Champhai Hnahsin Kût ah
October 17 khan MJA leh Mizoram sorkar home department buatsaih ciber crime seminar hmawrbawkna Cham-phaiah neih ka chhim ve a, ka kal chhan piah lamah kalve chak chhan Hnahsin Kût ka chhim ve a, a ropui khawp mai.
Seminar hlawhtling tak kan neih zawhah Eldorado homestay-ah Champhai MJA-te nen zanriah kan kilho nghal a, a va hlimawm tak em! Chutih rual chuan Champhai MJA President hlun Pu Lalhmingmawia Pachuau erawh natna khirh tak tuarin min rawn zawm ve thei lo a, kan tlawh nghe nghe a, a lainatawm khawp mai.
Kal chak chhan ber Hnahsin Kût neihna hmun turte chawhnu herah kan fang kual lawk a, a hmun a remin a nuam hle. Ṭhalai tam tak chu tent kaihin an inkulh hlawm a, nuam an va ti tak.
Zirtawpni zan chu Kût khar zan a ni a, sawi ve reng rengah tiin Mizopa tlawmngai, engmah ui nei lo emaw tih mai tur Champhai Sub-Headquarters President Pu F. Lalrinmuana @Mamuana te nupate nen Zokhawthar kan zu kal a, a lo danglam tawh viau mai. Burma sipai an awm tawh lo a, mipui sipai an tih mai PDF-in an awp tawh a, a thlamuanthlak letling hle.
Hnahsin Kût kharna ka kal chak chhan ber erawh kan thleng thei ta lo. Zan dar 8 velah an ṭan a, kan tlai deuh bawk a, a panna kawngah mihring leh lirthei an tam lutuk a, darkar 3 teh meuh kan tàng a, a hmun thlen ngaihna a awm ta lo. Mahse, a boruak leh mihring tam lutuk haw zut zut hmuh kha ka hlawhtlinaah ka chhiar ta mai.
Champhai ka kal lohna a rei ta deuh a, a panna kawng a lo nuam tawh em em mai a, tlan chak deuh phei chuan darkar 4 hma deuh pawn a lo thlen theih tawh reng mai. Tun hmaa Dulte, Kawlkulh leh Khawzawl kan tlawh ṭhin kha kan tlawh ta lo a, heng khaw awm dan leh ralkhat aṭanga a lanna pawh a awm ta meuh lo.
Chu'ng khua kan tlawh tak lohah chuan kawng a zal nuam a, a ṭha lai phei chu tlan a nuam par par hle. Kawng laih thar a nih vang erawh leimin a la tam deuh a, chu chuan Furah kal a tihrehawm deuh tih mai a ni.
Champhai khawpui pawh a lo ropui tawh hle. Building ṭha tak tak a ding khep khup tawh a, an in sak aṭang ringawt pawh pawisa an ngah tawk tih a lang reng mai.
Champhai leh a chhehvel hi mikhual (tourist) hip thei khawpin hmun an nei nuam a, hotel pawh a lo tam. Homestay pawh a awm thluah tawh a, circuit house te, tourist lodge ah kher thleng lo pawn hmun nuam an siam thluah tawh a, ziaawm tawh tak a ni.
Champhai hrim hrim hi nuam ka tih hmun a ni a, mahse hnam hrang hrang ṭawng pawh pai deuh deuh an lo tam tawh hle. Burma raltlan thlengin an chim nasa tawh a, mahse VC leh YMA an ṭha a, an en zui uluk viau turah a ngaih theih.
Hnahsin Kût lamah let leh lawk ila, organising committee lam an inpuahchahna a ṭha tluan lo deuh niin a lang. Mipui an tam dawn tih a lang reng a, traffic control turin traffic police leh police pangngaiin an vil hneh mawlh lo. An awm mai mai erawh a ni lo. An vir buai nasa a, an hah viau ang.
Kum dangah an ti leh dawn a nih chuan organising lamin ruahmanna siam ṭha deuh tawh se, lirthei control turin Zotlang YMA ṭhalai han ruai se, mumal takin lirthei control se a ropui dan a dang viau ang.
- Lal Rinmawia