MPSC leh sorkar hna lak chungchang

Sorkar hmasa MNF sorkar laia din MSSSB chu ZPM sorkar thar hnuaiah February 29, 2024 khan ṭhiah a ni a; ṭhalai hna zawng tam tak chuan MSSSB ṭhiah a ni kha an ui hle niin a lang. Tunah chuan sorkar a lo inthlak ta a, MPSC lamin exam zawng zawng deuh thaw an han conduct ta a; thawktute pawh an buai hle ang tih a chiang reng mai. An hna lo lák tawhnaah theihtawp an chhuah ṭhin a, fair taka an lo kalpui tawh ṭhinnaah fak an phu a, theihtawp han chhuah chhunzawm zel teh se.

Amaherawhchu, tun hnai bikah MPSC hian exam question an siam (set) dànah hian tih dik tawk loh, option-ah answer dik pawh awm lo ang chi, internet kawng sir vela an question hmuh remchàn ang ang an copy/paste mâwl tawp zel emaw tih mai tur hi hmuh tur a awm ta zeuh zeuh mai. MPSC hnuaia exam ṭhin ṭhalaite chuan question dik lo laite hi an hre chiang hle a ni. Question set-tute hi mihring ve tho an ni tih chu kan hai hauh lo, thil tisual palh thei vek kan ni. Amaherawhchu, group B chin, pay level 6/7 la pha chin tur exam question tal hi chu uluk lehzuala ennawn ṭhin tawh ni se. Tin, exam syllabus pawh chiang leh felfai taka chhawpchhuah ṭhin ni zel thei se a lawmawm khawp ang. Kan ṭhangtharte hi an fingin an inchhiar zau tawh si a, bum mai mai theih an ni tawh lo. Chuvangin, MPSC lam pawh an ṭan thar a ngai hle awm e.

Kumin chhûngah leh tun hnaiah ringawt pawh hna lak chungchangah sawisel tur a awm ta fo mai. Thla hmasaa Commerce & Industries Department (Commerce Wing)-a assistant marketing inspector pakhat lak tur, exam buatsaih tawh leh interview tura kohte’n interview-na hmun tur an thlen vek tawh hnua hna lakna sût (cancel) a nite kha a mak hle; a tuartu (aspirant)-te tan khan a rilru natthlak hle ang tih a hriat theih. Tin, forester physical test neih vek tawh hnuah, a la tlan ve hman lote tan khan hun an hawn belh leh bawk a nih kha. A fair chiah em?

Chu mai bakah, Home Department hnuaia assistant sub-inspector (ministerial) an lak thar turte pawh measurement tih fel vek tawh hnuah a la ti hman lote tan ni khat mai pawh ni lo, ni hnih dang (September 19 & 20) hun an hawn belh a ni. Candidate 5,230 an awm a, post 20 ruak hnawhkhat tham chu an awm dawn the meuh mai. Eng vanga measurement tih hun pawhsei belh nge an ni tih hi ngaihtuah tham tak a ni.

September 30, 2024 khan notification lo chhuakah ASI (ministerial) tho, physical standard test (PST) paltlang tawhte tan physical efficiency test (PET) October 1-4, 2024 chhûnga neih tur a tihfel vek tawh, an criteria duan sa minimum standard requirment metre 100 tlan thlen hun tur second 14.5 chu second 15-ah an pawtsei a, metre 1,000 tlan thlen hun tur minute 4:32 chu minite 5:00-ah an pawtsei leh bawk! He hna laknaa tlan tlin ngei tum ṭhalai, fit ṭha tak tak leh exercise laa mi dangte aia theihtawp lo chhuah tawhte tan khan hetia last minute-a tlàn thlen theih hun an han pawtsei ta thut mai han hriat hi a rilru natthlak hle ang. A chhan chu exercise la ṭha peih vak lote tan khan tlân tlinna chance a sang ta em em mai a ni. He thil hi an duhsak zawngte tihtlin an tumna (nepotism) rawng a kai thei ang em tih ngaihtuah tham tak a ni.

Kan Home Minister-in Mizoram Police-te fitness-ah ṭan an lak thar tur thu tun hnaiah a sawi fo mai a. An hna laknaah hian bul ṭan se, mi nazawng (exercise la ṭha peih lo ho) tlin theih loh tur khawpa harsate pawhin criteria hi duan ni ta se a fuh viau mai lo ang maw?

Tun hma aṭang tawhin Mizoram Police constable/IR etc. hna laknaah hian duhsak zawngte thun (nepotism) hi kan hre lâr tawh ṭhin a. Kum 2017-a constable lâk rûnpuiah pawh khan an lâk zinga mi pathum vel chu training chhuak thei lo khawpa buaipui ngai (ruihhlo ti) an awm thu trainee zinga miin min hrilh. Kan sorkar thar (ZPM) hnuaiah hi chuan fair tak leh strict taka lâk ni thei se, written exam mai bakah, physical fitness-ah pawh mi nawlpui aia thei ho ṭhah lâk ni thei se he ram hian hma a sawnpui ngeiin a rinawm.

- Muanpuia Vanchhong