GAS STOVE LEI FIMKHUR A ṬUL
July ni 25 zing eirawl bawl lai vel khan kan gas stove, a zuartuten an chhuan em em, a chhuat ‘top glass, tempered glass’ an tih ngat chu kan hman lai ngeiin ring deuha puakin motor darthlalang keh sawm burh ang mai hian a keh darh chuai a, a per vak bawk. A bul hnaiah eirawngbawltu a awm loh lai a ni hlauh a, lo awm hnai ta se inhliam theih a ni. Mitah te per phei se chu mit del theihna tur hial a ni awm e.
Glass top hnuaia gauge (thirlen sin) phah chu meialhin a man kai nghal a, ka ṭhelhna lamah ka kut zungṭang ka hliamin a durh nual a. Kum 2 lai chu kan hmang hman awm e. Kan lei tirh lai khan gas stove chhuata glass hman tlat mai kha mak ka ti ru deuh reng a. Kan faten Delhi aṭanga an rawn hawn a ni a, a lo mawiin a tih fai vel a nuam bawk a, kan hmang ta kha a ni a. Kan gas stove hman company ni kher lo, glass top hmang gas stove puak darh tawh engemaw zat an lo awm ve tih Facebook aṭangin ka hria a, ka hriat theih chinah mai pawh mi 18 vel chu an ni.
Hetiang top glass chi hmang mek 13 leh lei tawh la hmang rih lo pakhat an awm thu min hrilh an awm a, pakhat chuan a puah hmain an thlak tih min hrilh. Tin, lei tum ve, hetiang thu a hmaa an lo hriat tawh vanga lei ta lo mi 6 in min rawn hrilh bawk. Heng hi Facebook aṭanga min hrilh a ni hlawm a, an facebook hming pawh ka la dah ṭha vek. Face book a ka post avanga an lei tum tawh ṭhulh ta an awm bawk a, a zuartute tan chuan ka ngeiawm viau mahna, mahse a hlauhawm miau si!
Pakhat ve thung chuan hetiang top glass gas stove an hman ṭhin thu leh an hman ngam tawh loh thu min hrilh rualin a chhan a sawi chu ‘a pipe aṭangin a leak duh a, kha khan top glass kha a ti sa a, a puak ṭhin a ni’ a ti bawk.
He kan thil tawn chung-changah hian helam pang thil hre tak V.L. Chinzah (a Facebook hming) chuan ti hian a rawn post - a phalna ka lak angin ka rawn ziak chhawng e: ‘Kan LPG hmanraw hmanah hian kan fimkhur a ngai tak zet a ni. Mizorama kan hman uar hetiang glass top ho hi ‘heat’ (thil sa) ah a puah keh theih avangin India rama thil siam ṭhat leh ṭhat loh tehna ISI leh BSI pawn ‘mark’ an pek loh a ni. Hei vang hian gas company hrang hrang IOCL, BPCL leh HPCL te pawh hian hman loh tura an recommend a ni.
Inchhung eirawngbawl nan hian IS 4246 chuang chauh hman tur a ni. IS 4246 hi stainless steel stove-ah lo chuan a chuang lo nghe nghe. Kan choka kangmei leh chhiat palh thulha a lo him zawk nan IS 4246 chuang gas stove chauh hman a him ber ang. Heng stove 2, 3 & 4 burner te hi LPG Distributor-ah Gas Company recommend thlap man tlawm takin lei tur a awm a, a him em em a ni,’ tiin.
Keini chhung chuan Gas Stove Glass Top chu, a glass chu engtia tempered ṭha pawh ni raw sek sek, kan lei ve tawh lo ang. Chinzah thu ang khian a tlawm leh tlo leh hlauhawm lo zawk stailess steel top chi kha kan hmang leh dim diam tawh.
- Ramhluna Hnamte