Gas kan hnianghnar zel e
Tunlai hian Aizawl khawpuiah chuan eirawngbawlna gas a hnianghnar leh ta hle mai. Hman deuha gas harsat zual lai phei kha chuan a black-a lei tur a vang tho si a, gas nghei vanga mi ta ban buai pawh tam tak an awm hman a, ṭhenkhatin loh theih lohin meihawl an hmang a. Gas neih loh vanga thing hmang pawh Aizawl khaw chhungah an awm hman hial a, mita hmu lo chuan in awi lo pawh a ni maithei a, mahse hei hi thu dik a ni tlat. Tun ang zel hian thingtlangah pawh hnianghnar takin dawng ve thei se a duhawm hle. Tun ang zel hian gas hi hnianghnar zel se a lawmawm ngawt ang.
Sorkar laipuii gas a semdan kalphung a ti danglam a, subsidy-a Rs. 300 zet min tumsak kha tum tawh loin tunah chuan bur khat Rs. 780 in kan la ta a, subsidy sum Rs. 300 zet kha kan account-ah a rawn let leh mai dawn a. Kan chawi belhna sum rawn let leh erawh a muang deuh a, hei hi internet kaltlanga pawisa an dah luh vang leh a bulṭanna a la nih vang a ni mai thei.
Gas hi thingtlangah phei chuan hnianghnar taka an sem hun a nghahhlelhawm hle mai. Thing leh mau chereu zel tur ven a ngai a, kan thingtlanga chengte hian gas an hnianghnar si lo a, chuvangin thing tuah an la lo thei lo a; nakin huna ramngaw ṭha tak tak tur pawh loh theih loh vangin an suat a ngai a, chuvangin gas agency leh sorkar lam pawh hian kan ramngaw chereu lutuk tawh hi a chereu zel tur ven nan gas tam zawk a pek a ṭul ta khawp mai.
Mizoramah gas connection kan neih tirh khan duhamna leh thlaphanna a nasa em em a, chuvangin connection pawh pakhat mai lo, panga aia tam nei pawh an tam hle a ni.
Tunah hian gas kan hnianghnar chho ta zel a, connection pakhat aṭangin kum khatah gas bur 12 lai kan la thei tawh a, chuvangin connection nei tam tan pawh mamawhna a sang lutuk dawn ta lo a, an connection ṭhenkhat kir leh (surrender) duh pawh an la tam dawn hle a ni.
Hnianghnar taka eirawngbawlna gas kan dawn theih dawn phawt chuan chuhhelh taka gas connection 4/5 siama kawl ṭeuh hi a reh tawh ang a, gas laknaah a rem lo chung bur khat aia tam lak tuma innawr pawh a reh ang a. Gas connection tam tak kan pe kir duh dawn bawk tih a lang reng a ni.
Hetiang zela gas hnianghnara kan awm hi tawp mai lo se, sorkar leh agent-te hian theihtawp chhuah chhunzawm zel se a lawmawm ngawt ang.