Demat account
India ram stock market kaltlanga sum pei pungtu lian tham leh tenau deuh (investor) nih tum tan Demat account hi neih ngei ngei ngai (mandatory) a ni.
Electronics hmanga security, share, bonds, etc. te vawn leh dahṭhatna hi Demat account chu a ni. Tun hma lama Demat account hman a nih hma chuan stock exchange aṭang hian shares certificate chi hrang hrang lehkha hmang ngeia pek chhuah ṭhin a ni a, chu thil buaithlak tak chu electronic hmanga khawvel thiamna chuan a rawn thlak ta a ni. India ramah hian kum 1996 khan paper certificate vel thlak turin electronics hmangin Demat account chu siam a ni.
Demat account hian rang leh awlsam zawka sumdawnna a rawn thlak danglam bakah, share certificate bo, a lem leh paper hman ngaihna hna tam tak kha a rawn hnawt bo ta a. Stock market hnuaia sum peipunna lam thil–equity share, bond, debt security, mutual fund, government security, ETF-te kawng hmang fel tak neia chhinchhiahna a ni.
Demat Account chu eng nge?
Dematerialised account (hmanrua engmah ngai lo) hi a tawi zawngin Demat account tih a ni. Tun hmaa paper hmanga share certificate, bond, debt security, etc te stock market aṭanga pek chhuah ṭhinahte khan, khang an paper certificate zawng zawng kha paper hman ngai lo-ah chuan an chhung lut (dematerialised) vek a ngai nghal. Demat account hi electronic hmang a ni a, a nihphung chu bank passbook ang tho a ni. Chuvangin, miin Demat account a neih chuan stock market hnuaia sum peipunna lam thil bond, equity share, mutual fund, exchanged traded fund, government security, etc ahte zau taka zuan luh theihna kawng a inhawng ta a ni.
Dematerialization
Sawi tak angin stock market hun hmasa lamah khan share hi a tak takin physical form ngeia kalpui a ni a, share certificate pe chhuaka tih a ni. Hetiang a nih avang hian stock market sumdawnna kha a muangchang a, thil tih zung zung a harsa ṭhin. Hei bakah misualin certificate lem siamte an ching a, certificate hloh, tihchhiat palhte a awm ṭhin.
Heng harsatna tam takte sukiang tur leh awlsam zawka siam tur hian kum 1996 khan National Securities Depository Limited (NSDL) din a ni. NSDL chuan Demat account a siam ta a; hei hian shares certificate chu a rawn luahlan ta a ni. Certificate aiawh turin electronics thiamna hmangin share chungchang, company leh pawisa aiawh security hrang hrang chu lehkhapuan ngai tawh lo a, hetah hian vawn leh chhinchhiah fel a ni ta a ni. Hetianga thil thlak thleng a nih hlimah khan physical shares certificate neite khan electronics record lama an dah luh kha dematerialization chu a ni.
Demat account hian paper work ngai a rawn hnawt bo mai a ni lo a, share hmanga sumdawnna kawng thar a rawn siam a, awlsam leh rang zawkin thil a rawn her rem a. India ram chhunga Demat account zawng zawng hi National Securities Depository Limited (NSDL) leh Central Depository Services Limited (CDSL) hnuaia awm vek a ni.
Depository
Depository hi sorkar din pawl (organization), sum peipunna lam kawhhmuhtu leh ṭanpuitu, sum pei pungtute tana thil hriat ngai leh ṭulte leh chung sum leh pai (financial asset)-te lo vawng ṭhatu a ni. India ramah hian Demat account-te vawnhimnaa mawhphurtu pahnih–National Securities Depository Limited (NSDL) leh Central Depository Services Limited (CDSL)-te a awm.
Depository participant
Sum peipunna lama mawhphurtu depository leh sum peipungtu (investor)-te inkara ṭanpuitu leh remchang lo kawhhmuhtu an awm leh a, chungho chu depository participant (DP) an ni a, financial services industry, broker tih an ni.
Demat account hian engtin nge hna a thawh
Share market-a stock chi hrang hrang hi trading account kaltlang chauha lei leh hralh theih a ni a, trading account leh Demat account hi thil hrang thlun zawm tur a ni. Trading account aṭanga share lei kha Demat account-ah a lut zel a, chuvangin, Demat account chu trading account leh share market thlun zawmtu a ni.
* Stock exchange-ah share i lei duh a, ‘buy’ dilna i thawn kha i DP/broker-te khan stock exchange-ah an lo thawn chhawng ang.
* Stock market chuan ‘buy request’ i share lei duhnate hnenah ‘sell request’ an lo thawn ang a, chutiang thil vel lo chingfeltu ‘clearing house’ ah a lut phawt ang.
* Clearing house chuan i share lei duh zat ‘buy request’ zat kha seller demat account aṭangin a la chhuak (debit) ang a, i demat account-ah an dah lut (credit) ve thung ang. Tichuan, share chu i lei ta a, i leina sum chu i trading account aṭangin i pek a ngai.
Demat account–Features
Demat account neite’n sum peipunna lam thil leh a chhehvela chhawr ṭangkai tel theih (feature) a neih pawimawh zualte:
Share transfer: Demat account neitu hian awlsam takin share an transfer thei a, mahni viltu DP/broker-te hnenah delivering instruction slip (DIS) thawnin, anni’n an lo transfer ang.
Loan collateral: Demat account-a share i lei khawl Demat account-a dah hi bank leh financial institution-ah loan dahkham atan hman theih a ni.
Temporary freeze: Hun eng emaw ti chhung atan Demat account hi tihtawp leh hren lailawk theih a ni a; hetianga tih theih dan hi account-ah share tam tak a awmin a ni.
Quick transfer of benefit: Stock market aṭanga hlawkna hmuh–dividend, bonus, issue of share, stock split, interest, refund-te hi rang leh awlsam taka tih theih a ni.
Speed e-facility: NSDL hian i DP/broker hnenah instruction slip thawn turin a phalsak che a, hei hian thil hriat thiam tawk loh leh inhriat pawh zung zung a tiawlsa.
Demat account ṭhatna
* Chinfel a awlsam
* Sum peipunna kawngah remhriatna a pe
* A langtlangin zep a awm lo
* Paper hmanga hna thawh a tlem
* Sum peipungtu midang te nen rang takin a inbiak theih.
* Hlauhthawn tur a awm lo
* Sum peipungtu tan chona thar a ni.
Demat account hrang hrang
* Regular Demat Account: India ram chhunga chengte tan a ni a, equity trading and investment ti duh tan neih theih a ni.
* Repatriable Demat Account: Non resident Indian-te tan a ni a, Non Resident External (NRE) bank account nen thlun zawm tur a ni.
* Non-Repatriable Demat Account: Non resident Indian tan duht hlan tur dang a ni a, Non Resident Ordinary (NRO) bank account nen thlun zawm tur a ni.
Demat account hawn dan
Depository participant (DP)/broker, financial service industry tam takin an hnena Demat account online hmanga hawng tura an inzawrhna i hmu ṭhin ngei ang.
Demat account hawng turin heng hi thil ṭulte a ni:
* Proof of identity–PAN card, Aadhaar, voter ID, driving licence
* Proof of address–Passport, bank passbook
* Proof of Income–Income tax return, Salary slip
* Passport sized photo
Hetianga dilna thehluh hnu hian ni 7-14 chhunga fel theih a ni. Broker ṭhenkhat hian Demat account hawnsak man an la a; India infoline hian fee laksak loin an hawnsak thei a, annual maintenance charge erawh chawi a ngai ve ṭhin.
Source: IIFL Securities
- Huna Kawlvawm