‘Bár’ thla lungrun
Zân dang ang lo takin khua chu a thiang nuam hle mai a. Thla eng lah chu a mawi em em mai. Heti anga khua a han thian hi chuan khua chuana han hawi vel pawh a nuam bik a. Zân lama eizawng chi ramsa leh chiapcha chi tin rengte chuan thawm an rawn nei ṭan a. In chung di-soa Vamur zan riakte chu an lo che ri ve set set hlawm a. Zân lama eizawng chiten mahni tawka thawm an chhuah ri han hriat phei chuan he khawvel boruak hi a nuam lehzual bik hian a hriat theih hial nia!
Dârnâm tuikhur bul, thlanmual pangpera Sihal ú ri leh veng lehlama tlangval rualkhat, nula rimten; thla eng hnuaia zai an han vawr ri te, a khat tawka Vabak thir chhêr ri kauh kauh hriat tur a han awm leh zauh ṭhin te chuan amah rualute ṭawngka hawh lawk ila, kan ṭhatlai; kan vanglai hun min ngaihtuah chhuahtîr a . Mi ṭhenkhatten fiamthuin, "Bâwng tar pawhin luang no apiang a duh e," an han ti ṭhin tak naa; luang note pawh hi Bâwng tar peh atân an chawrno ve ṭhin zawk a ni lo maw? tia ngaihtuahna sen mai pawh a awl duh viau mai ka ti!
Van hnuai lei hringmi danin ni leh thla, kum sul a han liam a. Hnah nêmte pawhin chawrno an rawn chhuah ṭan ve leh ta hlep hlep mai. Chutih rualin, hnah nêm ṭhenkhatte erawh thung chuan chuai zai an rel veleh pheuh pheuh ta thung a. Hun hian kan hringnun kal lai pawh hi nawrbo tumin ni tin zan tin, huntîn min chhiarkhum chho zêl a. Kan hun chhiar mekte chu nunhluiah an chang zo ṭhin. Kan nunhluite chu ngaiin chelh din han tum ngial ṭhin mah ila, hringmi danin hunin a liampui zêl chu a nih si hi!
A kum chhira kan sawi fo, a hun ngaia lo herchhuak leh ṭhin, ṭhenkhatten fiamthu thawhnana an hman ṭhin, "Kan ti nek nek a, 'Bar' thla kan lo thleng leh ta reng mai ti ti suh ang che. In tih nek nek vanga thleng kan ni lo. A hunah alo thleng a ni ve mai," tia an fiamthupui ṭhin, kei erawhin hetiang hun kan chuangkai thei hi lawm sateha ka lawm ṭhin, chu 'Bar thla lungrun' chu kan lo chuangkai chho leh ṭan ta reng mai.
Heti ang hun hmu pha loa vanduaithlak taka rualduhten mual min liamsan lai a, Pathian zahngaihna avang liau liaua he hun kan thleng thei hi ka lawmna tuifinriat angin a luangliam hial asin! Pathian ngaihsak leh ṭih mi, ni tin nun phunga Pathian hre renga khawsa tam tak kârah, Pathian ngaihsak ang taka lang, ṭhenawmte leh khawtlangin an nun phunga Pathian ngaihsakna leh ṭihna kan hmuh hauh si loh; kâwra hmanga Chawlhni inkhawm ṭhulh lêm lo, Biak in lamtuala lâm chhuak thei reng mai, an nun phunga Pathian thutak nunpui hauh si lo, mahni mihringpui pawh zahderna nei miah lo leh Pathian pawh hlau chuang lote pawhin, he 'Bar thla' lo herchhuak hi chu an hlimpui ve ang em tih te hi ka ngaihtuah ṭhin zu nia!
He hun lo thleng hian keini hringmite khawsak phûng inthlau lutukte hi min ngaihtuah chhuahtîr leh ṭhin a. Biak In lamtuala Chawlhni apianga lam vir chai chai ṭhin, a rûka ṭhenawm khawvengten hnawksak tia an sawi rûk sêp sêp ṭhin te pawh hian Siamtu duan, he khawvel mawina hi an thlir ve ṭhin ang em tih te min ngaihtuahtir fo a. Vantlang kawngpui pawh zah lo, duhâmna avanga vantlang kawng nêk chêp hreh miah lote, kohhran leh khawtlanga inhmang tak, Zonun zemawi leh Kristian nun dan mawi nunpui chuang lo, incheina atana khawtlanga lansarh khêl mite pawh hian he hun lo herchhuak hi an hmuh hian, Siamtu ropuina hi an ngaihtuah ve ngai ang em tih te min ngaihtuahtir ṭhin zu nia!
Kumtluana a sûr a sâ hnuaia kan thawhrim rah chu seng theih a lo ni dawn ta a. A tlém emaw a tam emaw, a hlawk emaw hlawk lo emaw, keini thingtlang loneitute tan chuan chu tluka hlu chu a awm lo. Kan thlai leh buh tharte han sengkhawm hlimawmzia chu thu dang, mi tam takin min chhuhsak theih hauh loh nun hlimna chuan min tuam a. Chutah, favang tlaitla lenkawl eng no riai chu han thlir ila, rilru hi a hlim ru veng veng mai asin. Ngaih loh ha bal chhem ai chuan nuam veng veng tak a ni!
He 'Bar thla lungrun' hi a lo her chhuah meuh chuan, keini hringmite nun phung hi eng emaw ti tak hian a khawih a. Kan lei hringnun nen hian inzawmna thûk tak a nei ti ila kan sawi sual tam awm lo e. 'Bar thla lungrun' hi a lo herchhuah tawh chuan X-Mas kan hnaih a, kum thar kan hnaih zual zel a ni tih kan hria a. Engtin emaw tak hian kan rilru hi a awm a, min mawlh emaw ni dawn ni, kan ti deuh huih thei hial asin.
Zirna avang te, eizawnna avangtea ram hla tak taka khualchan changte pawh hi he hun a lo thlen hi chuan an rilru hi tih danglamin a awm ve ngei hian ka ring ṭhin. Ṭhenkhatte chu lenrual lungduh ngaih vangte pawh kan ni ang. Ṭhenkhat erawh di zun ngaiin, phurhzawh loh zuna uaite pawh kan ni ang. Ṭhenkhat dang lehte chu duhtak sûn tawh, lungngai taka indawm kûn tawhte pawh kan ni ang. Chutih rualin, ṭhenkhatte chu mahni lum luma lum, changpat cheh chhum ang maia tal ve mai mai te pawh kan ni mai thei e.
Eng le khaw le, chuti ang mi chu an ni emaw ni lo emaw; eng ang mi pawh ni ila, kumpui sul a han vei a, he 'Bar thla lungrun' a lo herchhuah meuh hi chuan khawtlang lunglen tal hi, mi tute mai pawh hian an phûr ve ngei tur a ni.
Ni e, an phur ngei ngei ang; ka ring!
- Vanlalzawma, Muallungthu