Phuah chawp hlirin em ni kan kal dawn le?

Phuah chawp hi a hming a mawi lem lo nâ a, ṭhat riau hun chu a awm ve. Thil awm sa awm lohna hmuna han phuah chawp maite hian ṭangkaina tak a nei thei ṭhin. Hetiang han phuah chawp mai theite hi a ni awm e, saphovin ‘Presence of mind’ nei ṭha an tih hi. Amaherawhchu, thil awm sa ṭha tak, kan lo hman thiam leh hman ṭhan, hriat chian leh belh chian tawh awmna hmunah erawh chuan phuah chawp chuan chung chu a tluk thei ngai lo vang. A awm sa hman tur awm renga phuah chawp luih ṭâlh hi dikna hêlna, rinawmna pumpelh kawng a ni thei bawk ang.

Mizoram Chief Minister ni tawh zinga ka ngaihsan ṭhin Pu Lal Thanhawla kha ka ngaihsan thu ka ziak chiam tawh a, hruaitu nih an tlinzia a takin ka tawng ve tawh. Kolkata aṭanga Aizawl kan thlawh haw ṭumin, khaw chhe lutuk pawh ni si lovah pilot kha Aizawl Airport-ah a ṭum ngam tlat lo va, Kolkata-ah min letpui leh ringawt a. Khami ṭum khan khatih laia Mizoram sawrkara minister-te pawh an awm ve a, ani kha MLA pawh a nih loh lai kha a ni. Khami ṭuma Pu Hawla te nupa hruaitu nih tlinzia kha ka sawi chiam ṭhin. Mahse, ani pawh ka ngaihsan tehlul nen, NEDP an han phuah chhuak zet kha chu ka va haw tak. Ka ngaihsanna zawng zawng kha huatnaah a chang ta emaw tih mai tur a ni. Nationalism, hun leh hmun thliar thiam, issue pawimawh leh pawimawh lo hriat hran chungchangah leh thil tam takah a chungnung thlawt a ni. A taka huai hun leh dawih hun a hria a, organiser ropui a ni. A CM term hnuhnung berah erawh amah a chak tawh loh avanga sorkarah a active tawk loh vang a ni mai thei e, a than ni a bâng kir ta deuh a nih kha.

Kan naupan tet lai aṭangin Agriculture, Horticulture, Fisheries, Vety, Sports, etc lamah hian thawk rimte ṭanpuina hi a awm reng a, an sem reng a, taima deuh chuan an hlawhtlinpui ṭeuh tawh. Heng department-te hi tun hma zawng zawng aia changtlung zawk, hmanraw ṭha zawk, computer-te nen, building ṭha zawk leh thawktu tam zawkin an awm deuh vek tawh ang. Chutih laia kan department neih sain a huam vek tho, ‘Trade’ hmanga hmasawnna programme hming hran phuah chawp hi a ṭulna ka hre ve pha lo. A chhungah chuan eng anga thu ṭha pawh inziak rawh se, a taka an hman dan, a lan chhuah dan, mipui a nghawng danah hian a nihna dik tak a lang fiah a ni. NEDP tih te, SEPD tihte kha a tawi thei ang bera hrilhfiah chuan, ‘Mipui sum party-a insem dan tur ruahmanna fing vervêk tak’ a ni ringawt mai. PAHOSS hming phuah chawpa sawrkar sum vaibelchhe tam tak semte kha eng tin awm ta zel ang maw?

Tunah hian ZPM sawrkar tharin ‘Bana Kaih’ (Handholding) a rawn phuah chhuak ve leh ta. A hming chu eng pawh ni se la, hei hi chu NEDP leh SEDP ang ni lo hram tura ṭawngṭai chu Zoram mipui tih tur pawimawh tak niin a lang leh ta. A hmaa mi ang thovin headquarters lam aṭang chuan eng emaw chen chu thil ṭha tih nana hman chu an tum leh ngei ang, mahse, a dawngtu tur lamte hian engtin tak dawngsawng leh ang maw? Congress NEDP dawng leh MNF SEDP dawn dan rilru tho pua ZPM-in ‘Handholding’ an dawn ve chuan a pawi khawp ang. Kan ram chu chhiatna ata chhiat lehzualnaah a kal tihna chauh a ni ang.

Theih ni se la, hetianga phuah chawp lo hian kan establishment neih sa hmanga development hnathawh mai hi chu a ṭha ber ang. Hetia an tih hian sum tam tak sen belh a ngai ṭhin. NLUP leh SEDP te pawh kha, a committee leh thawktu bik an han inruat a, motor an han lei leh kha chuan vaibelchhe têl kha a thawh tur a thawh hmain a kal ral niin an sawi.

A chung lama kan sawi tawh angin, kan hmanraw engkim a ṭha tawh a, tun hmaa thawktu pali panga thawh theih kha pakhat pawhin kan thawk thei tawh. Technology hmasawnna avangin department zawng zawng theihna a pung tawh. Tuna kan programme kalpui mek leh kan hruaitute thil sawi ṭhin hi chu kan estblishment awm sa hian a zo hle niin a hriat theih a ni.

ZPM sehsâmah khan mi thiamte titi ngaithla tur hian titi honaa kal ve mai mai ka ching ṭhin a. Pu PL Liandinga’n a sawi fo, ‘Existing resource hman dik’ khan min hneh ngang mai. Sual ngaihdam nana Lalpa Isua hminga baptisma ka chan chhan; evangelist Siamkunga thusawiin min hneh tluk zetin min hnehin ka hria. Zuk hai chhuah ṭeuh ṭeuh pawh a ṭha; mahse, chu ai mah chuan a awm sa dik tak leh ṭangkai taka hman hi a pawimawh zawk awm e. Kan resource neih sa, kan establishment neih sate hmang hian rinawm leh dik takin kan ram hi enkawl ila, thil tih ṭha a tam avanga kan savun pengin a zawh loh hunah phuah chawp ta chauh ṭhin ila a ṭha awm mang e.

- Rev. Jh. Za Hluna (Paula Pû)