PWD Chief Engineer kha
'Revd Chuauṭhuama Huang' April 11, 2015 chhuak Brig. T.Sailo chanchin entawn tlak a nihna te, mahni infak tel zauha ngaihnawm taka a rawn ziaha a thu zeh tel PWD Chief Engineer chungchang kha (a hma pawh khan a rawn ziak lang tawh a) "Kristian in inti si a, Kristian ni ve lote aia in danglamna ka hmu lo," a ti a. Chu chu PWD Officer-te khan an haw ta em em mai a ni. Col. Sachder-a kha Mizoram aṭanga a rang thei ang bera pet chhuah an duh thu chanchinbuah an chhuah a nih kha, Mizoramah a awm rei ta lo reng a ni," tiin.
Khami hun laia PWD Chief Engineer kha Col. Sachder-a ni loin Maj. Sachdera (Hindi-a hming sign ṭhin kha) a ni a. Amah rawn thlaktu kha Col. Man Singh a ni. Khang lai khan PWD, PHE, P&E te Department khat vek an la ni. PWD Officer-ten an huat em em chhan a sawi hi a ni ber lo tih han sawi ve hlek ila. Brig. T.Sailo leh mahni infak hlak duh avanga midang hmaimawk theihna thailan kher hi a Puithiam zia lo deuh em aw ka ti.
Kha Chief Engineer kha a chet dan a maksak a, Office staff (clerk) te cushion (ṭhutphah) ṭhut phal loin a khàwm vek a (eng atan nge a hman?), nilengin mawng thip vekin an office ṭhin. Officers (SDO) te Sawrkarin a phalsak ang motor pawh hman phal loin Zuangtui kudam bulah eng emaw zat a dah chhia a. Japan hloten a bawm lek luk a ni. In renchemnaa ngaiin Sawrkar bungrua eng emaw zat a tichhia a ni. Tin, Labour zing lam roll call-naah te kalin, tham lo takin SDO leh Supervising staff te din tlar tirin, tiangin an dulah te a hawlh nawk nawk a, mipui hmuhah officer-te zahthlak takin a siam ṭhin a ni.
Tin, officer transfer and posting hi Secretary rawtnain Ministry kaltlanga Lt. Governor remtihnaa order siam tur a nih laiin, ama thua transfer and posting order siamin Mechanical Engineer te Civil post-ah, Civil Engineer-te Mechanical post-ah a sawn kual a. A chunga mi PWD Secretary, IAS Officer Pu Batnagar pawh engah mah ngai loin a sapatal a ni ber a ('Bloody IAS' a ti vel), 'Bloody' tih ṭawngkam hi a uar hle. Heng lo pawh hi sawi tur tam tak a awm.
Khatiang a nih avang khan Mizoram PWD kalphung leh inenkawlna a tihchihat nasat hmaa sawn chhuah mai kha, khatih laia Association intelkhawm Federation of Mizoram Enginee-ring Service Association (FAMESA) chuan a ṭhain a hria a, sawrkarah thawnkir (repatriate) turin a thlen mai zawk a ni e.