Nihna anga khualzin hip

Tun hnai khan Tourism minister Pi Lalrinpuii chuan Sialsuk khaw hlawhtlinna a lawmpui. Sialsuk hian India ram pum huapa ‘Best Tourism Village' (community based category) lawmman an dawng a ni.

Lawmpuina an hman ṭumin Tourism Minister chuan, "Khualzin hîp tur chuan thil dang zawng aiin a hmuna cheng mipui an pawimawh a, in khaw hmun hlute vawng himin, in hmalakna entawn tlak tak takte hi chhunzawm zel ang che u," tiin Sialsuk khawtlang hruaitute a chah, he thu hi chanchinbu lamah ka lo chhiar fuh a ni.

Inkawmhonaah hian Sialsuk VC president R. Lalruatkima pawhin thu sawiin, Best Tourism Village an nih theih dan a sawi a; Sialsuk khuaa tourism tihchangtlun zel dan turte sawiho nghal a ni bawk. Sialsuk khua hian community-based category-ah Best Tourism Village Awards 2024 an dawng a, September 27, 2024 khan India vice president leh Union Tourism and Culture minister-te hnen aṭangin lawmman hi an dawng a ni.

Sialsuk khua aṭang hian Mizoram khaw hrang hrang ten zirtur kan nei awm e. Mizoram hi tlangram a ni a, hmun mawi leh thengthaw nuam tak tak a tam, hengte hi a hmuna chente tan chuan ngaia neih mai theih thil pawh an ni mai thei, hetih lai hian phai hmun zawla chengte tan chuan hmun nuam leh tlawh chakawm em em a ni thung.

Kan ram hi a nihna angin venghim ṭha ila, ram dangin an neih leh changkanna angte hi kan ram nen a inmil ve vek kher lo tih hriain, Mizoram chu Mizoram a nihna ang hian mawipui thiam ila, Pathianin ram mawi tak min pek hi a nihna hloh lo zawnga kan venhim a pawimawh takzet a ni.

Mizote ngei ngei pawh hian kan ram hi kan hlut thiam sawt viau. Building leh hmunhma ropui tak tak siam hi tunlaiah chuan ṭhalaite tlawh chak lehkal chakna ber a ni tawh lo, boruak thianghlim leh engthawl taka hun hman theihna hmun hi an kal chakna chu a ni tawh zawk–Mizo ang bawkin hnam dang pawhin Pathian thil siam mawi leh thianghlim em em te hi an hmuh chak ber a ni tih kan hriat a hun ta hle.

- Thanga, Aizawl