Tuialhthei Man Hi
Tunhnaiah sorkarin tuialhthei man aṭanga chhiah lak a rawn tipung a, a tihpunna hi litre khat zelah Rs 5 a ni. Tuialhthei man tih pun chungchangah hian ngaihdan a phir viau mai, a thlawp pawlin chhiah pung hi a chhawrtu tur chu mipui tho kan ni tia an sawi rualin, a duhlo lam pawl thawm erawh a ring hle. Lirthei hmanga eizawngtute Mizoram Commercial Vehicle Union phei chuan Oct 14 aṭangin tiam chin awm loa dinah vauin sorkar an nawr mek a, an nawrh chhanah hian tuialhthei man tihpun bakah kawng chhia a tel bawk.
Tuialhthei man tihsang anih hnuah hian state dang rate aiin a sang fal bik pawh a ni lo a, state ṭhenkhat aia phei chuan a hniam zawk mah a ni. Sorkar pawh chak tak hna thawk tur chuan a hmasa berah sum an mamawh a, sorkar laipui lam aṭanga fund lo kal mai bakah tualchhung chhiah a tam hi hmasawnna hna thawh nana thil pawimawh tak a ni tel. Sawi tak ang khan mipui chhiah chawi a tam hian, mipui tho hi a hlawkna tel tur tur chu kan nih tho avangin a pawng a taka chhiah lak hi dodal ngawt pawh a fuh ber awm lo e.
Tun hnaiah petrol/diesel inchuhna a nasa, zan khaw tai rek thleng thlenga petrol lak tum inthlar hmuh tur a awm reng. Tuna mipuiin harsatna kan tawh mek, petrol/diesel vang chhan hi tuialhthei man tihpun leh kawng chhia vang aiin Commercial Vehicle Union-in nawrh an tum vang a nih hmel mah mah. Vai truck hire-in Guwahati aṭanga bungraw lalutin kum 30 chuang kan lo sumdawng ve tawh a, phurh man san chhan hi diesel man ai mahin kawng chhiat vang hi a ni deuh tlangpui ṭhin. Lirtheia eizawngtute hi rate diktak ang hian tlan ta se, litre khatah Rs 5 zelin hman man hi lo tipung ve ta pawh nise, motor tuna kan chawi ṭhin ang ai hian kan chawi tlem zawk mai lo maw? tihte hi ngaihtuahnaah a awm tel ve tho mai.
Chutih rualin kum dang ai mahin kuminah ruah tui a tam a, kan kawng dinhmun a ṭhat loh em em laia tuialhthei man tihsan hi a fuh ber lo maithei. Sorkar in kan inkalpawhna kawng zawng zawngte duhthusama a siam ṭhat hnuah te tuialhthei man tihpun nita se mipui phun ri hi a zia deuh a rinawm. Sorkar pawhin tuialhthei man san a ṭul chhanah hian mipui rilru inbuatsaih theihnan zirtirna mumal takte nei hmasak a finthlak ang. Kan kawngte pawh hi vawi khat siam mai duhtawk loa enkawl zui kawngah pawh sorkar hian ṭan la reng thei se, petrol/diesel mana sum sen pawh hi mipuiin na kan tih loh a rinawm.
- Manuni