Cyber crime laka kan him nan
Mizoram Journalists’ Association (MJA) Gen.Hqrs leh Mizoram Police ṭang dun chuan October 7-17, 2024 chhung khan Mizorama district khawpui tinah cyber crime chungchang inzirtirna an buatsaih a; internet online leh social media hmanga Mizorama pawi pawikhawihna thleng ṭhinte leh invent dan turte zirho a ni.
Seminar on Cyber Crime hi October 7 khan Chief Minister Pu Lalduhoma’n Serchhipah a hawng a, Serchhipah hian seminar buatsaih zui nghal a ni a. Chumi hnuah Hnahthial, Lawngtlai, Siaha, Lunglei, Mamit, Kolasib leh Champhaiahte buatsaih zui a ni.
Cyber Crime Seminar buatsaih a nih theih nan hian Home Minister Pu K Sapdanga’n a pawimawhzia hriain nasa takin hma a la a, Home Department leh Mizoram Police-a hotute’n a ṭul ang zelin an bawhzui bawk a. Chutianga thawhhona ṭha tak avang chuan seminar buatsaih theih a ni a, a lawmawm hle.
Mizoram Police-in Cyber Crime Police Station an din hnuah November 2020 aṭang khan Mizoramah cyber crime thubuai 287 ziah luh a ni tawh a; kum 2020-ah case 12, kum 2021-ah case 25, kum 2022-ah case 158, kum 2023-ah case 72 leh kuminah case 33 ziah luh a ni tawh. Case lut zinga 80% dáwn chu sum lama inbumna a ni a, a tam fal hle. Cyber crime case-ah hian mi 102 man an ni tawh a, chung zinga mi pahnih state boundary pêla man an ni. Thubuai ziah luh zinga 85-ah police-in court-ah chargesheet an thehlut tawh a; court-in mi 38 chu thiam loh a chanter tawh a, thiam chang (acquit) an la awm lo.
Cyber crime seminar-a telte chu mi tam an ni lo a, chutih laiin, cyber crime hi Mizoramah a hluar tulh tulh si a, mipui nawlpuiin an hriat theih nan seminar-a an sawi tlangpui kan tarlang dawn a ni.
1. SIPAI ANGA INSAWIA INBUMNA
An chet dan tlangpui:
• An awmna (posting) an sawn dawn vang emaw chhuanlamin tlawm deuhin Facebook velah in chhung bungrua te, motor, bike, etc an zuar ṭhin.
• An bum tumte’n sipai ngei an ni tih an rin theih nan an sipai ID, liquor card, Aadhaar card, etc lem siam chawp an thawn ṭhin a, a chang chuan sipai uniform ang deuh ha chungin video call an neihpui ṭhin.
• A tlangpuiin UPI app (Gpay/Paytm, etc) hmangin pawisa an inthawntir ṭhin.
• A chang chuan army/sipai ho pawisa inpekna dan a dang deuh chhuanlamin QR code scan ngaih thu an sawi a, chumi hmang chuan mi an bum ṭhin.
Hriat tur pawimawh:
• UPI app (Gpay/Paytm etc) hmangin i account-ah pawisa a lo luh dawn chuan UPI PIN type a ngai ngai lo tih hriat a ṭha.
• UPI PIN i type a ngai a nih chuan i account aṭangin pawisa a chhuak zawk dawn tih hriat tur.
• Tunlaiah chuan Google Map hmangin hmun tin a hmuh theih tawh a, ‘Kolasib-ah min post a’, ‘Champhai aṭangin a lo chhuak, Saitual a lo thleng tawh’ etc. tih vel an sawi avangin rin ngawt loh tur.
2. BANK MANAGER/PHONE COMPANY SANGA INSAWIA INBUMNA
An chet dan tlangpui:
• Sawrkar/company website emaw aṭangin an mi bum tumte an hre chiang hmasa ṭhin a, an designation te, an thawhpuite hming etc. an chhinchhiah tlangpui.
• Chumi hnuah phone hmangin an bia a, bank manager emaw, mobile company (Airtel, Jio, etc) aṭanga rawn bia angin an KYC/Mobile no. etc update tur an chhuanlam a, an bum tumte’n an rin theih nan an thawhpuite hming chhalin anni pawhin hetiang buaina an neih ve an chinfelsak tawh thute an hrilh ṭhin.
• KYC/Mobile no. update hmanhmawh a ngaihzia an sawi ṭhin a, a nih loh chuan an bank account/mobile no. a thih nghal tur thu an hrilh ṭhin.
• Chumi tur chuan an debit card number te, card hnung lama CVV number te, an phone-a OTP lo thlengte an dil chhuak ṭhin a, chumi hmang chuan an account aṭangin pawisa an ru chhuak ṭhin.
• A chang chuan SMS emaw hmangin link an thawn a, chumi link-ah chuan form fill up tur a lo awm thin a, form-ah chuan a chunga card number, etc an dah luhtir ṭhin.
Hriat tur pawimawh:
• Phone hmanga inbiaknaah hmelhriat lohte’n an nihna an sawi apiang rin ngawt loh tur.
• Bank account/mobile number, etc vela buainaah an office-ah emaw mahni kala chinfel a him ber.
• Debit card number te, a hnunga CVV number-te leh OTP-te hi tu mah pek loh tur a ni a, eng form-ah mah dah/ziah luh lo tur. Heng dil tlattute chuan bum an tum che tih hriat a ṭha.
3. PRIVATE COMPANY AṬANGA INBUMNA
An chet dan tlangpui
• Private company tih hian keimahni hming, pian ni, address, etc. kan pekna company-te a huam a, a tlangpuiin online-a thil kan chah ṭhinna website te, mobile apps company te, bank agent ṭhenkhat sawina a ni.
• Heng company-a thawk ṭhenkhatte chuan an customer information ru chhuakin (data leak) mi bum hmangte hnenah an zuar chhawng nge, anmahniin an bum ṭhin tih hriat a ni lo.
• An customer-te’n phone call an dawng a, a betuin company aṭanga rawn bia angin an insawi a, an hming te, pian ni, address leh an company-a order an siam tawh zawng zawng te, loan account no. etc te an rawn hriat theih vek avangin rinhlelhawm loin an lang ṭhin.
• Miin an rin hnuah an company aṭanga prize, reward, lucky draw, etc. an man tih thu an hrilh a, chumi khul chhuah nan pawisa an dil leh ṭhin.
Hriat tur pawimawh
• Phone hmanga inbiaknaah hmelhriat lohte’n kan chungchang hre viau ang pawhin lang se, an nihna an sawi apiang rin ngawt loh tur.
• Lottery, gift, reward, etc. man vanga pawisa thawn hmasak ngai ang chi hi chu inbumna a ni tih hriat a ṭha.
• Internet-a thil zawrhna website/mobile app zawng zawng hi a him vek kher lo va, an customer information rûk chhuahna tura siamte pawh a tam.
4. ONLINE SHOPPING-A INBUMNA
An chet dan tlangpui
• Instagram, Facebook leh Whatsapp-ah an bum tumte awh deuh turin thil a man pangngai aia tlawm daihin an zuar ṭhin.
• Thil zuarte hian a tlangpuiin ṭhalai duh chi–phone, electronics, thawmhnaw, pheikhawk, etc. an zuar lem ṭhin.
• Khawvel mi larte’n iPhone an hman nasat avangin tunlai ṭhalaite an awt a, inbumna tura zuar pawh an tam ber a ni.
• Heng zuar ho hian an thil zawrh rawn thawn nan advance payment an dil ṭhin a, an thil zawrh a tlawm em avangin pawisa thawn pawh miin an awlsam.
• A tlangpuiin bumtute hian UPI app (Gpay, Paytm etc) emaw e-wallet (Airtel payment bank, India Post payment bank, etc) an hmang ṭhin. A chhan chu heng account ho hi bank account pangngai aiin chhui chhung a rei tih an hriat vang a ni.
• Pawisa an thawn hnuah chuan biak theihin an awm tawh lo a, an reh nghal vang vang zel.
• A ṭhenah chuan cash on delivery (COD) hmanga thil an chah pawhin an thil chah ni lo deuh emaw, phone chhia emaw, bungraw chhia an dawng ṭhin.
Hriat tur pawimawh
• Instagram, Facebook leh Whatsapp hmanga sumdawng taima tak takte an tam a, mahse, heng hmanga mi bum tum an tam a ni tih hriat a pawimawh.
• Heng ho thil zawrh kan lei hmain a tak tak an ni nge ni lo hriat tum hmasak a ṭha a, mi dangin an chah ve tawh em, kan ṭhiante emaw chah an awm tawh em, miin an page-ah engtin nge an comment, etc. tihte chîk hmasak a ṭha.
• Thil, a man pangngai aia tlawm daiha zawrhna hi inbumna a ni tlangpui tih hria ila, pawisa thawn hmasak lamah fimkhur tluk a awm lo.
5. INVESTMENT LEM HMANGA INBUMNA
An chet dan tlangpui
• Mobile app hmanga investment a ni tlangpui a, pawisa dawn theihna plan hran hran an nei ṭhin. Eg. Rs 100 recharge chuan downline 1-ah Rs 10, Rs 1,000-a recharge chuan downline 1-ah Rs 100, etc.
• An pawisa hi stocks/mutual fund-a invest angin emaw, cryptocurrency-a invest angte pawhin an insawi ṭhin a, mahse, hei hi chu a ni tak tak lem lo.
• A tirah pawisa tlem an dawn hmasak ṭhin avangin pawisa an invest belh zel a, a tawpah chuan an pawisa invest pung chu a lak let leh theih loh ṭhin a, lak let leh dawnin pawisa chawi belh a ngai ṭhin.
Hriat tur pawimawh
• Google Playstore ni lo website dang emaw aṭanga mobile app install hi a him vek lo
• Pawisa investment ti thei anga insawi tam tak hi inbumna a ni tih hriat a pawimawh a, theih ang tawka finfiah hmasak a him.
6. SEXTORTION (VIDEO CALL HMANGA INBUMNA)
An chet dan tlangpui
• Mipa/hmeichhe duhawm tak lem hmangin Facebook, Instagram, etc. ah account lem an siam a, an bum tumte friend request an thawn kual phawt ṭhin.
• An friend request an lo accept chuan messenger vel emaw hmanga biain, an phone number hriat an tum ṭhin.
• Phone number an hriat veleh video call hmangin an thlêm ṭhin a, an bum tumte hriat lovin chu video call chu an record ṭhin a, video call-ah chuan a call-tu leh call-a te an lang ve ve ṭhin.
• Video an record chu an Facebook ṭhiante hnena thawn darhahte an vau let a, pawisa dil chhuah nan an hmang leh ṭhin.
• A chang chuan Youtube emaw video website ṭhenkhata thehdarhahte an vau bawk.
Hriat tur pawimawh
• A taka hmelhriat loh hnen aṭanga friend request kan dawnte accept vek loh a him ber.
• Hmelhhriat lohte aṭanga video call kan dawnin lak loh tur.
• Video call kan dawnin kan Facebook/Instagram account disable (tihbo) rih a, hriat loh aṭanga phone call chhan loh tawp mai a ṭha ber. An rawn vau reng peih lo ang che.
7. LOAN HMANGA INBUMNA
An chet dan tlangpui
• Mobile app hmanga loan tlemte lak theihna an siam a, chutiang chu Google Playstore-ah pawh hmuh tur a awm nual.
• Hetiang app an install hian in register nan an hming leh phone number, etc. vel dah luh a ngai ṭhin.
• Mobile app kan install hian permission pek azirin phone neitu contact list te, thlalakte hmuin an la chhuak thei.
• Loan chu an dawng ngei a, mahse, tam tham tak a lak theih loh. An loan rulh nan pawisa an pek let pawhin an dil belh zel.
• An pawisa dil belh an pek loh chuan phone neitu contact list-te zawng zawng hnenah thlalak, zahmawh rawngkaia siam chawpin an thehdarh ṭhin.
Hriat tur pawimawh
• Mobile app kan install dawnin permission dilna a lo lang ṭhin a, ngun taka chhiar a, fimkhur taka accept tur a ni.
• Mobile app-in a mamawh loh tur permission a dil chuan paih leh mai a him ber. Entirnan, calculator mobile app install ta la, i phone-a i thlalak te, camera te, microphone, etc. te access a neih a ngai lo a ni tih hriat a pawimawh.
• Hetiang i tawng a nih chuan hriat loh aṭanga phone call chhan loh tawp mai a ṭha ber.
8. ONLINE RELATIONSHIP SCAM
An chet dan tlangpui
• Facebook, Instagram, etc. ah account lem an siam a, an bum tumte friend request an thawn kual phawt ṭhin.
• Friend request an lo accept chuan messenger emawa biain, ram dang daiha mi anga insawiin, ṭhian angin emaw, inngaihzawnna lam angte pawhin an be zui ṭhin.
• Rei tawk tak an be ṭhin a, a ṭhenah chuan an bum hmain kum 1 chuangte pawh biak chang an nei. A chhan chu, an bum tumte hian ṭhian ṭha emaw, bialnu/bialpa tak tak anga inngaihtir an tum vang a ni.
• An bum tumte’n an ring tawk tawh a ni tih an hriat veleh kawng hran hranin bum an tum tawh ṭhin. Entirna’n, ṭhian ṭha inṭanpuina atana gift thawn te, India rama zin tur angtein an insawi ṭhin.
• Delhi/Mumbai, etc vela Custom-ah anmahni emaw, an gift thawn emaw an lo man thu an hrilh a, Customs lama thawk anga insawite’n an bia a; amah emaw, a gift emaw khul chhuah nan pawisa a ngaih thu an sawi ṭhin.
• Hetiang thilah hian Mizo pawh an inhnamhnawih nual a, cheng nuai tam tak hlohte pawh Mizo zingah an awm nawk tawh.
Hriat tur pawimawh
• A taka hmelhriat loh hnen aṭanga friend request kan dawnin accept loh a him ber.
• Facebook/Instagram, etc. ah a taka kan hmelhriat loh nen kan inbiaknaah an sawi apiang awih ngawt loh tur, thlalak an hmante pawh hi anmahni tak tak an ni kher lo thei.
• Central sawrkar department dawr nan online system an nei vek tawh tih hriat a ṭha.
• Customs aṭangin pawisa min rawn dil pawh nise, mimal bank account-a pawisa thun a ngaih chuan rinhleh nghal tur.
9. PARCEL SCAM
An chet dan tlangpui
• Call an dawng a, call-tute’n khawi lai police station (eg. Mumbai, Delhi, Hyde-rabad, etc) emaw angin an insawi tlangpui.
• An mi bum tumte hminga awm parcel, sawrkar phal loh thil a chhunga awm man angin an insawi ṭhin.
• Khawi police station emawa case ziak lut angin an insawi ṭhin.
• Case chinfel nan pawisa thawn turin an ti ṭhin.
• An mi biakte’n an rin theih nan video call-na apps (eg. Skype, etc) an download tir a, an call a, police uniform ha angte’n an lang ṭhin.
• An mi biakte’n chu chu awihin pawisa an thawn ta ṭhin a ni.
• Hetianga inbumna hi tunlaiin a lar zual hle.
• Miin police-ah complaint an thehluh meuh chuan pawisa tam tham tak an lo chán hman tawh ṭhin.
Inven dan tur
• Hetiang call dawn kan reng rengin phî chung loh tur.
• Kan personal information hrilh loh tur.
• Pawisa thawn ngawt lovin, kan hnaih ber police station-ah thil awmzia thlen vat tur.
• Police station-ah kan kal thei lo a nih pawhin police station biak pawh theihna number zawn a, thil awmzia hriattir tur.
SOCIAL MEDIA HMAN KHAWLOH
Tunlaiin social media hi tute pawh hian kan hmang a tih theih awm e. Naupang aṭanga puitling kum upa tak tak chenin social media platform hrang hrangah account kan nei fur mai. Social media-te hi hman khawloh a awl em em mai a ni.
Social media hman khawlohna langsarte
1. Zamawh rawngkai
• Zamawh rawngkai video emaw thlalak emaw thehdarhna hmanrua atan mi tam takin an hmang.
• Mi ṭhenkhatin zamawh rawngkaia a che lai live-a tichhuah nan an hmang.
• Naupang kumtling lo zamawh rawngkaia an lanna thehdarh nan an hmang ṭhin.
• Thlalak thianghlim lo tak tak mid thawn nan a hmang ṭhin.
• Online-a mi dangte chet dan/awm dan en nan an hmang ṭhin (online stalking).
• Mi awm dan enthlak nan miin an hmang ṭhin (voyeurism).
• Mi thlalak/video ṭha lo thawn darha invau nan an hmang a, pawisa an ngiat ṭhin (blackmailing).
Fimkhur dan tur
A chunga kan sawi takte laka fihlim turin social media kan hman reng rengin fimkhur hle a ngai. Thlalak leh video post-ah te, video call hman chungchangahte fimkhur hle tur a ni.
2. Mi tih hmingchhiat:
Social media-a mi tihhmingchhiat chungchangah tunlaiin police-ah complaint a lut nasa. Miin fake profile an siam a, chumi hmang chuan mi dang chanchin an post a, mi tana hminghliauna leh mualphona thlen thei a ni ṭhin. Hei hian mi thlalak emaw thu post emaw comment hmingchhiat te, an thlalak emaw, an thu post emawa mualpho thei tur anga hmun danga post darhte a huam. Hetiang thil hi a serious hle a, hetiang thila inhnamhnawih chu dan hmanga na taka hrem theih an ni. Social media-ah post kan siam dawn reng rengin kan thil post tur chu thu dik a ni em tih kan finfiah hmasa ngei tur a ni.
3. Thu dik lo thehdarh:
Mi tam takin social media platform hrang hrang hi thu dik tawk lo thehdarh nan an hmang ṭhin a; document lem/siam chawp thawn darh nan an hmang ṭhin bawk. Thu thehdarhah fimkhur tur a ni a; thu dik lo thehdarhtute chu dan hmangin na taka hrem theih an ni.
HRIAT TUR PAWIMAWH
• Tu hnenah mah OTP kan share tur a ni lo.
• Kan bank detail-te official bank website a nih loh chuan eng website-ah mah kan share tur a ni lo. Google form ang chiah hian bank details kan fill-up tur a ni lo.
• Thil ṭha uchuak deuh internet-ah kan hmu a nih chuan inbumna a ni tlangpui.
• Online hmanga investment tih dawn reng rengin zir chian hmasa ngei tur.
• Online-a pawisa i thawn dawnin apps emaw online wallet rintlak hmang ṭhin ang che.
• Online scheme eng pawh a hlâwkna tam uchuak ang chi chu tlansan ngam ang che.
• Mi tu pawh online scheme i hriat chian loh ti ve turin sawm suh.
• I computer-ah miin i screen an hmuh ve theihna tur emaw, remote-a i computer an thunun theihna tur ang chi software/app install suh.
• App i hriat ngai loh install mai mai suh.
• App i install reng rengin a permission chhiar chiang ṭhin ang che.
• I thil chah a lo thlen hmaa a man i pek lawk a ngaih chuan fimkhur ang che; an rintlak em tih finfiah hmasak phawt a ṭha.
• Lawmman eng emaw dawn nana processing fee an rawn dil che chuan pe suh.
• Social media-ah i personal details ziak lang suh.
• Video call i hman reng rengin fimkhur hle ang che, lehlam aṭangin an lo record thei reng a ni.
• Link hriat loh click mai mai loh tur, tu mah link thawn loh bawk tur.
• I bank account hralh suh; misualin thil sual tih nan an hmang ṭhin a, i hminga awm a nih avangin I buai phah thei.
• SIM card mahni hming ngeia register hman a him ber. Mi hminga register SIM card nung sate hi miin pawi khawihna atana an hman a lo ni palh thei.
• Whatsapp-ah two factor authentication hmang ṭhin ang che.
• Mi dang tana hriat har tur password hmang ṭhin la, i password thlak fo rawh.
CYBER CRIME REPORT THEIHNA NUMBER
• 1930 toll free helpline: Engtik lai pawhin he number-ah hian cyber crime chungchang i report thei a, 24x7 duty an awm reng.
• https://cybercrime.gov.in ah engtik lai pawhin complaint thehluh theih a ni.
• Cyber Crime Police Station, Aizawl SP Office Building, Treasury Square, Aizawl-ah leh phone no. 6909316531-ah harsatnate thlen theih a ni.
- K. Zothanpara, General Secretary, MJA Gen.Hqrs