Champhai running track a dik lo maw?
Vanglaini chanchinbu September 27, Zirtawpni chhuaka Mizoram Open Athletics Meet 2024 chungchang ka lo chhiar a, Mizoram Athletic Association-in hlawhtling taka Mizoram Open Athletics Meet vawi 31 an buatsaih kha lawmawm ka ti hle.
Chutihrualin ngaihtuahna ti thui deuhtu a awm a, chu chu 'tehna dik lo' chungchang kha a ni. December 2018 daih tawha 5000m-a record awm tawh chu Champhaia running track sei zawng dik lo vangin pawm a ni lo, sawizui a hlawh lo khan mak ka ti hle.
Vanglainiah chuan, "Tehna dik lo? 1500m hmeichhe inelnaah H. Ngohlaso chu 22:03:86 mins-ah a tlan thleng a, gold medal a la. He inelnaa record awm sa chu Lalhmingsangi siam a ni a, December 2018 khan Champhaia running track-ah 5000m hi 21.11.07 min-ah a tlan thleng.
Mizoram Athletic Association-in Champhaia running track sei zawng hi a teh tawh a, a tling lo tih a hre chhuak. Hei vang hian Lalhmingsangi record siam hi pawm a ni ta lo a, H. Ngohlaso-i'n record thar a siamah ngaih a ni hman. Mahse, record hlui hai let a ni a, kum 2005 khan Zodinsangi'n Ramhlun Sports Complex-ah 1500m hi 22.00.08 min-ah a tlan thleng a, hei hi record-ah pawm a ni ta zawk," tiin a inziak.
Champhaia running track sei zawng dik lo hi a pawi ka ti takzet. Lalhmingsangi thawhrimna zawng zawng a thlawn a, chu aia pawi zawk chu sum ṭhahnem tak senna running track hman tlak loa a awm hi a ni.
DIPR website November 27, 2017-a tarchhuahah chuan Champhai Zotlang Sports Stadium chu Ministry of Urban Development ṭanpuina sum, Development for 10% Lumpsum Grant for North Eastern Region aṭanga sum hmuh, Rs.2238.69 lakh senga sak a nih thu a inziak.
Hetiang zat tehmeuh sum sen hnua running track dik lova an siam chhuak hian rilru a ti na hle. A mawhphurhtu ber chu a siamtu a ni a, chutihrualin Mizoram Athletic Association pawhin a hun laiin an enpui lo emaw ni chu aw, tiin a ngaihtuah theih bawk.
DIPR website-a chhiar zel chuan football ground zau zawng pawh a inziak a; football ground a dung metre 100 leh avang metre 60 a zau tiin a ziak. Hei hi a dik a nih chuan international match khelhna atan tling chiah lo mah se a zau zawng hi a te chhe lo.
Mahse, khawtual mite chuan 9v9 khelh nan a tawk chauh a, Zotlang hovin practice nan an hmang ṭhin. Inelna lian phei chu Chhangphut field-ah zel an khel an ti a, rilru natna a belhchhah. Running track chauh ni lovin football pitch zauh zawng pawh a dik chuang lo.
Tihian ka ngaihtuah ta a, thil kal tawh chu kal tawh ni ta se. Sawrkar hian hmachhawp lian tham a neih reng reng hian a ṭha law lawa siam theih loh pawhin la chei ṭhat leh theih tura siam ni mai se. Siam puitlin ve titang si, ṭha tluan tling bawk si lo a nih hian Mizo mipui bawkin kan tuar. Hei vang hian a pawi thui hmaa a kaihhnawih 'association' ten an ngaihven hi a ṭul takzet a ni.
- Lalzaidama