Traffic jam tihziaawmna turin

Aizawl khawpuia traffic jam hi Aizawla chengte leh khaw dang aṭanga rawn tlawhtute tan pawh harsatna siamtu ber leh kan nin ber, kan ni tin khawsak nunphung tikhaihlaktu ber a ni. Mi ṭhenkhat ṭhahnemngai zualte’n chanchinbu leh media hrangah a tihziaawm dan tur rawtnate an rawn nei fo a, hengte hi sorkar hian uipui tuilian thlir mai lovin, mutmawh hnarmawhah nei se a duhawm hle mai.

Mi fing leh rem hre zawk tam takin rawtna an neih ṭhin karah, kei tehlul hian rawtna ka rawn chhawp chhuak ve teh ang.

1. Sikul bus siamsak vek se: Aizawla sikul lar bik, mipuiin an bawh bik deuh ho hian school bus bik nei vek se, sorkara Transport department pawhin a bikin bus permit pali panga thleng pawhin siamsak mai se. Sikul naupang pakhat thlah nan mi khawsa thei deuh chhungkua chuan private motor an hmang zel si a, sikul naupang pahnih khat hruai nana motor hmante hi a tam tham hle. Mahni sikul bus ṭheuhah sikul naupang hi sikul kal nan leh haw nan hmang thei deuh vek se, motor veivak a tlem deuh na na na chuan, tun ai hi chuan kan ziaawm hret awm mang'e.

2. Motor in turn thut thut: Kawngpui chep tak tak karah driver ṭhenkhat chu rem leh rem lovin an inher (turn) thut thut ṭhin. Rei lo te pawh an inher chhung hian motor a inhnawh khawm hman nasa hle ṭhin a. Turning point ni loah hi chuan traffic police-te hian lirthei in turn thut thut ṭhin hi phal lohna dan khauh takin kengkawh se, eng emaw chen chu awmzia a nei ngei ang.

3. Kawng sira lirthei dah: Bawngkawn leh Kulikawn inkar te, Vaivakawn leh Temple inkar kawngahte hian traffic jam hun lai tak hian kawng sira motor inhûng a tam thei hle a. Lirthei a insûlpelh dawnin heng kawng sira dahte hian harsatna tam tak a siam ṭhin. Duh aiin AMC parking area pawh hi a tamin a zau mah mah hret bawk. Khawpui laili tak, kawngpui lun lai, dawr kawt leh office kawta motor park tam lutuk hian kawng a tizim a, traffic a ti jam ṭhin. Hengahte hian sorkar hian ngaihtuahna thar hmang teh se.

4. Stand leh dropping zon loa passenger lak/chhuktir: Bus leh taxi ho zingah stand loah leh dropping zone loa passenger lak leh chhuktir thut thut ṭhin an tam hle a, hei hi kalphung pangngaiah kan nei deuh tawh niin a lang. Motor thui taka inzui tawh chuan driver thenkhatin stand loah leh dropping zone loa passenger an lak zuai a, an chhuktir zuai chhung hian a hnung lama lirtheite chu nasa takin a lo jam hman ṭhin. Hei pawh hi traffic police-te hian khauh takin dan kengkawh teh se.

5. Bungraw unload hun siam se: Veng laili leh veng kilkhawr deuhah pawh in sa mek leh eng hna hna emaw thawk mekten chhun pachangah cement, rawra, iron rod leh balu te an unload fo a. Hetianga bungrua unload mamawh ngawih ngawihte chuan zing kar motor tam hma emaw, motor tlem hnu zan lamah unload zel tawh se. Hetiang tih ching ho hian traffic jam nasa takin an siam a, thuneitute hian bungraw unload hun hi mumal takin siam se traffic jam eng emaw chenah a ziaawm phah ngei ang.

6. Line bus a lian mah mah: A bikin Bazarpui to ITI, Mualpui, Bazar to Ramthar kawngte hi one way chauh atana hman tlaka tê leh zim a ni. Heng kawngte hi a lun em em a, heng laia rei tak traffic a jam hian khawpui chhung a nghawng nghal zel. Heng kawngahte hian line bus tlantir a ni a, line bus ni si, main road pangngaia tlan ang thova bus liante an service tir si a. Bus lian an insulpelh dawn hian rei tak tak traffic a jam a, heng kawngahte hi chuan bus tê zawk tlantir se nasa takin traffic jam a ziaawm phah ang.

7. Lirthei cheh dan mumal zawk: Khawi maw lai hmunah traffic police emaw, local council leh road protection lamten parking phal lohnaah lirthei dahte an chep a, pawisa an chawitir a. A hnuah a la hre ve loten an dah ve leh mai zel a, traffic jam a ziaawm phah lo va, hmasawnna tak tak a thlen chuang lo. Lirthei neitute chuan garrage neih vek tur tih hi a dik em em rualin, hriatthiam harsa ka tih pakhat chu, road protection ṭhenkhatte’n zan reh tawhah traffic jam a awm tawh loh hnuah an veng chhung kawnpui kam leh hmun ruak dangah lirthei neitute’n an phalna la hmasa lova lirthei an dah changin an chehsak a, an chawitir ṭhin. Hei hi chuan traffic jam a tihziaawm phah lo. Zan lama an duty ai hian chhun lamah check ṭhin zawk se, hma kan sawn phah zawk ngei ang.

8. Zan bazaar siam: Zan bazar siam ila, a bikin Millennium Centre hi zan dar 10 thleng hawng se. Food court ang deuh chaw eina emaw, restaurant changtlung tak siam se, zan rei deuh hawn phal bawk se, ṭhalaite intâwllenna siam bawk se. Bazarpui ber leh heng lai area vela sumdawng tan a ṭangkai hle ang. Zan lamah an men rei avangin dawr neitu leh sumdawngte’n zing lamah dar 11-ah dawr an hawng tawh ang a. Sikul kal leh office kalte chu sumdawng eng emaw zatte nen tuna trafic jam hun lai tak hian an innâwk buai loh phah ang. Chhuna bazar mamawh ngawih ngawihte khan zanah an bazar phah ang a, eng emaw chenah traffic jam a ziaawm phah hle ang.

- R. Lalhmangaiha @ R. Hmaa, Bethlehem