TUIALHTHEI

Mamawhna:

Tuialhthei hi ni tin kan mamawh a ni bawk a, a vang dawn nia kan hriat chuan kar khat daih tal kan neih loh chuan kan thlamuang lo tlang hlawm a ni. Kan mamawhna a sanna lan chianna pakhat chu Aizawl khawchhung Petrol Pump pakhatin hralh tur a neih loh a, a chatlak hlauh chuan a bul hnai ber Petrol Pump-ah intlar a ngaih phah nghal deuh zel a ni.

A man a sang ta viau em:

Tuialhthei man hi Kum 2022 khan Petrol (Normal) Cheng 104.18 leh Diesel (Normal) hi Cheng 88.54 a lo ni tawh bawk a ni. Tuna Tuialhthei man thung chu Petrol (Normal) Cheng 99.21 leh Diesel (Normal hi Cheng 87.99 a ni. Kum liam tawh nen en dun chuan a sang ta viau lo a ni.

Value Added Tax (VAT) lak tawh dan:

Kum 2021 November thla khan Mizoram State sawrkarin Tax hi a tihniam vak a, Petrol-ah 25% aṭangin 16.36% ah a tla a, Diesel-ah 14.5% aṭangin 5.23% ah a tla bawk a ni. Hemi hun lai hian crude oil man a san lai a nih vangin Tuialhthei man pawh a to hle a, Tax han tih hniam det chu a ṭha khawp mai. Hemi kum hian Central sawrkar thlawptu State-te chuan cheng bituk awma tih hniam vek tur tih vangin Tax pawh hniam deuh leh percentage lai deuhin kan dah ta reng a, kan State sawrkar hi kan harsat phah ta zawk niin a lang a, State dang a tihniamho pawhin an tisang leh tawh zawk tlangpui a ni.

Tuna Tax leh Cess awm dan:

Tuna kan tax awm dan hi a ṭhat zawkna a awm thei a, hetiang anga Tuialhtheia Tax leh cess anga lak hi thil thar a nih avangin hriatthiam pawh a har deuh mai thei. Tuna Tax kan chawi dan hi Petrol-ah VAT atan 18% , Road maintenance cess-ah litre khat zelah cheng hnih leh, Social Infrastructure & services-ah cheng hnih, a vaiin percentage-a dah dawn chuan Petrol-ah hian 23.17% ang vel a ni. Chutiang bawkin Diesel-ah chuan VAT atan 10%, Road maintenance cess-ah litre khat zelah cheng hnih leh Social Infrastructure & services-ah cheng hnih, a vaiin percentage-a dah dawn chuan Diesel-ah 15.4% ang vel a ni.

Rawtna:

Petrol-ah VAT 18% leh Cess atan Cheng khat ve ve. Diesel-ah VAT 10% leh Cess atan Cheng khat ve ve ni ta se, a percentage ang zawng pawn sang vuah lovin Petrol-ah 20% vel leh Diesel-ah 12.6% vel a ni thei ang. Ṭhenawm State-te aia Tuialhthei man a sân hian Mizoram chhungah hralh chhuah a hniam phah thei tlat a, Mizoram Sawrkarin Tax leh Cess Tuialhtheia a lak belh hian awmzia a neih loh phah thei bawk a ni.

Thubelh:

Oil Tanker-te hi kan tlanna rate a hniam em em a. Tuna rate hmanlai hi hlawkna nei mang lovin kum thum dawn kan tlan tawh a, mimal Oil Tanker nei phei chuan an tiral ta deuh vek zawk a ni. Contract tharah chuan rate ṭha zawk kan beisei viau tih ka'n thai lang hrim hrim duh a ni.

- P.B. Lalsiamliana, Petroleum Entrepreneurs' and Transporters' Union of Mizoram (PETUM)