BELHCHHAH AN NGAI EM, KOHHRANA RORELTUTE HI?
'Kohhrana ro reltute' han tih hian a huap zau thei hle awm e, tun atan chauh hian, thu ziah a sei lutuk loh nan kan sâwr zîm hlek ang.
Mizoramah kohhran hrang hrang, a bikin missionary-te din kohhrante inrelbawlna hi rilruah a lo lang a, chutah pawh Upate Kohhran—Presbyters' Churches/Presbyterian Church/ Synod bul ṭhut leh ban lian ( local & branch church) ṭheuhvah hian kohhran inrelbawlnaah tute nge tel deuh ber tih chu 100% hriat theih ni lo mah se, Thlarau Thianghlim hna thawha kohhran mipuiin an thlan chhuah upaho ṭhu khawm chu 'kohhran committee' tih niin, anniho hi ro reltute chu an ni deuh berin a lang a.
Keini Presbyterian Kohhran hi ro relna inkhaidiata ro rel ṭhin kan ni a, a hnuai berah tual chhung kohhran ro relna ; hei hi mahni kohhran bil inenkawlna bakah a ram pum kohhran tana ṭha tur kohhran dan leh hrai siam kan duh changa Pastor biala rel tur (agenda) chhawp chhuah tur rel a tel. Ti chuan, Tualchhung ro relna dawtah Bial ro relna; hei hi Presbytery-in dawt lehin, Synod Inkhawmpui, General Assemby, leh a lu berah Synod Executive (SEC) ro relna a awm.
Ka rawn sawi bera chu hei hi a ni ta: Bial aṭanga a chung ber thlenga ro relnaah hian Presbyterian kohhran dang aṭanga ai awh—hun puma rawng bawltu 'Theologianan/Reverend-te leh upate l leh palai thlante ro relna a ni ber a, hei hian tun thleng hian belh chian a dawl hle mai hi Presbyterian Kohhran vanneihna a niin, Thlarau Thianghlim hna thawh a ni ngei mai.
Chuti a nih chuan, a hniam ber—a zung (root) leh bul ṭhut–tual chhung ro relna (kohhran bil ro relna)ah pawh hian Kohhran Hmeichhia, KṬP, leh Kohhran Pa valaite hi palai thlan ang zawng tal pawh hian kohhran committee te thu relnaah hian teltir ve ni ta sela (ṭhut khawm apiang ni lem lo pawhin), tuna kan tih dan ai hian a ṭha tawh zawk ang em? Sap thu fingin, "Lu pahnih chu lu pakhat ai chuan a ṭha zawk (Mi pakhat maiina ro rel/thu tih thluk ai chuan mi pahnih ro rel/thu tih thluk chu a ṭha zawk e) a lo tih angin, kohhran upa hlang (Committee bil) hian tualchhung inrelbawlnaah ro rel lova, tun aia ro reltu an ṭhathnem zawk hian kohhran mal, tual chhung inenkawlna pawh hi a fel zawk ang em tih hi ngaihtuahnaa awm thei chu a ni ta a ni; a ṭul dan azirin, a thlana thlante (kohhran committee pangngai) chauhvin thu tlukna siam thei (vote nei) ni ta se la, Presbyterian Kohhran, a tir aṭanga ro rekna fel taka tun thlenga la inkaihruai hi, ro reltu an lo tam zawk chuan tun din hmun ai hian tual chhung ro rel thu chhuak hi la ṭha leh zawkin a hma sawnthlak leh zual zawk ang em tih a ni ber mai; bialahte pawh kohhran hmeichhia, KṬP leh Kohhran Pa valai thlengin ai awh tirin ro relnaah telin vote an nei vek si a, tual chhung ro relnaah pawh hian an tel ve hi a ṭha zawk lo ang em ni le?
ṭawng thu chhe lovah, tunlai khawvel changkang tawh, mi mal, khawtlang leh ram inrelbawlna chipchiar tawh tak leh Information Technology khawvelah hian, tual chhung kohhran chu a lian emaw a te emaw, a inenkawlna chu chipchiar tak a ni zel si a, sum leh pai hman dan–thawktu chawm, biak in sak, adt thlengin; chutih laiin, Kohhran Comittee member—te hi mi thiam ber berte an nih bik loh avangin (mi thiam hlang pawh ni se, engkim hriat chu mihring tana thil theih loh a ni a), an ro relnaa puitu an awm chuan a hma sawnthlakzawk maithei; KṬP leh KPP chu thu hran lo ni ta se, Kohhran Hmeichhiate tal hi chu (chhungkua pawh hi nuho tel lo hi chuan chhungkua a nih theih loh hi màw!) telh ve ni thei se, upa leh pastor atana nem ngheh theih an nih loh lai hian thil inhmeh tak a ni zâwk ang em?
-Dr J.T.Vanlalngheta