STA rate zawm an ni em? Counter-in 10% an la, maxicab harsatna a lian

Aizawl to Lunglei hi km. 167 vela chhût a ni a, chu chu ni 05.03.2024-a lirthei chuan man (fare) gov't. approved rate tihchhuaha tarlan danin km. khat zel Rs 3.50 (metalled road) & Rs 4.00 (unmetalled road) a nih angin Rs 584.50 (metalled road anga chhûtin 167 × 3.50) tihna a ni.

Lunglei to Aizawl Sumo side ve thung

State Transport Authority (STA) hian zero point to zero point hi khaw kâr thui zawng atan chhût nan a hmang a nih chuan, maxicab lam ve thung hi chuan khaw pahniha an counter neihna aṭanga counter an neihna inkar (counter to counter) hi kilometre (km.) teh nan an hmang lo thei lo a, an hmang mek bawk.

Heti a nih chuan Aizawl to Lunglei (counter to counter) hi km. 173 angin maxicab lam hi chuan an chhût a; 173×3.50 chu Rs 605.5 a ni a, Aizawl to Lunglei Sumo fare hi Rs 605.5 tura hisâp a ni. A man tur bituk dik tak an la a tih theih. Hei an lo kalpui dan ni mah se, tun dinhmunah sorkarin kumin September thla aṭanga diesel man a tihsan avang leh kawng a chhiat êm avangin lirthei chuan man hi an tisang ta a ni.

Fare an tihsanna Rs 700 hi km. khatah Rs. 4.04 bawr a ni a, STA rate km. khata Rs. 3.50 aia sang hret a ni tihna a nih chu.

District hqrs dangte

Aizawl to Lunglei hi maxicab fare rate dik taka tlan an ni a, tuna chuan man an tihsan chhan hi diesel man sàn vang leh kawng chhiat vang (Thenzawl to Lunglei hi unmetalled road tluk niin an sawi) niin an sawi.

Aizawl aṭanga district khawpui dangte rate kan en chuan Aizawl to Hnahthial chauh hi STA approved rate anga tlan niin an lang.

Rate ṭhenkhatte:

Hnahthial - km. 156.8; rate 3.50 = Rs 550

Siaha - km. 301.1; rate 4.31 = Rs 1,300

Lawngtlai - km. 243; rate 4.11 = Rs 1,000,

Champhai - km. 166.7; rate 4.19 = Rs 700

Khawzawl - km. 127.5; rate 4.31 = Rs 550

Kolasib - km. 77.1; rate 4.53 = Rs 350

Mamit - km. 86.9; rate 4.02 = Rs 350

Saitual - km. 70.4; rate 4.36 + Rs 300

(Kilometre hi chu teh dan a dang hret hret a, mahse danglam nasa turah ngai lo ila)

A chunga Aizawl aṭanga district khawpui hrang hrang rate khi i en chuan km. 1-ah Rs 4 an pêl sa deuh fur tawh a ni. A hrana Aizawl to Lunglei anga tihsan an ngai hmel lo, Aizawl to Champhai hi Aizawl leh Lunglei nena inkar hlat zawng inang reng a nih hmel. Anni hian maxicab chuan man Rs 700 an lo ti daih tawh thung. Heti a nih chuan sorkar hian an zavaiah hian hma a la dawn tihna a ni em?

Counter 10%

Maxicab neitute harsatna hrang hrang en hian thil tak tak, ngaihtuah ngai niin a lang. Sumo neitu leh enkawltute’n harsatna an tawh laia hlawk bera chu counter neitute an ni thei.

STA thuchhuak angin counter hian ticket pakhat zelah 10% an ei niin hriat a ni. STA phalna a nih hmel. Entirnan, Aizawl to Lawngtlai hi chuang khat vekin 10 chuang se, Rs 10,000 tur a ni a, (pakhat chuan man Rs 1,000) hetah hian counter hian STA phalna liau liauin Rs 1,000 an lo hlawh tihna. Sumo lamin an chan tak chu Rs 9,000 a ni dawn thung.

Lunglei maxicab nuar chhan

A bula bâl hre lo kan awm ṭhin a, tawngpawng nuar ngawt an nih loh kha. An fare rate an tihsan hnuah sorkar lamin chuan man thara service mêkte chu kawng lakah lo enfiahin, MVI lam hian a khalhtu driving license an lak sak a nih kha. He thil thleng avanga tlan zui ta loa hmalâk dan tur ngaihtuah zui ta hi an ni.

Tlangkawmna

Gov't approved maxicab rate hi km 1-ah metalled road-ah Rs 3.50 a ni a, metalled road lovah Rs 4.00 tih a ni. Hei hi chhût ngun ngai tak mai chu, kan kawngpui hi metalled road category-ah dah ngam a ni chiah em? Sorkar hian a ngaihtuah nawn a ngâi khawp mai. Tunah lah diesel man chu litre 1-ah Rs 8 dawn (Rs 7.56) lâiin an tipung ta bawk si. Kan kawngte hi unmetalled road category-a dah tur zawk dinhmuna ding mêk hi a tam khawp mai.

Aizawl to Lunglei chungah chauh hian eng vanga sorkar pawh hian dan hi lekkawh nge an nih ang le? Khaw kar kawng hrang hrang hi en ila, taxi, two-wheeler taxi, adt. thlengin gov't approved rate hi hmang tak tak kan awm meuh lo. District headquarters dang zawng zawngte pawh hi enfiah ve se. An duh chuan Transport bus chu tlantir vek ang hmiang! A ṭhena ni sa a, a ṭhena sur hi a dik lo. A nih loh chuan rate hi rang takin endik se la, kawngpui hi metalled road a tih ang ngeiin siam bawk se a dik ang.

(With inputs from Laltuaitea Khiangte, Lunglei Zonet JB)

~ Zoa Tlau, Buannel Cabin