NEDP Faksel chhin ang aw!

New Economic Develop-ment Policy (NEDP) hi NLUP-in a hrinchhuah, Pu Lal Thanhawla Ministry-in NLUP thlakna tur policy thar a kenkawh ṭan a ni a. Kumin 2016 April aṭanga March 2017 thlenga hman tur cheng vaibelchhe 250 Assembly a passed tak kha a ni. He policy thar hi chu a la thar em a, mipui leh a policy/ programme enkawltu tur Department te pawhin tunah (July 2016) hi chuan kan la hmelhriat hrilh loh em avangin fakselna thu han chhak chhuah nghal ngawt chu ‘buan ahmaa kherh’ a ang hle thei a. Amaherawhchu, kan hotute thiltih dan leh a policy bu han chhiar chian chiah hi chuan NEDP hian fak leh selna tur a nei ve nual a, point 3 vel ve ve tal enchhinna siam ta ila-

1) Pu Thanhawla Ministry hian, mipui retheiten leirem an rah ve nan tiin, cheng vaibelchhe 2873 lai sen huamin, NLUP sum chu mipui hnenah kum 7 (sarih) zet a sem ṭhin hnuin a hlawhtling tawk lo a, siamṭhat ngai laite a awm ṭeuh a. Zawlnei Jeremia’n ‘Damdawi tam tak i seng thlawn ta, i tan damna reng a awm love’ (46:11) a tih ang chauh kha a ni tih kan sorkar hian a hriat vang pawh a ni ang e. Zawlnei Isaia’n, ‘A chhe lai siamṭhatu, mi awmna tura kawngte siam ṭhatu’ (58:12) a tih kha zawm diktu ni pah fawm turin NLUP aia tih dan kawng ṭha zawk sorkar hian a dap fuh taah a in ngai a ni awm e.

2) NEDP-ah hi chuan NLUP anga a thlawna mipui hnena sum sem ai chuan ram leh mipui mamawh thil tam tak, kum 7/8 chhung lai lo hlamchhiah tawhho, entirnan kawngpui siamṭhat/ thuam ṭhat te, tuikur leh irrigation siam te, damdawiin chei ṭhat leh School building sak/ repair te sorkar Department kaltlanga thawh tum a ni. Tin, MLA bial hrang hrang mamawh chi tam tak leh mamawh ṭul zualte ṭanpui zawm zel tum a ni bawk a, hengte hian sorkar laka sawiselna tam lutuk a ti ziaawm deuh mai thei.

3) He policy thar enkawl dan tur duan fel leh enkawlna kawngah, sorkar kalphung ṭha tak hmangin, planning Department staffs (economise adviser-te) chu a buaipui nasa bertu niin a lang. Tin, P.M. Modia’n ram pum leh State te tana hmaswnna kalkawng a duan sa chu he NEDP hian a remchan dan angin hman
ṭangkai a tum tih a hriat bawk a; chu bakah NEDP atana cheng vaibelchhe 250 Assembly-a passed mai bakah khan cheng vaibelchhe 20 dang Assembly passed ve pawh ṭul tawh lo (pawisa chuang bang?) chu kan C.M. chuan he NEDP a hman tel tur thu a sawi bawk. Tichuan, he cheng vaibelchhe 250+20 = 270 hi tun aṭanga March 2017 thleng (thla 8/9 chhunga) Zoram hmun hrang hrangah hman dik a nih chuan Zoram hian kawng engemaw zatah chuan hmasawnna kan hmu ngei ang. Mahse hun a tawi tawh em avang hian hna thawktu Department te erawh an tan nasat a ṭul hle dawn a ni.

Heng bak pawh hi NEDP fakawmna tur, hunin a la hril turte pawh an la awm nual mai thei. Tunah erawh a selawmna sawi ve theih tur lam hawi ta ila-

1) He NEDP atana sum hman tur cheng vaibelchhe 250 chu kan Mizoram Financial Budget 2016-ah khan a sum hman dan tur ruahmanna tel miah lovin passed a ni tawp kha thil maksak (danglam) tak a ni. March/ April 2016 aṭanga March 2017 (kum khat chhung) thlenga hmanna tur chi hrang hrang - thlai chin tur etc. te chu Assembly hnu a ngaihtuah chawp/ din chawp policy chu May ni 12-ah chauh tihchhuah a ni a, chu pawh chu mi sawm bik tlemte telna ‘seminar’ ah a ni. Project hrang enkawltu tur Department te, opposition MLA te leh Ruling party MLA engemaw zat pawh khan he NEDP sum hman dan tur hi an hre bik lova, a! he ‘back date policy!’ (6 months back date annual program!) hian Zoram mipuite retheihna hi eng tin nge hna a thawh ṭhat theih ngai ang le? ‘A letlinga vuttui thlawrbel’ an sawi hi a ang hle lo maw?

2) NEDP bu-in hna thawh dan tur (schedule) a tarlan dan chuan Agriculture lam (thlai chin etc.) leh hna dang tam ber chu March/ April 2016 a
ṭan vek tur (thlai chin tur etc) a ni a. Mahse Mizo mipui thlai chingtu turten July 2016-ah pawh he policy-in a tih tum dan kan la hre lo a ni a. August/ Sep. thla lamah Sawhthing te, Serthlum te, Balhla te Grape leh Iskut etc. te sorkarin min chin tir an tum em ni? nge, chin loh thlai leh thei chi hrang hrangte chin hman loh man (bill) kan dawng vek dawn em ni ang le? kan P.M. Modi-a hian hria se eng tin ngai ang maw? mi ṭhenkhat sawi dan chuan ‘Aizawl khawpuia kawngpui kama bawlhhlawh bawm hunte hi Pu Modi-a chuan a ngaih pawimawh em avangin satellite-in a endik vek e an ti hial si a.

(3) Kerela State chuan an sorkar leiba cheng vaibelchhe sing (10000) a tling tih an hriatin an Finance Minister TM Thomas Issac-a chuan an State chu tluchhe ta hlea ngaiin chu an leiba rulhna tur chu a hna dang zawng aiin buaipui/ ngaihsak berah a neih a. Kerela-ah hian mihring awm zat Mizoram let 34 vel an ni a, tichuan an State a mimal tinin Rs. 3000/- (sangthum) vel ṭheuhin sorkar leibat chu an in chan sem thei ang a ni. Keini Mizoram hian cheng vaibelchhe sang sarih vel leiba nei tura chhut kan ni a, chu chu mimal tin hian, Rs. 70000/- (sing sarih) vel ṭheuha leiba insem thei ang kan lo ni. Mahse kan tun sorkar hian, leiba neih hi a enghelh vak lo nge ni, cheng vaibelchhe 20 (sum chuang bang liam Assembly-a passed ngai tawh lo) chu leiba rulna lam aiin NEDP atan bawk hman a tum a ni. Tichuan, he kan NEDP atana sum hman tum dan hian, sorkar sum bat chhawk zangkhai aiin, bat belh zelna kawng khat, chin loh thlai leh thawh loh hna te thawk anga dawt bill siam/ rulh nan kan hmang dawn em ni le? Zawlnei Isaia’n ‘In humhimna dawt thu hman pawizia leh hrem hmabak a sawi chu (28:15, 17) kan NEDP hi a ni thei mai ang em? A! Zawlnei Jeremia’n ‘Kamite hliam tur chu duhdah takin, a
ṭha alawm, a ṭha a lawm tiin an thawi a, a ṭha hauh si lova” a tih ang kha he NEDP hi a ni thei mai lo maw?

- H. Lalhmachhuana, Zobawm