Mizo ṭawng humhalh: A kawng a bo deuh em?

Hman deuh aṭang khan Mizo ṭawng humhalh duhna a lian a, kohhran leh kohhran hnuaia fellowship inkhawmpuiahte pawh agenda-ah a lut chho a. Tlawmngai pawlte pawhin kan ngaih pawimawh a ni chho mek. Amaherawhchu, ṭawng humhalh tiha kan hmalak dan en hi chuan nghawng a nei thui vak lovin a rinawm.

Hmalak kan tum dan

Mizo ṭawng humhalh tura hma kan lak dan leh kan rêl dan en hian hlawhtlinna hmuh a beiseiawm vak chuangin a lang lo. Kan inkhawmpui hmingte Mizo ṭawnga dah te, thil hming hrang hrangte Mizo ṭawnga dahte hi ṭawng humhalh tura hma kan lak dan a ni tlangpui a. Hetiang hi a lan dan maiah chuan a ṭhat hmel viau nachungin, korî a tu thui lo hle thei tih erawh kan hriat a ngai.

Latin ṭawng leh ṭawng dang

Latin ṭawng hi ṭawng thi tawh a ni a, tunah hian tu ma’n hmang an awm tawh lo. Amaherawhchu, thil hming hrang hrangah chuan kan la hmang nasa hle a, rannung, thlai leh ramhmul hmuh chhuah thar ho pawh Latin hmingte la puttir hram hram a ni. Mahse, ṭawng tuallêng, ni tina inbiak nana hmangtu an awm tawh loh avangin ṭawng thi a ni. Sikul leh zirna in hrang hrangte’n an motto-ahte Latin ṭawng an la hmang kûr ngei nguai a, mahse, ṭawng thi a ni tho.

Chutiang bawk chuan Sanskrit pawh thil hming hrang hrangah hman a la ni nachungin ṭawng thi a ni tho. Koine leh Classical Greek te, Church Slavonic te, Syriac te pawh a ni vek ang. Hengte hi ṭawng tuallênga hmang an awm tawh loh avangin, hmun leh thil hming hrang hrangahte chuan la hmang mah se, ṭawng thi an ni tho.

Sap ṭawng

Sap ṭawng kan tih, English hi a ṭawnghmangah chuan Germanic an tih chhunga mi a ni a, amaherawhchu, an thumal zaa 26 chauh Germanic a ni. Chutihlai chuan, an thumal za 29 chu French aṭanga an lak a ni a, zaa 29 chu Latin ṭawng a ni an ti. Chuti a nih chuan an thumal zaa 58 zet chu Latin hnahthlak ṭawng tihna a ni a, ṭawng ṭhen hrannaah chuan Germanic ni lovin, Romance Language chhunga mi ni âwm tak a ni. Chuti chung si chuan Germanic language hnahthlak zinga chhiar tel a ni zel.

Germanic language zinga an la chhiar tel tlatna chhan chu ni tina inbiak nan, ṭawng tuallenga hman tam ber hi Germanic a la ni a, thumal an hman rim ber ber 100 thlan chhuah zinga pali chauh hi Germanic ni lo a ni a; chungte chu–just, people, cause, because te hi a ni an ti. Hengte hi Romance (Latin emaw French) aṭanga lak a ni.

Hemi awmzia chu an thumal tam ber hi German hnahthlak ṭawng ni tawh lo mah se, ṭawng tuallênga an hman tam ber chu Germanic a la ni a, an grammar kalphung pawh Germanic a la ni. Dictionary-a thumal awm zaa 60 vel deuh thaw chu Romance language family-a mi a ni nâin, ni tin ṭawnga an hman zaa 70-80 chu Germanic language family a la ni.

Ṭawng tuallêng

A chunga tarlan aṭanga pawimawh chu, ṭawng bo leh bo loh chu ṭawng tuallênga kan hman nasat leh nasat lohah a innghat tih a hriat theih ang. Thumal tam tak, Sap ṭawng leh ṭawng dang aṭanga kan lak, inkhawmpui hming te, hmun hmingte hi Mizo ṭawngin thlak eng ang mah ila, ṭawng tuallêngah Mizo ṭawng kan hman tlem tial tial si chuan awmzia a nei lem lo.

Kan inkhawmpui hming te, kan sub committee hming te, kan veng leh khaw hmingte hi Mizo ṭawngin mawi takin phuah mah ila, ṭawng tuallêngah, ni tina kan inbiaknaahte kan hman tlêm tial tial si chuan Latin ṭawng ang mai, Sanskrit ang mai a ni dawn tihna a ni. Thuziaka hmuh tur awm, a ṭawng hman tawh chuan si loh, ṭawng thi a ni tho tho ang. Italy-a hmun hming eng emaw zat khu Etruscan ṭawng/hming a la ni; Etruscan hi Kaisara Augusta te hun lai aṭang tawh khan chim ral an ni vek tawh.

Ṭawng humhalh nan

Mizo ṭawng humhalh nan chuan ni tin kan inbiaknaah kan hman tam a ngai a, Mizo ṭawng hi kan hman luih a ngai a, hmang tam tura kan inzirtir a ngai a ni. Chumi piahah kan grammar kalphung pawh kan vawnhim a ngai. Hei hi Indo-European te nena kan danglamna lian tak a ni.

Ṭawng tuallengah, ni tina kan inbiaknaah, grammar kalphung dik zuia a tam thei ang ber hman kan inzirtir chuan si loh chuan hmun hming leh thil hming thlak ringawt hi ṭawng humhalhna a ni lo. Hmun leh thil hmingahte hian ṭawng dang hmang mah ila, kan ni tin ṭawngah Mizo kan hman tam ber zel chhung chuan Mizo ṭawng hi ṭawng nung a ni reng ang.

Thumal thar kan chher belh ta meuh lo a, chuti chung chuan a tlukpuia kan neih reng hi chu Mizo ṭawngin hmang hram hram ila. Tun hmaa kan lo hman ṭhin pawh, a anpui chiah chiah a awm tawh lo a nih pawhin, a hmaa kan hman ang kha puttir mai theih a ni.

• Chhîn hawn theih a nih tak avang leh nalh zawka kan siam tak avanga 'cabinet' ti kher lo hian, 'chhuar' la ti zel mai ila.

• Gas stove leh induction heater a awm tâk avangin tapchhak a nihna hi tibo chuang lo ila.

• Thîr (steel)-a siam, a hmelhmang a danglam tak avanga 'sink' ti kher lovin 'tui dehna' la ti tho ila.

• 'Shower' kan dah tak avang leh, inthiarna nena a awm kawp tak avanga 'bual in' tih rem tlat lova kan ngaite hi dik chiah chuang lo.

• 'Washing machine' tih duah ai chuan 'Insûk khâwl' han tih maite hi Mizopa hmuiah chuan a ri dik duh zawk a nia.

- Rochungnunga