Vairengte nge nge, a hun takah an che

Vai hovin min zuamin nasa takin Zophaiah khan min tibuai tawh a. Chumi hnuah Thinghlunah phei chuan Mizo pa thlam an tihchhiat hnuah an halsak ngam a, min tham lo salh salh hle. Mizo Pa thlam haltupa ber Assam lama an DC lah hi a hal hnu lawk hian Kanhmunah lo kalin Mamit DC nen an inbia an la ti lehzel a, Mizoram sorkar hi an hlau chhe te lo Assam ho hian. 

An la duhtawk mai lo- Saihapui V ah chuan Mizoram Police mit hmuh lai ngeiin Assam ho bawk chuan Village Task Force ho duty post chu chhun en laiin an rawn ṭhiat ta chat mai. Assam hian Congress leh MNF tih lam an hre lo; an rawn hlau lo fai vek a ni. 

Zophai, Thinghlun leh Saihapui V lama Vaiin hnehna an chan hnuah Vairengte lam thleng thlengin an rawn zuam a, heta an tihbuai hi Police duty zuk han nia mawle! Lailapur Vaihoin Vairengtea police duty te chu lungin an vawm ngam hial a, hei hian kan sorkarin a Police te a enkawl dan a tichiang hle a ni. 

Mahse Vaiho hian ngam loh chalah chil an hnawm tih reng an inhre si lo. Police te hi Vairengtea duty an ni. Thil thleng hi Vairengte tlangval hovin an hre chiang chu an in au khawm nghal a, an inau khawm lai pawh ngaihthlak theihin Whatsapp lamah a awm. Ramriah vai hovin min beih avangin Vairengte mipa zawng chhuah khawm tur tih a ni tawp mai. 

MNF zawng tih a ni lo, Congress leh ZPM zawng pawh ni lovin neutral leh neutral lote leh sorkar hnathawk nen, Vairengte mipa an nih chuan ramri hum turin an chhuak a ni, an va fakawm em ve le. 

Vairengte 'mipa' chuan an tih tur an hre nghal mai a, "Kan sorkar chak tak," tih lam a ni lo. Police silai nei ṭha an nghak ve lo a, huaisen takin Lailapur mipui awmna lam an pan a, an tih tur an ti ta hmiah hmiah mai a ni. 

Vairengte mipa te chuan a ṭul chu an vawm a, a ṭul chu an su a, a ṭul chu an hal a ni ta ber mai ang chu, Lailapur lam chu an bet rawk rawk mai a ni. Vairengte mipa hian mark 100-ah 200 an hmu a ni! 

Vairengte mipa rualin an tih tur an tih fel tawh hnua kan sorkar aṭanga MLA leh Minister tih velin tlai khaw hnua lo thleng police ho bula thla an la a, lukhumparh khuma an han meng rum thar leh hnuhnawh a, social media-a an kid-te an theh darh tir vel ang hi chu ramri buaina kaihhnawiha politics lama hming ṭhat tumna mai a ni . Vairengte mipui zah vang tal pawhin a phaw vuak ringawtah buai tawh loin thla te hi la lo ngam se a ṭha ang.