Ruihhlo i do ang u
Amah maiin awm ni se la chuan do a ngai lo ang, mihring ten nunphung ti danglam tura kan khawih miau avangin Ruihhlo hian mimal, chhungkua leh khawtlangah buaina leh hasratna a thlen a, tunah chuan ram puma kan buaipui luai luai a ngai ta mai a nih ber hi–engtiang takin nge kan buaipui chhunzawm zel ang tih erawh ngaihtuah fe tham a tling.
Taksa sawizawiin zingah ka tei chhuak ṭhin a, kawngpui dungah ṭhalai mai bakah kum upa lam tawh, taksa hrisel duha hma taka tho, taksa sawizawi ka hmu ṭhin–chung mite chu hmuh an nuam a, an nun a zangkhaiin hmuh an nuam a, nun an ti hlim ṭhin.
Insawizawi chauh an ni lo, ni chhuah hma aṭanga eizawngtu vak chhuak mi tam tak hmuh tur an awm. A bikin hmeichhia hmuh tur an tam, chung mite chuan an pasal fanau te ei tur thawh chhuah tumin theihtawp an chhuah, hmuh an nawm bakah an zahawm em em bawk–zing taka thoin, thlan tui far zawih zawih chungin ei an zawng a ni.
Heng mite karah hian, tlangval tam tak ka hmu ṭhin bawk–chung mite chuan ka lung an ti zing ṭhin thung. Mizo tlangval, zing taka tho, mahse hna thawk lo! Hna thawk lo pawh ni satliah lo, zing ni chhuah hma aṭanga ruihhlo zawng, danglamna tur zawnga vak suah suah hmuh tur an awm tlat, heng mite hi ngaihtuah an ngai a, rilru ti hah tham an ni takzet.
Zep tur a awm lo–Mizoram chhungah ruihhlo a tam a, a titu pawh an tam. Chanchinthar ngaithla ila, sorkar thuneitu lam leh tlawmngai pawl lian ten ruihhlo an man chu hriat tur a awm deuh reng a, an man tam tak karah hian man loh chu a tam zawk a ni dawn tih a chiang em em bawk, an man lohte chu kan ṭhalai ten ruih nan an hmang a, sum an senral bakah taksa an ti chhia a, a hnu lawka nghawng ṭha lo hrang hrang hring chhuak thei a ni bawk.
Mizoram sorkara Home leh Excise department lam hian tih rem tumin theihtawp an chhuah mek a, beihpui pawh an thlak ngawrh viauin ka hria. Sorkar hmalakan thlawp hi mipui ten kan tih tur a ni a, a man chhuah leh nekchep kawngah police fin chhuah ṭhin ila, kan thil hmuh leh hriatte pawh sawi lang hreh lo tlang ila a ṭha hle ang.
A pawimawh ber chu 'Ruihhlo Tih Duh Loh' a ni, hemi tur hian nu leh pa ten kan fate kan zirtir uar a pawimawh, a tisual tawh thawi damna tura sum sen hautakzia leh a harsazia kan hrechiang a, chuvangin Pathian ṭihna nena ruihhlo hnawl turin naupang te kan fuih nasat a ngai hle.
Sorkar chauh ni loin Kohhran pawhin ruihhlo a do dan, a do leh tih dam nana sum a hman dan hi ngaituah nawn leh se tih lai ka nei. A tih tawhte thlahtlam ngawt chu thil theih a ni hauh lo ang, a buaipui tur pawh a ni. Chutihrualin, a tihdamna aiin a la ti lote ven leh zirtirna kawngah tha thawh nasa zual ila, naupang zirtirna leh fuihna kan neih tam zual deuh deuh a pawimawh hle a ni.
- Thanga, Aizawl