ti a ni. Hetiang deuh hian kum khata lehkhabu chhuak kha a ṭhat vak loh kum te a awm chuan, ṭha vak lo mah se a aia ṭha a awm chuan si loh chuan chumi kum atan chuan a ṭha ber chu Book of the year-a puan loh theih a ni lo a ni.

Hetiang hi Book of the year awmzia leh a thlan dan chu a ni a, Mafaa lo pawh hian an lo hriatthiam atan ka han sawi a ni. Book of the year kan neih zawng zawng hi mi zawng zawng sawiselbo chu a ni thei ngai lo tih hi chhiartute pawhin kan lo hriatpui atan ka han sawi ve a ni e. Pathian Fapa Isua meuh pawh a ṭha lo titute avangin Kraws-ah an khengbet hial a nih kha. Kan Book of the year hi sawiselbo ni lo mah se, Mizoten lehkhabu siam lama hma kan sawn theih nan MAL chuan a la thlang zel dawn a ni.