PWD Minister a va che har ve

Aizawl khawpui kawng chhe lutuk kan sawi a, MNYF chuan kawng siamin an hnatlang a, mahse, ruah a sur leh avangin awmzia erawh a nei vak lo. Kan mamawh lakna ber leh kan lifeline tak meuh chhe lutuk pawh a inhmakhua theih a, mahse, inhmakhua a awm si lo a, kan tuar ta tlawh tlawk mai a nih hi.

Kan lifeline ber kawng a chhiat avangin truck neitute'n an tuar em em a, an motor chhe siamna ringawt pawh a hautak viau ang. Chuti chung chuan an sum hmuhna piah lamah, mipui hmakhaw ngaiin theihtawp an chhuah ve tak meuh meuh a, an fakawm khawp mai.

ZPM a sorkar a, Chief Minister ber sum duh a ni lo ang a, kan ramin a ṭhatpui ngei ang kan ti a. Pu Duhoma pawh corrupt lo turah kan ngai a, kan ngaih ang a ni chho zel chuan a lang. Chutiang bawkin minister huamhap lutuk an awm lo niin a lang a, a lawmawm khawp mai.

Chutih rual chuan, kan minister ṭhenkhat hi chuan an hna an tlin lo tak meuh. Silchar kawng leh kawng dang dang chu thu hran ni se, Aizawl khawpui kawng ti em ema chhia min pe rei lutuk hi chu a mak a ni. A mak mai a ni lo, a thinrimthlak tak meuh tawh.

PWD Minister Pu Vanlalhlana hi pa ṭha leh viak ṭha tak, nelawm tak a nih rualin, a hna a tlin mawlh lo a ni. Heti em ema khawpui chhung kawng chhiaa a dah thei hi. Hman deuh khan khawpui chhung kawng siamna tur sum a awm thu a sawi a, mahse, chu sum chu khaw nge a awm? A awm a nih chuan ruah a sur bur bur pawh a ni tawh si lo a, engati nge ti em ema kawng chhiaa min la tlantir ni?

Ruah a sur lai pawh khan Bawngkawn kawng chhe lutuk chu BRTF-in lung an phah a, an chil mâm leh mai a, tun thlengin tlan a nawm viau si hi maw le.

Aizawl khawpui kawng khuar nasa lutuk pawh ruahsur lai pawhin lung hnawh ve mai se, chil mâm leh se, ti em em hian kal a hrehawm lo ang.

Chuvangin, PWD Minister hi thlak a, hnathawk theite'n enkawl se hetiang em emin mipui kan phun lo ang. Ngaihthah lutuk vangin hetiang hian kum kan tluan dawn chu a nih hmel a, a enkawltu hi thlak a ngai a ni. A hna a zo lo hulhual a nih hi.

ZPM sorkar hi hna an la thawk lo deuh a, hnathawhna hun pawh an la nei meuh lo. Mipui hian kan hrethiam thui khawp mai. Mahse ar hmai tiat lek kan kawngpui chhe lutuk erawh hi chu kan hrethiam ngang lo a ni e.

- Melissa Pa