Ui vulhtute fimkhur tur

Kum eng emaw ti kal ta aṭang khan ran vulhte ṭha zawka enkawl leh hmangaih chungchangah Mizo zinga mi tam tak an harh a, tunah chuan ran vulhte pawhin duat an hlawh ta hle. Mi tam tak chuan an chhungkaw member-ah an ngai a, mihring ang maia ngaite pawh an awm a ni awm e. Thil lawmawm lam a ni.

Keini pawh ui kan lo vulh ve tawh ṭhin a, kan duat ve hle. Kan ngaina a, anni pawhin min ngaina. Kan uite kha an fel a, mi an seh ngai lo a, an tina ngai lo. Mahse, mi bauh an peih em em a, kan ina rawn leng lut turte hi an hriat phawt chuan an bauh deuh zel.

Tun hnu, ui kan neih tâk loh hnu hian kan ui, zaidam kan tih leh mi tina ngai lo kan tih kha a hre ngai lote'n an hlau ṭhin kha ka hrethiam ta hle. An mizia la hre ngai lo tan chuan hlauh kha a lo awm hle a ni. Kei ngei pawh hi mi ui chu a hlau hlei hlei ka lo ni ve ta.

Ui vulhtute hian hei hi i hria ang u: Kan ui, kan duat em em, zaidam, mi seh ngai lo leh tina ngai lo hi a neitu ni lo, mi dang, a hre ngai lo tan chuan an hlauhawm tho tho tho hi.

Ui vulh kan intihhmuh zel a, pastor zingah pawh vulh an awm nual. Kohhrana kan rawngbawltu pawimawh pastor-te'n ui an vulh ve ta fur hi lawm tur nge lawm loh tur erawh ka hrethiam lo. Tun hma aṭanga tunlai thlengin pastor-te hi chu kohhran mite luh khawmna a ni a, kohhran mite tlangnel takin an lut-chhuak theihna tura ngaih a ni. Men lai chhung chuan kawngkapui pawh inkhar phui vek lo va, inhawng deuh reng tura ngaih a ni ṭhin bawk.

Pastor-te hi rawngbawltu pawimawh, Pathian thua kohhran mipui chawmtu leh kaihruaitu, kohhran mipuiin an nêl leh an harsatnate pawh an thlen ngamna ni tura ngai an ni. Mihring mizia avangin miin an nel har bikte chu awm thei teh meuh mah se, insiamṭhat theih a ni. Chumi piah lama kohhran mite'n pastor-te an hnaih theihna dâltu insiam chawpna - ui vulh hi a ṭha lo zawk em aw?

Kan pastor/minister-te zinga ui vulh/neite hian an vulh chhan hi an fate vang pawh a ni mai thei a, an fate zingah ui ngaina em em pawh an awm thei. Mahse, pastor fate hian pastor fa an nih angin tih awm leh tih awm lohte pawh an hriat a ngai ve zel; an pate rawngbawlna tiṭhuanawptu, mipuiin an tlawh hreh phahna an nih loh theih a ṭul hle.

Ui vulha duat em emtute zingah enkawl ṭha leh si lo an awm fo a, an zun leh ek thlahdahpui tak tak pawh an awm. 'Kan chhungkaw member' ti hiala ui duattute hian an chhungkaw member-te hi mi kawtahte an ektir leh hnûr ṭhin. Zun leh ek chungchangah ui vulhtute zawng zawng an fimkhur lehzual a ngai e!

- Ramngaihsanga