Finance Minister atan mithiam
Tun hnaiah kum sarih chhung vel hian sorkarin sum harsat thu hi an sawi chamchi a, ziaawm lam kan pan thei meuh lo. Central aṭangin sum kan dawng tlem bik pawh a ni loa (population a chhutin), kan enkawl thiam lo ni berin a lang.
Central-a Congress party an sorkar lai khan MP pawh ni sa lote khan mithiam an ruai a, Prof PV Narasimha Roa pawh mithiam a nih vang chauhin a Prime Minister a ni. Prof. Man Mohan Singh pawh MP ni sa loin Prime Minister atan a thiamna avangin an ruai mai a ni. Party-a mihlunten an thiam tawk loh chuan Vaiho kan tih pawhin mithiam an ruai mai a ni. Nasa takin ramin a ṭhat phah reng a ni.
Mizoramah pawh he ti taka sum harsatna kan sutkian thiam loh chuan mithiam ruai mai ila, ramin a ṭhatpui zawk ang. Sorkarin mimal leiba a ngah lutuk a, mi han bia ila, "Ka bill ka la thei lo, a tâng," tih deuh vek mai a ni. Kum tin mimala bat leh Central lama bat a pung tial tial a, chhuanlam tur dang a awm lo, Finance Minister thiamna (efficiency) in a tlin lo a ni ber mai. Tlawmah la loin Mizo mithiam tu emaw ruai mai ila, chung lam aṭangin khuahkhirhna siam lo ila, kum thumte a ral chuan kan ziaawm sawt ang.
Hetiang atan hian Mizo kan nei em? Kan nei ṭeuh tawh ang. Minister nih leh a behbawm kan thlahlel a, ram tana thawh tak tak duhna kan tlachham leh si a. Party mi nih leh sum enkawlna lamah kan hlawhchham a nih si chuan mipui tan a pawi em em a ni. Financial management-ah thurawn pek theih an ti a, mi tam takin rawtna pawh an thlen a; mahse Sorkar Finance Dept. berin a tihlawhtling thei chuang si lo. A hnuk tawi ber chu Finance Minister atan mithiam hman tawp a ni ber.
Meghalaya chuan kum 10 a vei leh chuan Power MW 700 an siam chhuak ang a, state-in MW456 a hmang a, a dang Central-in. Kumin khan Arunachal-in Power aṭangin Crore 400 zet an hlêp a, Tripura chuan Power an thar chhuah, an mamawh bak Bangladesh-a hralh phalna Central-ah an dil mek a, kei ni ve thung chuan a chhit man mipuiah kan tisang vak vak ringawt a, kan ram lui tui khuap turin MoU chhe pui pui kan ziak chhuak ringawt mai a, power-a kan intodelh hun tur pakhatmah sorkarin a sawi thei si lo.
Tun Congress sorkar hmasa khan MoU an sign puia NEEPCO nen kum ruk a ral hnuah pawh hmalakna pakhatmah hmuh tur a awm lo. NEEPCO hi state dang chuan an ruai ṭha vak duh lo. Delhi lam company-te chuan MW nuaih tel a ni an sawi daih ni. Heng hi a chhan ber chu mithiam leh thil tak tak duh mi kan hman ṭangkai loh vang a ni. Kan sawi hnaivai ber Tuirial lah chu MW7 vel chauh kan chan tur a awm dawn a, MW60 pe chhuak thei tur chu kan chan tur ni awm tak. Kan ram lui a ni a, kan ram sa mite tam tak a chim chhe dawn lehnghal. Company-te leh kan ram hruaitute hian hnung thak an inhiahsak em ni, tih pawh rin awl tak a ni.
Vaibelchhe tel luan ralna, scandal lian tak Kau-Tlabung tih te, Khawiva, Liva, Tuirivang kan tihte khan engmah min pe chhuak ta lo em ni? Mipui chu sawi loh kan ram hruaitute thlenga vaihoin MoU chhe pui pui min ziahpui reng mai hi chu a vanduaithlak a ni. Andra Pradesh CM Chandra Babu Naidu chuan China-te a dawr a, vawi tam a kal, kei ni hian kan dawr ve thei lo em ni? Kan ram zim tea inhampuar hi kan duhtawk em ni?
Arvind Kejriwala chuan êng chhit mante an tihniam mek a, inhmun nei lo tan inhmun a pe mek bawk. Mihring ve bawk a ni a, Central hnuaia awm ve tho a ni. Kan ram hruaitute hi insangphek sela, mi state-in an tih theih chuan engah nge kan tih ve theih lo bik ang, tiin ngaihtuah rawh se. Mi bill tang an bat zawng zawng hi clear vek se la, mipui tana ṭha angin hma la teh se. A bul ṭan nan Finance Minister atan mithiam dah phawt mai se la a ṭha ber ang.
Mi bill tang an bat zawng zawng hi clear vek se la, mipui tana ṭha angin hma la teh se. A bul ṭan nan Finance Minister atan mithiam dah phawt mai se la a ṭha ber ang