Democracy hi Tyranny of the Majority a ni chiah em?

Vanglaini August 28, 2024 article thupui, ‘Tyranny of the Majority’ leh ‘Tyranny of the Minority’ ka lo chhiar a. Democracy hi mipui tam zawkte’n an duh dana râwvâ taka ro an rel theihna hmanrua (tyranny of the majority) a nih theih dan kha ennawn deuh ngai niin a lang. Democracy hi ‘Eptu pawl (opposition party)-te rawtna leh duh dan hnâwl hrim hrim tumna’ rorel khawl kalphung ang maia sawina kha hrilhfiah deuh ngai niin a lang bawk.

Democracy hi a tam zawkte’n râwvâ taka ro an relna hmun (tyranny of the majority) a ni vek kher lo. Democracy-ah hian a tam zawkte rorel danah awm mah ila eptu pawl (opposition party)-te rawtna leh duh dan hnâwl hrim hrim tumna hi tih dan phung nghet (system) a ni lo. Eptu pawlte rawtna leh duh dan hnâwl hrim hrim tumna rilru hi chu party hruaitu leh party inrêlbâwl dan leh thil tum (party ideology)-ah a innghat zawk a, democracy kalphung nghet erawh a ni lo.

Greek mifing hmasa Socrates, Plato leh Aristotle ten democracy an duh loh chhan an sawinaah, mi thiam ber berte chauhin rorel se la, dan ṭha ber ber, kalphung ṭha ber ber siam se an duh lai khan ‘mi thiam leh fing’ tlemtête sual (tyranny) theihna kha a inhawng zau hle. Democracy duh lote’n an tlangaupui lar tak pakhat chu – kan fate zirtirtu atan mi thiam ber leh sikul ṭha ber kan duh a; kan zin dawnin motor ṭha ber leh a khalhtu thiam ber berte khalhah chuan kan duh a; kan dam lohna enkawl turin doctor thiam ber ber leh ṭha chungchuang bikte enkawl kan duh bawk. Chuti chung si chuan mihringte enkawla ram rorelna fawng chelh tur chuan kan duhtui lo a, mi zawng zawng, a phûr leh tui chilh apiangte rorel theihna democracy kan duh lawi si. Hei hi a chhan ber chu zalenna kan duh vang a ni. Doctor chuan a duh danin damlo a enkawl a, zirtirtu pawhin a duh danin zirlai a enkawl a, driver pawhin a duh danin motor a khalh ṭhin. Mi dang ngaidan leh duh dan an ngai pawimawh vek kher lo. Nimahsela, ram rorelnaah chuan mi pakhat emaw, mi tlemte emaw duh dan (tyranny) kha kan duh loh avangin mipui tam zawkte duh dana kal ṭha kan ti a; chu mai ni loin, mipui tam zawkte duh dan pawh chu sawisel theih a la nih leh zelna kalphung hi ṭha kan lo ti ta zawk a ni. Hei hi râwng taka rorelna tih nen chuan a inpersan hle.

Chuvangin, mi thiam hmasate’n democracy an dodal lai khan Pericles chuan, “Mi tlemtê chauhin ruahmanna ṭha tak an duang chhuak thei a ni mahna, amaherawhchu, kan za hian sawisel theihna kan nei a ni,” a tih kha democracy lairil ber chu a ni zawk. Chu chuan eptu pawlte pawimawhzia leh an tel loa democracy kokim lohzia a tarlang chiang em em zawk a ni. Eptu pawlte hnathawh hi a pawimawh em avangin ‘private member bill’ tih te, ‘private member resolution’ tihte hi democracy rorel khawlah chuan an pawimawh hle nghe nghe.

Democracy hi eptu pawlte rawtna leh duh dan hnâwl hrim hrim tumna a ni lo tih a lanna dang awm leh chu inthlan hi a ni. Democracy-ah chuan inthlanna mumal tak neih a ni ṭhin a, inthlan hmain party hruaitute’n an party inrelbawl dan leh thil tum (party ideology/policy) an zuar ṭhin. Heng an thil zawrhte hmang hian mipuite’n ngaihdan kan siam a, kan ngaihdan chu vote hmangin kan lan chhuahtir ṭhin. Hre sa, hmu sa, chhût lawk sa vek kan nih tawh avangin a tam zawkte’n râwng tak (tyranny)-in min kaihruai kan tih leh si chuan kan thil chhut ril lohzia leh kan ngaihtuah tawizia kan tilang lek fang chauh a ni ang.

Tun hma chuan ‘Tuin nge ro rel ang?’ tih zawhna hi ‘Lalte’n ro an rel ang’ tiin kan chhang ṭhin. Amaherawhchu, Jean-Jacques Rousseau lo lan hnu chuan ngaihdan thar a rawn siam a, ani chuan, ‘Lal ni lo, lal leh a ṭhuihhruaite pawh ni lo, general will-in ro a rel ang’ tiin ngaihdan thar a rawn siam a. Rousseau general will awmzia chu - ram mipui zawng zawngte’n rem an tih tlanna thu pakhat emaw, ngaihdan pakhat emaw a lal ber ang a, chumi behchhan chuan dan kan siam ang a, chu ngaihdan chu a thu ber leh lal ber a ni tur a ni. Entirna’n, kawng ṭha duh kan tam ber a nih chuan chumi ngaihdan chu a lal ber ang a, kan dan siam leh rorel danah pawh kawng ṭha neih dan a lal ber tur a ni. He ngaihdan hi tyranny ni loin, mi zawng zawngin zalenna a taka kan hman theih dan niin a lang. Hemi a nih avang chiah hian democracy ramah chuan ‘private member bill’ emaw ‘private member resolution’ kha eptu pawl lam aṭanga lo chhuak a nih a, chu thu chu mi zawng zawng huap zo emaw, mi zawng zawng tan thil ṭha a nih chuan kha thu kha a lal lohna tur a awm chuang lo. Kan ram hi politika ṭhanharhna kan la neih tlem deuh avangin ram dang kan phak lohna a la nasa hle. Nimahsela, ram hmasawn leh changkang Europe-te angah chuan eptu pawl private member bill emaw private member resolution ngaih pawimawh chang a awm fo tawh nghe nghe awm e.

Heng zawng zawng hnuah pawh democracy hi la kalsual thei a nih cheu avangin a venna tur hmanrua (mechanism) a awm leh zel a; chu chu ‘check and balance’ tiin an sawi ṭhin. Thlan lal (legislature)-te hian an duh ang ngau ngauin thuneihna pumhlûm an nei bik lo a, an dan siamte a taka kalpuitu (executive) leh thubuai remtu pawl (judiciary)-te nen indawr tawn leh innghêng tawn rengin ro an rel za a. Khawi mah hian râwng takin lal an hrawt thei lo. Entirna’n, thlan lalte dan siam chungchangah mi tu emaw thubuai remtu pawl (judiciary) lakah a zualko a nih a, judiciary lamin dan siam chu ram mipui tan emaw, danpui kalh a tih chuan legislature-te kal vung tur ven theihna thuneihna a nei ve tho a ni. Aadhaar card neih chungchangah pawh Supreme Court inrawlhin, Aadhaar card neih ngei ngei a ngai lo tiin ro a lo rel tawh a nih kha. Hetiang deuh hian sawrkar hmanrua (legislative, executive & judiciary)-te hi an inveng tawn a, kalsual theihna leh thuneihna hmansual theihna kawngah inpuibawm tawnin an inveng tlang vek zawk a ni. Hei vang hian kan mi thlan lalte hian thuneihna pumhlûm neiin râwng takin ro an rel thei lo a, majority of the tyranny tih hi chu ngaihdan pakhat (concept emaw theory) ve mai chauh a ni.

- Engkima Chawngthu, Chhiahtlang