Social media - a mai mai lo!

Mi tinin smartphone kan hum deuh vek tawh a, chanchinbu/lehkhabu chhiar leh TV en aiin, mahni phone aṭangin kan duhzawng engkim kan hmuin hriat kan tum tawh a. Mi ṭhenkhat chuan Bible chang an duh lai chhinchhiah nante hmangin mi tam takin file pawimawh zawng zawng dah ṭhat nan an hmang bawk.

Mizoten Social media platform kan hman tlanglawn ber chu Facebook, Instagram, Twitter, WhatsApp, Tiktok leh YouTube-te hi a ni rih mai awm e, heng kan sawi bak hmang pawh an awm tho a.

Social media hi politics, sorkar, kohhran, sumdawnna lam, NGO leh chhungkua thlenga insiam ṭhat nan leh chanchin engkim inhriatpawh tawn nan kan hmang tawh a, a hmang thiam ve lo leh a ṭha lo zawnga hmangte chu nasa taka tihniamin an awm a, an mualpho fo bawk.

Kum 2023 MLA General Election hma leh campaign beihpui thlak vanglai vel khan party lian leh ngelnghet pahnih MNF leh Congress-te chuan ZPM kha, social media-ah chauh an len thu leh, a takah mihring awm mang loah an sawi a, an puh fo ṭhin tih kha kan la hre ṭheuh awm e. 'Social media mai mai' ti tawk tam tak an awm bawk. Social media chu a mai mai lohzia kan sawi dawn a ni. ZPM kha kan hriat ṭheuh ang khan social media-ah nasa takin ṭan an la mar reng a, an tan chuan an campaign-na platform pawimawh ber a ni hial awm e, tun thleng pawhin tha an la thlah eih lo.

ZPM khan campaign auhla mawi tak social media hrang hrang hmanga rawn chhawpchhuakin, Mizorama sorkarna lo inchelh chhawk tawh ṭhin - Congress leh MNF chu archuktuiloa chhuahin, thawh ṭhat reng reng nei loah an puh a, mipui rilru nasa takin an hneh a. Vawi khat mah la sorkar chhin eih loten MLA 27 lai an neih theih avang khan social media a mai mai lohzia chu kan hre tawh ang chu maw!

Tihsual palh chang rengin, document felfai tak nen mipuiah min fah hneh hle a, ni tin zan tina smartphone aṭanga kan hmuh leh kan hriat tlat chuan lo ring nghal burtu mipui tam tak an nei ta a ni.

MLA inthlanpui lai khan MNF leh Congress ve thung kha chuan social media hman kha an uar ve lo khawp mai. Anmahni political platform aṭangin an au an au ringawt mai a nih kha. Ngaithla pha ve loten an hre pha lo va, an heti rih ta a nih ber hi.

Social media hmang thiam tak, 'Min enchhin rawh u' tia mipuia inzuar thiam em em chu kan han enchhin ta a, kan enchhin fuh lo viau dawn niin a lang. Reilote chhung pawhin kan enchhin fuh dawn lo niin a lang ta!

Simna tel lo Saiip puan sin rah kan tel zawk dawn nge? Inthlahdah leh ruahman lawkna ṭha a awm loh avangin kan châk lakluhna kawngpui a chhiat avangin petrol a váng a, thil man a to a, Current mumal taka nei reng veng leh khua lah khawvar lam arsi ang maiin an vang ta pharh mai. Nuar thei apiang an nuar dawn emaw tih mai turin, sorkar kar nan nuar tur thawm chi hrang hrang lah an inhawrkhawm tup tup reng a. Heng nawrh tuma intintuah reng ho hi thil ṭha zawk duh ṭheuh vang leh sorkar hmalakna duhkhawp lohna vang an ni vek.

Oil man a pungin ration buhfai man lah a let thawkin a pung dawn mek a, éng chhit man leh chhiah dangte pawh an tipung ve thuaiin a rinawm bawk. He thu ziah lai hian oil man hi an tihniam leh dawn em tih hriat hman a la ni lo. Chhuanlam siama mi dang puh fo hi ṭhangtharten an rilrem zawng a ni tawh hauh lo tih hi lo hre bawk se la.

Sorkar khalh ngil tura an sawi tlawr dup dup - Val Upa Council (VUC) lah thehhmeh ang maiin an reh ta vung vung a, history a chang zo ta. Duhsak fal deuhte board chairman niin an president ber pawh board chairman nihnain a phuar tlat tawh bawk. Saiip puan tel lovin kalphung ṭha lo simna lamah ke pen zawk se, tih chu anmahni thlang tlingtu neutral mipui duh dan a ni reng e.

Eng le khaw le, ZPM hruaitute hian inthlan hma zawnga an campaign auhla leh chet vel dante kha social media-ah kan hmu nasa a. An sorkarna la rei lo mah se; an sawi anga an khawsak lohzia kan hmu chho malh malh a. An campaign laia an ṭawng dan leh thuneihna pek an nih hnua an kal dan a inkalh ta nuk mai. Insawifiah an ngai fo a, insawifiah a ngaih fo chuan thil fuh tawk lo a awm tihna a ni a. An insiamṭha fe a nih loh chuan an sorkar chhan - social media hmang bawk hian inthlan lehah mipuiin an paih thla dup mai ang. Social media hi zawng, a mai mai lo a nia.

- R. Lalhmangaiha @ R. Hmaa, Bethlehem