LEHKHABU PAHNIH

Kar kal ta Ningani khan CMS Picnic Spot, Dawngzawlah SEDAL Foundation Day kan hmang a. Kan President Pu Hmaa, kum 70 ral kai tawh leh Pu Khama, kum 69 val te an han inphelh sek a, tui an han cheng vel chu a hmuhnawm dangdai khawp mai. 

Hemi ni hian lehkhabu pahnih, hawi zawng inang lo zet mai kan tlangzarh nghal a, a ziaktute hi SEDAL member ve ve an ni. Lehkhabu pakhat zawk chu Pu F Khamliana ziah, ‘Khawvel Sanapui’ tih a ni hem mai a. Pakhat erawh chu Rempuia R Lutmang ziah, ‘Zo ṭawng thunawi’ tih a ni thung a, lehkhabu rotling, chhiar manhla tak ve ve a ni. 

‘Khawvel Sanapui’ tihah hian a ziaktu hian Israel fate kaltlanga Pathian chatuan remruat lo thlen chhoh dan leh, a lo la then zel dan tur te ngaihnawm takin a ziak a. Pathian hnam thlan Israel te nun aṭanga a tha lama entawn tur tam tak kan neih te a tar lang bawk a. Pathian hnam thlan Israel te an hnam thuthlunga an nghehzia te, kum sanghnih dawn khawvel hmun hrang hranga an darh chung pawha an hnam ziarang (culture), an ṭawng leh identity an humhalh tlat dan te, hnam rilru an put lenzia leh hnama an chianzia te he lehkhabu hian ngaihnawm takin a tarlang a ni. 

He lehkhabu hi Mizote tan inenletna darthlalang ṭha tak pawh a ni bawk. Keini Mizote hi kum sanghnih dawn khawvel hmun hrang hrangah, hnam hrang hrang karah awm darh ve ta ila, a hnam ang chuan kan ralthum mai lo’ng maw? Heti chung pawh hian korean an te, sap an te kan chak em em a, sap hming kan inphuah kur ngei nguai a ni si a. He lehkhabu hian hnam rilru min put thar tir se, Mizo hnam hmangaihna lipuiah min chen tir leh rawh se. 

Tin, he lehkhabu hlutna tizual em emtu chu a ziaktu Pu F Khamliana taimakna hi a ni. Cancer vei dam leh, kum 69 valin lehkhabu a ziak ringawt pawh hi a fakawm tawh a ni. Chu mai a la ni lo, he lehkhabu a ziah lai hian harsatna tam tak a tawk a, computer-a a chhut sa zawng zawng chu zankhat thil thuah a ti bo vek mai a. 

Tichuan, mobile phone-ah a ziak (type) leh ta ngat ngat a, he lehkhabu, phek 109 a chhah hi mobile phone hmanga a ziah chhuah ngat a ni. 

Lehkhabu pakhat zawk, “Zo ṭawng thunawi” tih erawh hi chu a ziaktu pawh KṬP a la in hmang rual lek a ni a. Mahse, a kut chhuak hi a u el awl hle mai. A kut chhuak en hian a naupanna hi ngaihnep chi ziazang a ni lo ve. 

Kan ṭawng a dazat tial tial laia Mizo ṭawng humhalh duhtu, mi thil chik peih, mi duh tui, ṭawng lama miril Rempuia te ang an lo lang leh nawlh mai hi he hnam tan hian malsawmna hlu tak a va ni em! Tin, he lehkhabu hi belhchian dawl tur pawh a ni. Amah Pu Zoramthanga ṭawngkam takin a ziaktu hian ‘a chhiar zau’ em a ni. 

 

Novel anga chhiar liam puat chi a ni lo va, uluk taka chik neuh neuh chunga chhiar chi a ni. 

He lehkhabu hlutna hi sawi ngaihna pawh a awm lo ve. Lei la, chhiar la, a ziaktu Rempuia R Lutmang rilzia te, ṭawng chungchanga a duh tuizia leh a thil chik peihzia te i hmu fiah uar uar ang. Zo fate zinga kan chhuanvawr, thu ziak mi kumhlun Revd Chuauṭhuama meuhin ‘Ka tluk loh val’ a tih Rempuia kutchhuak hi engti kawng mahin a te thei lo. MAL ‘Book of the Year’ ah thlang se, a mak hauh lo ang.