Mahni chauh i inngaihtuah lo ang u

Eng thilah pawh a lutuk chin chu a ṭha lo. Huaisen lutuk a ṭhat loh rualin dawihzep lutuk a ṭha chuang lo. Fel lutuk a ṭha lo a, zaidam leh lutuk pawh a ṭha lo. Sual pawh pawmzam theih riau chi a awm ve a ni. Kan Bible pawn thih pui tham khawp sual ni lo a awm ve bawk a tih kha!

Kan rilrem zawng a nih loh avang ringawt te in midangte duh zawng leh ṭha tih zawng sawisel vak vak i ching lo ang u. Eng thilah pawh midangte thlir dan leh hmuh dan lak thiam zir hi a ṭha e. Mahni duh dan ringawt sawi vung ching lo ila, kan duh dan zawm turin mipui rilru hmin i tum kher ṭhin lo ang u.

Kohhran rawng­bawltu, politician-te leh mi challangte hian mipui rilru fuih pawrh zawnga thusawi i ching lo ang u. Mipui lam pawn tute emaw fuih pawrh mai mai theih kan ni lo tih inhria ila, midang hmin mai mai theihin awm i tum lo ang u. Mifing an tam poh leh ngaihdan a tam a, kan ngaihdan leh duh dan lanchhuahtir dan tawk i thiam ang u. I ngaihdan kha tute emaw rilrem zawng a ni lo thei a, sawi chhuah dan chin tawk thiam rawh.

Ram tana ṭha lo tur nia kan hriat thil kan sawi danah te pawh hian i fimkhur ang u. Midang rilru tina zawng leh sorkar kalh zawng ni loin thusawi te i tum ṭhin ang u.

Mahni mita hmawlh­te awm hmu thei miah si lo hian, midangte mita hmawlhte awm hmu thei zektu kan lo ni reng palh ang e. Ka vanneihna hi mi tuemaw tan chuan vanduaina leh anchhia a ni thei tih kan hriat fo a ngai.

Nang ina i dam pui thil kha mi tuemaw chuan a thih pui thei asin. Chuvang chuan kan ngaihdan kan sawi chhuah dawn leh kan ziah chhuah dawn te hian midang rilru puthmang tur hi i ngaihtuah hmasa ṭhin ang u. Thlasik mau chang puah ang phawng phawng a, kan rilrua awm awm sawi chhuah tawp tawp chin hi a mi pangngai hna lo a, mi puitling tih chi pawh a ni lo.

Kan chhungkua leh keimahni chauh bakah, kan veng leh kan khua chauh in­ngaih­tuah hi mi pang­ngai chin tih tur a ni lo. Kan veng leh kan khawtlang ṭhatna tur chauh ni loin, a ram pum ṭhatna tur i ngaih­tuah tlang ṭhin ang u.

Mahni harsatna chauh ni loin midangte harsatna hrethiamtu leh hmuhsak thiamtu nih tum ila, midangte dikna chanvo rah­behsaktu ni loin midangten an dikna chanvo an humhim theih a, an nun pui theihna tura ṭanpuitu nih tum ṭheuh ila, midangte thil duh khapsaktu leh paih bo saktu nih i tum lo bawk ang u. Mahni ṭhatna tur chauh ni loin, midangte ṭhatna tur leh ram leh hnam ṭhatna tur i zawng zawk ṭhin ang u. Chu chu Pathian duh zawng pawh a ni.