I Chiang tlang ang u

A ruka ram pum pui, chhungkaw pum pui, inneih tawh zawng zawngin an lo tawrhna hi tuar tawh lo turin rawngbawlna, thu dik thehdarhtuah kan zavaiin kan tel vek thei a ni.

Tu mah he thilah hian thu dik thehdarhtu nih hreh loh tur. Rorel fel si lovin tuarna namenlo thlentu a ni si a. Chuvangin, langtlang leh felfai takin rawngbawlna thu dik hi i hrilh darh zel ang u. Kan Pathian aia ropui engmah a awm lo tih i hria ang u. Engmah hi vanramah kan chhawm chho thei dawn si lo va. Nu leh pa kan nih angin, kan dam chhung thawh hah leh dinte hi kan fatea hlan hi khawvel kal dan a ni.

Tu fa mahin kan nu leh pate an dam chhung thawh hah leh dinte neih tumin kan vauin kan sawi ṭhaih tur a ni lo. Anmahni avangin khawvelah kan lo awm a ni. An dam chhung thawh hah leh dinteah ṭhalai puitlingin kan innghat vek tur a ni lo. Mi hrisel, thluak puitlingin nu leh pate aia lian zawk din kan tum tur a ni. Nu leh pate ta kha chu kan dah hnûmsak kha chhungkua zahawmna vawnna a ni. Taima takin fate pawhin kan thawk ang a, hei hi kan nu leh pate'n an lo din thei a nih si chuan, keini an fate, ṭhalai hrisel, thluak fim leh puitlingin a aia lian ṭha kan din ve thei tur a ni tih hi kan inzirtir tur a ni.

Nu leh pa te pawhin chumi kan pek dawn avang maiin kan fate chhungkua din tawh te, kan thuhnuaia awmtir a, an kawppui leh fanaute hmangaih pumhlum hlei thei lova rilru pumhlum pe ngam lovin kan siam tur a ni lo. Kan fate bulah an kawppuite chauh lo chu opposite sex dang tu mah biak, hnaih, inkawm kan phal tur a ni lo. Chhungkua zahawmna Nu leh Paten kan tu leh fate, kan thlahte vawnghim chho zel turin kan zirtir tur a lo ni. Kan fate nupa thu inhmuh loh chang ni pawhin (unau pianghmun pawh thu inhmuh loh ni a tam) Nu leh Paten kan fate ṭan bik loh a finthlak. Kan thupui ber tur chu nupa inhmangaih zual zel a, Pathian anga thluak hrisel induhsak tawn leh chhungkua hlawhtling an dinchhoh zel hi kan zirtir ber tur a lo ni.

*Tu Nu leh Pa mah mi hrang daih va pe turin kan mawl lo tlang a ni. Chuvangin thluak hrisel leh boruak zangkhai takin kan zavaiin khawvel hi kan lengza tur a ni. Kan fate lo, mi dang daih pek kan tum chuang lo. Puitling kumah tu mah mawl lutuk kan awm a rinawm loh, kan lo awm palh hlauh a nih leh khawvel hmaah mahni mawng kan hlim a ni mai. Mahni tu leh fate hmangaih lo chu Pathian pawhin a ngaihdam a rinawm loh.

*Keini Nu leh Pa te hian, kan fate puitling tawhte an mihring biak hi kan hriatpui tur a ni. An damchhung kawppui tur atana kan duhpui lo a nih a, kan damchhung thawh hah leh dinte kan fate enkawlpuitu tura kan duh lo a nih chuan, thil a kal thui hma, thinlung a tel hmain, a rang lama langtlang taka chhungkuain sawiho tur a ni. Chuti a nih loha engkim thinlung a tel tawh a, nu leh pain sawi kan tum chauh chuan a lo tlai tawh ṭhin. Inneih hnuah, naupang pian tawh hnua inṭhentir hi fahrah kan siam a lo ni. Pathian hmaah Nu leh pate kan fel lo, mi sual kan ni. Chhungkua hi langtlang taka an damchhung kawppui turah hian kan fate an tleirawl chhoh, nulat tlangval an rawn rah aṭangin kan duhpui zawng, an tana ṭha tur âwm mi kan kawhhmuh, kan hrilh tur a lo ni. An hmel duhzawngte damchhung kawppui atan mi rintlak an ni ang em, keini Nu leh Pate pawhin kan damchhung thawh hah leh dinte lungdam taka kan fate enkawlpuitu tur atan kan duhpui em? tihte langtlang taka sawiho hi kan Pathian duhdan a ni a. A changkangin, a puitlingin, a felfai a ni.

*Hah taka kan lo chawm len kan fate an lo puitlin hnuah, thawh chhuah te an han nei a. Engtin nge ni ang?

In leh lo awmna tur kan la nei lo a nih chuan kan fate kawppui ngaihtuahtir kha a rem rih lo.

A chhan chu inneih tawh hnuah chuan engkim hi nupa angin a kal vek tawh a, Nu leh Paten kan hriat a ṭha e. Chuvangin kan fate sum leh pai, an thawhchhuah aṭanga ram, in saktir, dintir, chhungkua thil buaipui tur a awm a nih chuan kawppui neih, inneih lam kan sawipui kha a rem rih lo. Kan zavaiin i fimkhur tlang ang u.

*Kan fate hi i duat lo vang u, hmangaihnain i kaihruai zawk ang u.

√ Taimakna

√ Pathian anga thluak hrisel

√ Finna dik tak

Hengte hmangin Nu leh Pate hian kan fanu te, kan fapa te hi an lo puitlinga anmahni kea ding thei turin, mi nupui, mi pasal kawpa pawisa etc nawm tum lo va, mi chhungkua din it lo turin i kaihruai tha ang u.

*Fanaute hi Pathian aṭanga kan rohlu an ni. Nu leh Pa nih hi mawhphurhna ropui ber a ni. Mawhphurhna kan la peih dawn lo a nih chuan kawppui, inneih loh mai tur. Ngaihzawng pawh nei loh mai a ṭha. Mi fanu, mi fapa va biak den dun a, a tak thlenpui leh si loh hi hmelma kan insiam tam mai a lo ni. Khawvelah hian opposite sex pakhat chauh kan mamawh, chhungkua dinpui turin. Mi fanu, mi fapa hmanlai taka biak kual den dun a, a tawpah ṭha ber tur awm ang thlan tum kha chu hmelma ngahna mai a ni e. A hla aṭangin ṭha kan tih zawng kha a chanchin kan hriat duh zawng zawngte a zir theih vek a ni. Chumi kan chian fel hnuah be kual den dun lovin, pakhat chauha kan bur chat kha a zahawmin, hmelma pawh neih a har.

A tawp berah chuan Nu leh Pa kan nih angin kan kawppuite hi kan engkim ni reng se la, thu inhmuh loh chang ni pawhin hmangaihna leh Pathian kan zahnain min tuam khawm reng se la. Kan duhsakna zawng zawng, Pathian anga thluak hrisel inhlan tawn reng ila. Amah kan Pathian chungnung ber hi finna dik tak dil belh zel ila, he Khawvel hi lei vanram (Heaven on earth) a ni reng dawn a ni.

Lei vanram (Heaven on earth) i ta a ni.

- Dr Olivia Lalmuanzuali