Ngaihdan pawh sawi ngam lo Mizote

Hman ni khan BJP president Amit Shah chuan Mizoram a lo tlawh a, a hmuak tura Vanapa Hall-a kalte kha an kal man TA/DA pek an nih bakah pawisa an la dawng tel zui niawmin an sawi a. Hei hi politics-ah chuan an tih ṭhin dan a ni a, mah se ka rilru tinatu zawk chu BJP president lo kal dodalna emaw Kristian Biak In an tihchhiat leh an tihduhdah vanga lungawi lohna lantir leh bawngsa an khap avanga lungawi lohna lantir a awm lo kha a pawi ka ti khawp mai.

Meghalaya, hetia en maia hnam dawihzep zawk anga kan ngaihte chuan BJP president kha an lo dodal a, anni chuan Kristiante chunga hleilenna thleng avanga an lawm loh thute lo tarlangin an lo dodal ngam a, chu bakah bawngsa an lo ei khum siah siah ngam asin. Khasi ho khu ka hriat ve danin bawngsa ei nasa hnam an ni a, bawngsa zawrh leh bawng talh khap chu an eizawnna tibuai thei thil a nih piah lamah sakhaw thil avanga midang sakhaw palzutna a nih tel bawk avangin an duh lo a, chu chu a takin an lo lantir ngam a ni.

Political party lamah dodalna lantir ngam ber tur chu Congress an ni. Congress hi kawng engkima BJP nena inhal an ni a, BJP hmelma chu Congress an ni a, Congress hmelma chu BJP an ni ti ila kian sawi sual ka ring lo. Congress sorkar kan nei mek a, he sorkar hian a tir aṭang tawh khan BJP hi an do ngam thlawt lo. Kan Congress hruaitute hian BJP hi an dodal ngam lo a, an sawi chhe ngam lo a, India ram hmun danga BJP leh an naute RSS leh VHP vel chet dante hi chu a sawiseltu ber tur an ni chiang asin mawle; an ngawih dûk chhan hi chu NDA sorkar a ding tawh a, kan state a rethei sia BJP tihlungawi loh chuan kan budget hi a nghawng an hlauh vang a nih ka ring. Hei hian ka rilru a tina ve khawp mai.

MNF chu BJP sawisel ngam tur an ni lo a, a chhan chu an blessing chan loh hlaua BJP lam ṭang an ni a, Mizo mipui nawlpui hmuha BJP-MNF inzawma nga kal an hlauh deuh avangin an lang chhuak ngam lo mai mai a, a takah chuan MNF hi huan BJP an âwn hle a ni. Chanchinbu lamah pawh an lo ziah tawh angin ZNP ber pawh hian BJP hi MP inthlan dawn khan an lo zuk thurualpui deuh hman a ni awm e, khawiah nge pawh an 'Zo Nationalism' chu a awm tak ni tihte ka inzawta rilru hi a beidawng rum rum dawn a lawm le. BJP thil tih dodal ngam lo awm khawmna state kan ni ta a ni tuna kan dinhmunah hi chuan.

BJP hi political party an nihna zawnah kei chuan ka dodal ve lova, an policy tam tak pawh hi a ṭha ka tih zawng a ni a, ka dodal chu BJP hnuaia ngampa taka sakhaw dang beitu RSS-te chet dan hi a ni a. Tin, tun hnaia bawng talh khapna an kalpui dan leh Hindu vote an duh luata sakhaw dang betute an nêk chep salh salh hi a ni keiin ka do chu ni. Tin, tunah hian BJP hian Mizoram chhim lama Autonomous District Council lamah bu khuar ngheh an tum mek a, direct funding leh thil dang tawktarin an inzuar niawmin an la sawi lehzel bawk a, tun anga an duhthala an chet chuan kan rin loh khanah hian an lo chhuak dawn niin ka ngai a, hei hi politics-a do chi nge, hnam anga do chi nge, thuziak hmanga do chi nge, TV discussion hmanga do chi nge, Amit Shah lo zin do lova kan lo lawm anga lo lawm chi nge, tihte hi Zoram Hmangaihtu inti zawngin i ngaihtuah ang u hmiang.

Mizorama Mizote hi chuan bawng talh khap kan duh lova, RSS leh pawl ṭhenkhatin Kristian an beih dan leh sakhaw dang an nêk dan kan duh lova, mahse chuti chung chuan au chhuahna remchang ṭha ber Amit Shah lo zin khan engmah kan sawi lo kha kei chu mak ka ni a, Mizote hi mahni ngaihdan pawh sawi ngam lo kan angin ka hria a, Aizawlah pawh kan sawi ngam tawh loh avangin Delhi-a zuk kala kan lungawi lohna thu sawi ngam tur phei chuan tuna hruaitu ho hi chu ka ring zo lo a ni. Meghalaya ṭhalai ṭhenkhat ang tal kha chu nei ila India hian bawng talh khap kan duh lohzia an hre ve mai tur tih hi ka ngaihtuaha ka ui khawp mai a ni.