HAN DAWN VE TEH

Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghal thei a ni. (Heb. 4:12)

Khi Pathian thu khi Zofate hian kan sawi a, kan sa a, kan hril a, kan lâmpui a, a thil tih theihna erawh chuan min hnaih leh lem lo hian ka hre ṭhin. He ram mual tin leh tlang tinah hian khi Pathian thu thil tithei khi a fawnvel a, hriat leh sawi thiam lamah pawh rual kan khûm narawh e. Chhepchher leh rimawi chi tin reng nen, zaithiam leh thiam vak lo rual thlengin Pathian fakna ri chuan; Zoram khawvel a luah khat thawthang a ni ber. Media hrang hrang a luah a, pawl hrang hrangte innghahna a ni a, party tin mai pawh hian he Pathian thu tho hi a ni an sawi.

Mahse chutiang taka thu thil tithei a fawn velna ram, Mizoram chu.... Khawvela Cancer vei nasa ber leh thihpui nasa ber hnam kan ni a, ni tin hian vei thar panga zel awm ang leh ni hnih chhunga pathum vel thi zel ang kan ni an tihna ram a ni. India rama AIDS vei nasa ber ram leh hnam kan ni a, mihring 1000 zela 24 te hi AIDS vei kan ni. India rampum chawhrual (0.23%) aia a let sawmin kan tam!

Kum tluan deuh thawa kan lockdown kumah pawh khan Hiv+ kai thar an kiam phah chuang lova; phung velh ang mai kan ni. Kan kaina tam ber lah chu mipat hmeichhiat hman khawlohna leh drugs a la ni lehnghal! Hetih lai hian AIDS awareness campaign ṭha ber lawmmante chu kan dawng lawi a! Condom leh inchiuna hriau kan sem a, thler tin leh motor-ah kan tar a, Pathian thu thiltihtheihna lam chu biak in lamah chauh kan sawi a!

Mihring tam dana chhuta Addict centre leh hnuchham in ngah ber hnam kan ni a, luahtu tur an haihchham lo vek a, la awm belh zel mah se khawvel kalphung ve rengah kan la ngai thei tho a! Sorkar meuh pawhin hetiang in hi an nei a, kan la hawn belh zel bawk a, addict-te damna nge kan vei an mahni enkawlna tur sum zawk hi tih pawh hriat a har ta!

Kan Bible chuan,

"Ka mite hliamte chu, ngaihsam takin, "A ṭha alawm, a ṭha alawm," tiin an thawi a, a ṭha hauh si lo va," (Jer 6:14) a lo ti a, chu tho chu he rama thil thleng mek hi a ni em le?

Hripui a lo leng a, India ram state dangte an buai tawh loh hnuah pawh kan la buai a, Pathian nung be ram hi mi lem pathian betute aiin kan nep zawk a; a enkawlna tur sum lo kal kan hman dan thlengin rinhlelh kan kai daih a! Covid 19 vanga thi zat 726 an ni a, a number zawnga en mai chuan tlem kan inti mai thei. U.P state-a thi nen hian khaikhin ta ila: UP-ah hian covid-19 vanga thi chu mi 26400 vel an ni a, mihring maktaduai 200 vel an awm thung a; chu mihring 1000 zela pakhat aia tam hret thi ang an ni. Mizoram ve thung chu, mi 726 an thi a, mihring nuai 12 vel kan awm a; 1000 zela 6 thi ang kan ni thung. U.P state aiin a let ruk dawnin kan thi tam zawk tihna a nih chu!

A thu awihte chunga dam reina leh ram leilung malsawmna Tiamtu be reng chung hian, a anchhia kan dawng mek zawk em tih hi ngaihtuah tham a ni. Zotuithiang dawna virthli leng fawn vel leh boruak thiang lenna rama chengte hi hriselna lamah chuan pachhe tak kan ni!

Heng zawng zawng aṭanga kan dam lehna tur chu, min zawng chhuaktu kan Pathian hnena hawikir leh hi a ni. Duhamna, itsikna, huatna, mahni hmasialna leh nawmsak kan um lutuk hi bansan ila, hawh u, inngaitlawmin kan Pathian hnenah i hawikir leh ang u.

Hei lo hi ram dang kan nei lo va, chu kan ram neihchhun leh a chhunga cheng Zofate chu kan boral mek a ni si a!

- Mr Rda