Mizo zinga World Cup Football khel hmasa ber Apuia Ralte leh ISL
Khawvel infiamnaa intihsiakna ngaihhlut bera sawi World Cup football-ah Mizo khel hmasa ber kan lo nei ve ta reng mai a, chu chu Tv. Lalengmawia Ralte (Apuia), Vaivakawn tlangval a ni. Apuia Ralte-in World Cup Football a khelhna hi kum naupang zawkte tana buatsaih niin, India ramin kan thlen ṭum kha a ni a, Mizo zingah Apuia chiah hi India national football team atan koh a ni.
Indian Super League football khelh mek leh khelh tawh zawng zawngah khan ISL club hrang hrang zingah Apuia hi captain ni thei naupang a ni hial awm e.
Apuia Ralte hian Northeast United FC-a a khelh lai khan captain armband hrêngin (30.11 2020), khatih lai khan kum 20 leh ni 44 mi chauh a ni.
Apuia Ralte hian ISL-ah a khelh ṭan tirh khan club lar tak pakhat Northeast United FC-ah hun rei tak a kheli a.Northeast United-ah a khelh lai hian ṭum khat chu nalh zet maiin a pet goal a, he a pet goal hi Goal of the Week hialah an thlang a nih kha. Apuia hian hun rei tak Northeast United FC-a a khelh hnuah Mumbai City FC a pan a. Mumbai City-a a khelh chhung hian ISL 2023-24 season khan Apuia hian Mumbai City hi hemi football season khelh ṭuma point hmu sang palite inkhelh kual lehnaah a champion pui a ni. Season tharah erawh chuan a club thar Mohun Bagan SG tan a khel chhunzawm thei leh thei ta hi a lawmawm tak zet a ni.
Apuia Ralte hi kum lamah chuan la naupang mah se, football khelmualah chuan pet goal emaw, a ṭhiante tan pet goal tur a siamsak pawp pawp ang chi khan beisei lo ila. A hmazawna a mawhphurhna pawimawh tak erawh chu ṭha takin a hlen chhuak ṭhin a ni.
Apuia hian ISL a khelh chhung hian chawimawina chi hrang hrang a lo dawng tawh a. A position chu midfielder a ni a, football-ah chuan khaikhawmtu pawimawh tak a ni awm e. India rama football club hlun zinga mi leh football inpui tia an sawi Kolkata-a football club Mohun Bagan SG tan a khel ṭan leh ta a ni.
Apuia Ralte hian NE United-a a khelh ṭan khan a pualin an veng mi ṭhenkhat chuan Apuia Supporters Club tih invuahin Apuia Ralte khelhna club-in football match an khelh apiang leh India ram tana a khelh apiangin Apuia te inah amah ṭawiawmna ni pah fawmin inkhel an enho ṭhin. Krismas dawn hnaiahte Apuia Supporters Club hian Apuia awmna venga khawsak harsate pualin Krismas thilpek an lo hlan tawh ṭhin bawk.
Vaivakawn Branch YMA chuan an veng tihmingṭhatute chawimawina an hlan thin, Vaivakawn Award chu kum 2022 tawp lam khan Apuia Ralte hnenah an lo hlan tawh nghe nghe.
Apuia’n tluang taka Mohun Bagan tan a khelh chhunzawm zel theih nan Apuia Supprters Club, Vaivakawn chuan duhsakna sang ber kan kan hlan a ni.
- George L Ralte, Finance Secretary, Vaivakawn Football Club