Maxicab duty hi ka thlâwp

Mizoram Maxicab Owners Association chuan Silchar kawng lamah phalna nei loa passenger phur lirthei chu Bualpuiah an lo check a, hei hi an tih awm tak leh thlawpawm tak a ni.

Kumin kumtir mai aṭang khan Cachar registration motor, passenger phur leh bungraw phur tlan a tam hle a, Silchar aṭangin han haw ila, hetiang motor hlir hi kan tawk zut zut mai a, passenger phur leh phur lote an ni nawk mai. Chutiang bawk chuan motor lian ni si lo, bungraw phur hmuh tur an tam hle bawk.

Heng lirthei bungraw phur hi Mizo ho thurualpui an nih hmel a, anmahni chuan sumdawn phalna an nei si lo a, thurualpui nei lo chuan engti kawng mahin bungrua an rawn phur lut dawn lo. Heng ho pawh hi check an ngai hle; ṭhenkhat phei chuan ruihhlo an tawlh pah ngei a rinawm.

Tuna phalna nei miah loa passenger phur motor an check ang bawk hian hnam dang lirthei tam ta lutuk hi sorkar ang pawha check deuh chu a hun ta viau mai. Heti suau suaua hnam dang motor tam ta lutuk hi a dik ta lo. Khua a tlai hma hian sorkar hian hma a lak a ngai ta a ni.

Maxicab neitute'n phalna nei loa passenger phur lirthei an check hi a âwm viau a ni. Kolasib DC phalna an la thlap lehnghal a, an zahawm khawp mai. An fairel bel zenpuitute an bei let hi an tihmakmawh a ni a, sorkar ang pawha thlawp chi a ni. Mipui pawh kan harh chhuah a ngai hle tih a lang.

Passenger phur lirthei hi chuan Mizo an phur meuh lo a, an mahni hnampui an phur tlangpui. Hei hi man chawia an phurh, a ruka an rawn service tih a chiang khawp mai a; thurualpui an neih pawh a rinawm.

Light vehicle hmanga bungraw phur hlei hlei hi an ngaimawhawm ta. An tam si a, eng bungrua nge an phurh pawh a hriat vek bawk si loh. Tu nu emaw thurualpui an neih ngei a rinawm. Vairengte gate pawh thuam chak a, phalna neia phur an ni em tih lo check tura thupek a ngai ta niin a lang.

Maxicab neitute hian ṭan han la zel teh se. Ka thlâwp zawng tak a ni e.

- Melissa Pa