Theitui leh Damdawi ei pawlh chungchang

Damlo kan tlawhin theitui han leisak mai hi a remchang a, han vahchhuah nikhua a theitui han in te hian min tiharh sawng sawng a, taksa tan pawh a ṭha hle a ni. Amaherawhchu, damdawi nena theitui ei pawlh emaw, damdawi ei nana theitui hman emaw a nih chuan, kha theitui tui tak si kha taksain a chhiat phah thei thung a, a chang phei chuan thihna hial a thlen thei a ni.

Theitui (fruit juice) ah hian chemical compounds chi tam tak, hnathawh hrang hrang nei an awm a, damdawi ṭhenkhat nena ei pawlh a nih hian, damdawi hnathawhte an tih danglam theih bakah nghawng ṭha lo tak tak luna, luak chhuak, zawi, BP sang, BP hniam, stroke, thawkna lama harsatnate leh thihna hial a thlen thei a ni. Apple, cranberry, grapefruit, grape, pomegranate, serthlum leh citrus fruits ho te hian heng harsatnate hi an thlen nasa bik thei tih hriat a ni. Amaherawhchu, theitui zawng zawng hian heng harsatna hi an thlen vek kher lo. Hetianga theitui leh damdawi ṭhenkhat hnathawh an lo intih buai dante hi an hmu chhuak mek zel a, amahrawhchu a theitui a zirin, chemical compound awm te pawh a hrang a, a awm zat pawh a inang lo thei a; an hnathawh dan pawh a inang vek kher lo a ni.

Damdawi kan ei hian kan pum leh rilah a kehsawm a, kan thisenzam (portal vein) hmangin kan thin (liver) ah a chho ṭhin. Kan taksa peng hrang hranga damdawi a in semdarhna tur leh kan taksa aṭanga paihchhuah a awlsam zawk nan, enzymes chi hrang hrang, kan thin leh rila awmte chuan damdawite hi an lo tidanglam ṭhin a ni. Heng enzymes zingah hian, cytochrome p450(CYP)-te hian damdawi awmdan hi an tidanglam tlangpui ṭhin. Tichuan, theitui leh damdawi ṭhenkhat kan ei pawlh hian, theitui chuan cytochrome p450 enzymes hnathawh hi an lo tidanglam ṭhin a, chu chuan damdawi hnathawh a titawp (block) emaw, a tichak zawk emaw thei a ni.

Enzymes-ho hnathawh theituiin a tihtawp chuan, damdawi chu danglam loin kan thisenah an awm khawm ṭhin a ni. Chutia kan taksa aṭanga chhuak mai loa a awm reng chuan nghawng

ṭha lo tak tak kan taksaah a lo thleng ṭhin a ni. Hetih rual hian, theituiin enzymes hnathawh an tih chak chuan, damdawi kan ei kha rang takin an sawngbawl ta a, tichuan, kan taksa aṭangin kan zun leh ekah paih chhuah vat vat an ni ta

ṭhin a ni. Chuvangin, damdawi ten an hnathawh tur ang an thawk hman lo a, an chakna kha a lo tlahniam ṭhin a ni.

Theituia chemical compounds awm zingah chuan, heng Flavonoids (Naringin, Hesperidin) leh Furano­coumarins (bergamottin and 6’,7’ - dihy­droxybergamottin)-te hian damdawi hnathawh an tibuai nasa deuh ber. Amaherawhchu, heng chemical com­pound chauh lo pawh hi damdawi hnathawh tibuai theitu an awm tho bawk. Theituia Naringin awmna kan in chuan, kan thin (liver)-in Naringenin-ah a lo siam danglam leh ṭhin. He Naringenin hian cytochrome p450 enzymes zinga CYP 3A4 hnathawh hi a titawp (block) thei a ni. Chutiang bawkin, bergamottinleh 6’,7’ - dihydroxybergamottin-te hian CYP 3A4 enzyme-te hi an titawp thei. Tichuan, kan sawi tak ang hian damdawi kan taksaa lutte chu tih danglam lohin an awm a, tur (poison) ah an lo chang thei hial a ni.

Theituiah chuan grapefruits juice-ho hian damdawi hnathawh hi an tibuaiin an tidanglam nasa thei em em a ni. Grapefruits kan tih hian, keini Mizo-in grape kan tih nen hian a inang chiah lo a, citrus fruits kan tihho zinga Serṭawk, Sermam ang chite hi an ni zawk mah. Henghoah pawh hian a chunga chemical compound kan sawi tak angte khi an awm tam ber a, chuvang chuan kan CYP 3A4 enzyme-ah nghawng (effect) a ngah ber bawk a ni. Grapefruit-ho hian kan thin ai mahin kan rila CYP3A4 enzyme awmteah thil ṭha lo an thlen nasa a, damdawi tam tak phei chu awmze nei loah an chhuah daih ṭhin. IV injections (medications) ho hnathawh erawh chu an tibuai em em lo thung. Amaherawhchu, grapefruit-ho pawh hi thei hrang hrang an nih avangin, an juice hrang hrangin a damdawi hnathawh a tih buai theih dan hi a inang lem lo.

Kum kalta lawkah pawh grape wine/juice leh hritlang damdawi- dextromethorphan awmna inpawlh avangin mi ṭhenkhatin nunna an chan phah hial ang deuha report a awm a, a chhan niawma lang thei chu grape-a flavonoids compounds 90-95% hi a grape mu (seeds) ah leh a kawrah hian an awm a. Grape mu-ah hian chemical compound pakhat, resveratrol tih hi a awm bawk. Grape rah aṭanga grape juice/ wine-a an siam dawnin, an sawngbawlna lamah grape mute kha an lo keh sawm thei a, he chemical compound hi a grape tui (juice/ wine) ah te khan eng emaw zat a rawn awm chhuak thei a ni. Kan sawi tak ang khan, he chemical compound - resveratrol hian kan thina CYP 3A4 enzymes hnathawh chu a zu titawp ta ṭhin a ni. Chuvang chuan, hritlang damdawi dextromethorphan nen a grape juice/ wine kan in pawlh chuan, dextromethorphan kha kan thinin a sawngbawl thei ta lo a, kan taksa thisenah awm khawmin nghawng ṭha lo tak tak, thihna hial a lo thleng ṭhin a ni.

Serthlum tui (orange juice) ah pawh hian flavonoid compound hesperidin a awm a. He chemical compound hi damdawi hnathawh tibuai theitu lar tak a ni a, damdawi ṭhenkhat (entirnan dextromethophan) te nena eipawlh loh tur a ni. Cranberry juice-te pawh hi oral anticoagulant drug (thisen khang vengtu damdawi) entirnan, warfarin nena kan in pawlh chuan warfarin hnathawh tibuaiin, thisen chhuak nasa tak a awm thei bawk. Theitui dangah te pawh chemical compound hrang hrang a awm avangin, damdawi dang nen pawh ei pawlh loh a him ber. Chutih rualin damdawi zawng zawng nena inpawlh a hlauhawm vek tihna erawh a ni kher lo. Heng theitui hi kan in duh a nih pawhin damdawi nena in pawlh/ in rual kher loin, darkar thum/ li tal a kar tlak tir ṭhin tur a ni.

A chunga theitui kan sawi ho te khi cancer damdawi, BP sang damdawi, antibiotics ṭhenkhat leh pum damdawi te nena ei pawlh hauh loh tur a ni. BP te a ti hniam vak thei a, thawk a tibuai thei bawk. Luhai, chau, stroke, leh thihna hialte a thleng thei a ni. Amaherawhchu, mihringte hi kan chi (genetic makeup) a zirin a thawh dan mi hrang hrangah a danglam ve thei bawk. Damdawi kan ei dawn reng rengin kan damdawi ei kha damdawi dang nen emaw theitui/ thlai leh thil dang nen a inhal em tih damdawi lam thiamte (Pharmacist) zawh hmasak zel hi a finthlak a ni.

Zirchianna aṭanga a landanin, a chunga theitui kan sawi tak leh a hnuaia damdawi (generic drug) tlema zawng tarlante hi ei pawlh loh a him a ni:

Diabetes damdawi- Repaglinide, Sitagliptin; Cancer damdawi - Crizotinib, Cyclophosphamide, Dasatinib, Erlotinib, Imatinib; Pum damdawi - Cisapride, Domperidone; Malaria damdawi - Primaquine, Quinine, Artemether; Rulhlut damdawi - Albendazole; Antibiotic - Erythro­mycin; BP sang damdawi - Losartan, Verapamil, Felodipine, Nifedipine, Amlodipine leh Lung (heart) damdawi dangte - Amiodarone, Clopidogrel, Ergotamine, Quinidine; Thluaka damdawi hnathawk chi, hritlang damdawi leh nachhawknate - Dextromethorphan, Diazepam, Fentanyl - Oral, Fluvoxamine, Ketamine - Oral, Methadone, Midazolam, Oxycodone, Triazolam; Zun kawng damdawi - Darifenacin, Fesoterodine ,Silodosin, Tamsulosin leh heng damdawi hote hi-Budesonide - Oral, Colchicine, Methyl prednisolone - Oral, Atorvastatin, Lovastatin, Simvastatin, Estradiol, Ethinyl estradiol.