Hming Dik lo/Siam Ṭhat Tam Lutuk Hi Eng Vang Nge?

Mizote hi hming phuah chungchangah hian hmanlai aṭanga eng hmingchawi emawa phuah ching kan nih hmel a. Kan pi leh pu te pawh khan 'Lo' an neihna lamah, buh thar tam hmalsawmna an dawn avang te leh, thil hrang hrang avangin an fate hmingah an chawitir ṭhin a ni a. Tunlaiah pawh eng hming chawi emawa hming phuah a la tam ang. Amaherawhchu hming chhiar leh lam harsa tak kha a awm lovin a lang.

Kan thupuiah lut ila, Vanglaini chanchinbu kan chhiar chuan, ni tin deuhthaw HSLC leh HSSLC-ah hming ziah dan dik loh avanga HMINGTHLAKNA/CHANGE OF NAME tih a lo intlar tuar mai hian ngaihtuahna tam tak min neihtir a. HSLC exam tur hian a tlangpuiin kum 14–18 velte pawh an awm ang, mahni hming ziak dik lo rual hi an ni tawhin a rinawm loh a. Hei hi eng vanga hmingthlakna/change of name chhuah ngai hi tam ta viau nge tih hi chhui chian a ṭha viauin a rinawm. Hnam hming belh leh paih erawh thuhran ni se.

Entirna tlem te han siam ila : HSLC exam form an fill up naah Lalmuanawma, Malsawmtluanga, Zothanpuii, Ngurthanpuii tih hi Mizo tan chuan hming tlanglawn a ni. Amaherawhchu, an HSLC/HSSLC Marksheet leh Certificate a lo chhuak ta a, Lalmunanawma, Malsaamtlunga, Zothanpuai, Ngurthuanpuiai tih tein a lo chhuak ta ni awm tak a ni (chanchinbua kan hmuh ṭhin angin), hei hi office lama lo buaipuitute fimkhur loh vang a ni thei ang em? Mizo hming tlanglawn hre lo khawpa Mizo ṭawng thiam lo nge, computer-a Mizo ṭawng chhu thiam fum fe lo an ni zawk le? Mi tam tak buaina a thleng reng mai hi Thawktute pawh an fimkhur a ṭha viau lo maw? tih hi! Vanglaini chanchinbu lo chhiar chhuak ṭhin te tan chuan a ngaih-mawhawm hle mai!

Hetiang siam ṭha leh tur hian Affidavit te siam a ngai leh a, pawisa, hun leh tha senna tam tak a awm a ni. Chhungkaw dinhmun inang lo tak tak kan ni a, ṭhenkhat tan Affidavit siamna man kha awlsam taka neih theih a nih laiin, chhungkaw ṭhenkhat tan buaina tham a ni. Chuvang chuan a thawktute pawh theihtawpa fimkhur turin ka'n ngen nghal a ni e.

- Lalsiamengi