Mizote politics

Politics hi a ṭobul, Grik mifingte lo hman dan ṭhin aṭangin rût dawn ila, chhiar ninawm mai a ni thei dawn a. Chuvangin, hun leh hmun heh lo zawngin, "Politics chu khawtlang inawpna fel tak nei tura dan siam leh chung dan zawmte chu a ni," ti ila a khaikhawm mai awm e.

Mithiam tam takin politics hi hrilhfiah ṭhin mah se, a huam zau em avangin a awmzia fûn kim thlap hrilhfiahna pakhat a awm thei lo. Chutiang politics hmanga sawrkarin inawpna dan a siamte leh a awp mihringte inlaichinna zirna chu political science kan tih hi a ni. Sawrkar hnathawh dan leh a thawktute inkhaidiat chhawn dan leh an mawhphurhna zirna chu public administration kan tih hi a lo ni leh ta zel a. Tichuan politics, political science leh public administration-te hi thil pathum, inbelhbawm tlat, 'trinity' kan tih hi a ang viau mai a, ngaihfin mai pawh a harsa vak lo a ni.

A chunga sawi ang khian politics thil tum chu ram mipuite hmasawnna leh hamṭhatna tur ngaihtuah hi a ni tih a lang mai a; chuvangin, kan ni tin nun hi politics chuan a huap zo hle. Kawngpui siam, in sak, tui lak, lo neih, petrol leh gas semte hi politics hmel lanna pawimawh ṭhenkhatte a ni ang. Inawpna dan fel tak nei lovin, dante hi zâwm lo ila kan buai nuai ang a, tu chhungkua mah kan dingchhuak lo vang. English mi political philosopher Thomas Hobbes-a ngaihdana ram hrehawm tak, State of Nature-ah chengin, a ruh no no chu kan per dârh dârh mai dawn a ni.

Mahse, vanneihthlak takin politics avang hian vawiinah chuan nun dan pangngaiin kan khawsa thei a, danin a phal ang zelin mahni hmakhua kan ûm theuh a nih hi. Chuvangin, ‘Politics hi ka tui lo, ka duh lo’ tih maite hi ngaihtuah chian loh vang a ni. Mi pangngai chin tan chuan politics hi ngaihven a, hriat ve viau a ṭul. Heta politics kan tih hi party politics, mahni hmasialna leh party âtchilhna politics hi a ni lo. Khua leh tuite rualkhai taka an hamṭhatna tur leh zalen taka an ngaihdan an sawi chhuah theihna politics leh inawpna a ni zawk.

Vawiina Mizote politics khelh dan

Kum 70 chuang zet political party hrang hrangte’n kan ramah ro an rel ve tawh. Mahse, vanduaithlak takin politics dik tak khel lovin, party politics khela mahni party mi leh sate chauh vulh lama an kal ral avangin kan politics chu ‘Induhsak bikna’ politics a ni ta ngawt mai a. Mipuiin kan ning em em a, kan sawi a, kan ziak a, kawngro a su vak ṭhin lo. Chu baka pawi lehzual chu, dâwt muhlûm hmanga mipuite bum an pawiti hauh lo kha a ni. Pawisa sem tiama sem ṭhat leh si loh te, vai buh ei tawh loh tiama ration buhfai kan thlahlel em em rengte hian kan politician-te mawng a hlim sang hle a ni. Rûlngân pa anga zara tlê kawng leh traffic jam awm lohna khawpui tihte chu ‘Khawvel ral hun atana dah’ ni âwm takin kan nghak rei ta hle mai.

Chutianga mipuite min sawp hnu chuan nikum mai khan party tuai leh tharlâm tak Zoram People's Movement chuan hneh takin sawrkarna a la a. Hetia ZPM an tlinna chhan hi tam tak awm mah se, a chhan bul ber pakhat chu–sawrkar hmasate’n an thutiam an tihhlawhtlin loh nasat em avanga mipuiin kan chhan lêtna a ni ngei ang. State pachhe ber, thawh chhuah nei mumal lo kan ni chunga inrenchem reng reng lova kan minister-te leh MLA-te an invulh nghek nghek a, an lian tual tualte kha mipuiin an hmu peih tawh lo hle a ni. Chuvang chuan ZPM hi a ṭhat leh a chhiat tur pawh hre lovin, a hmaa sawrkarna siamtu party kha an nih loh phawt chuan tiin 'risk' sang tak lain kan vâwt ta ruih ruih mai a nih kha.

Kan ti fuh dawn em?

Hei thla kua zet chu a ral ta, ZPM sawrkarna siam aṭang khan. ZPM hi an intiamna a san em avangin mipui pawhin kan beisei sang khawp mai. Thil inthlak danglam pawh kan hmu ṭan nual a, "E, kan thlang fuh dawn e" kan ti fur hman. Chutih laiin, a pir duhtu tana han pir zauh zauhna tur an awm ve tho a niang, insawifiah nan hun an hmang hnem ṭan viau. Opposition party-te hi chuan rorel lai party beih hi an tih tur, khalh ngil an tumna kawnga sawisel ngaite sawisel tur an ni. Opposition party hi khawii state leh ramah pawh party pawimawh tak, an leader-te pawh dinhmun sang taka dah an ni.

Mahse, kan rama eptu party-te hian an mawhphurhna tak hre lova rorel lai party sawisel tumna ngawr ngawr an kalpui a nih chuan politics awmzia an la hre lo kan ti thei ang. Entir nan, ration card fel lo siamṭhat tumna leh subsidised rice man ennawn mekte lo enghelh a, ‘Buhfai man an tipung’ tia a leikuai zawnga laa sawrkar lo dem hi thil hmanhmawhthlak a ni lo vang. Speaker compound-a thing kih leh a quarters siamṭhatnate kha insawisel tum hrim hrimna a niin a lang. Thing kih chungchangah khan Speaker-in thuneihna a nei lo va, thuneitu PWD leh Forest department-te chuan an chingfel mai a ni. Chutiang chu thil kal dan tur a ni ang tih suangtuah lâwk hmasa lova a leiko zawnga thil kalpui vak kha a titute tan kimkitna tham a ni ang. Bangla chei chungchang lah chu eng tehchiam a lo ni lo va. Luah tlak lo khawpa ṭawpa chhuahsan, bungraw awm tur tam tak awm lote a nih chuan tuin nge chei fai hmasa lo leh bungrua lei hmasa lova luah lut ngawt duh ang le?

Mizoram sawrkar thuchhuah 28th March 2019 leh 29th June 2024 kan en chuan, VIP-te bangla cheina tur sum an lo ruahman dîm diam tawh zawk a ni. Quarters chei thar (renovate) a ni lo vang, pawh lo ti se, siam ṭul na nâ nâ chu a pumpelh theih loh a ni mai. A rêng thuah, Mizoram sawrkar inte enkawlnaa mawhphurhna neitu (PWD)-te hi han ṭang mar deuh se a ṭha ang. Hetia Chief Minister/Speaker-te quarters thila thunawi a awm ta fo mai hi inthlahdah vang a ni thei ang. Central sawrkara an tih dan ang khuan ti se, buaina a awm lo vang. Khutah chuan quarters hi Directorate of Estates (Ministry of Urban Development) min pe a, kan luh dawna a chhunga bungraw awm zawng zawng kha stock register-ah an enfiah vek a, kan chhuahsan dawn pawhin duh hun hunah chhuahsan ngawt theih a ni lo. Tui leh power bill hnuhnung ber pekna certificate thehluh a ngai a, bungraw awm sa kan tichhia emaw, kan tibo emaw a nih chuan a man zat chhûtin min chawitir zel mai a ni. Chuvangin, Delhi-ah chuan quarters hmuh nge harsa zawk a chhuahsan, kan ti fiamthu ṭhin.

Sawrkarna fung vuantute hi tihsual palh leh tihsual luih nei thei, keimahni nungchang ang bawk pu mihring an ni. Sawisel an la kai dawn chauh pawh a ni ta ve ang. Chutih lai erawh chuan, eptu party leh mipui pawh hian party politics ze hlui deuh hmanga sawrkar beih hi sim tawh se la. ‘Dâwt hâl’ tih ang reng emaw, 'Motor thar an lei' tih emaw, 'Kawng chhe siam hnatlang' koh ngawt emaw hi rorel lai party beihna atana ṭangkaina nei hauh lo a ni. Aizawl khawii veng emawa speaker/minister-te motor hûnna thlenga party politics kan khel a nih chuan Mizote politics hian a tawng sang lo vang.

Chutih laiin, ZPM pawh hi mipui hnâwl hnu party-te ang leka an che nâwi a nih chuan mipui hi eptu party-ah kan chang vek ang a, a sawp chu nasa tak a ni dawn. Chuvangin, tuna sawrkar mek hian an intiamnate hre rengin, politics dik tak hmanga râltiang ram min kaipui tum se a lawmawm ngawt ang. 

- PC Lawmkunga, Mission Vengthlang