Kohhran Upa leh Pastor thite Biak inah vui zel ang u

Keini Presbyterian Kohhran te chuan kan Upa te leh Pastor-te an thihin an ruang te Pathian Biak Inah la lutin an hun hnuhnung hmangin thlahna leh vuina hun ropui tak kan nei ṭhin a. Hei hi mitthi, Lalpaa thite kan chawimawina ropui tak, tih chhunzawm zel tlak niin ka hria. Hetianga chawimawi leh thlah hi an phu hle a ni.

Tun hnaiah mi ṭhenkhatten Kohhran Upa leh Pastor thi te ruang biak ina lakluha vuina hun serh neih zawm leh nghal a hautakzia leh mitthi ruangin biak in a tibawlhhlawh ang hialin an sawi a, hei hi thil awmzia an hriat loh vang a ni. “Mitthi ruangin biak in a tibawlhhlawh” tih hi Thuthlung Hlui dan Number 19:11-16 an tlawhchhan niin a lang.

Mitthi ruangin a tihbawlhhlawh chu: Thuthlung Hlui hunah khan mitthi ruang khawihtu chu ni sarih chhung a bawlhhlawh a, a khawihtu chu ni thum niah leh ni sarih niah thenfaina tuia intihthianghlim a mamawh a. Chutianga an tih chuan an lo thianghlim tawh ang - an tih loh erawh chuan an bawlhhlawh reng ang. Chutiang mi chuan Lalpa biak buk leh Israelte riah buk a tibawlhhlawh a, Israel mite zing ata ensan tur a ni a, khua leh tui nihna paihsak tur a ni. Riah buk hmuna buk chhungah mi a thihin a chhunga awm te leh a bula lo lut apiang ni sarih chhung an bawlhhlawh a ni. Bungbel leh tuibel chhin loh thlengin ni sarih a bawlhhlawh a. Indonaa thi ruang, ṭam laka tlu hlum ruang, mihring ruh leh thlan khawih apiang te chu ni sarih chhung an bawlhhlawh a ni, (Num. 19:11-16).

Intihthianghlim dan tur: Mitthi ruang khawih chungchanga serh leh sanga bawlhhlawhna hrang hrang vanga mi a eng emaw ber hmanga a lo bawlhhlawh chuan hetianga thenfai tur a ni: Mi thiang, bawlhhlawh lo, puithiam ni kher lovin novin tui luang lai a suak ang a, a tui suahah chuan bawngla vap siam sa kha a phul ang a, tah chuan husop a chiah ang. Chu chuan buk te, a chhunga thil awm zawng zawng te, a chhunga mi awm zawng zawng te a theh ang a. Chutiang bawkin ran thi ruang te, tlu hlum ruang te, mihring ruh leh thlan khawihtute chu a theh ang. Mi thiang chuan tui leh bawngla vap chawhpawlh chu husop-in ni thum ni leh a ni sarih ni chuan a theh ang a. A thehtu chuan a silhfen a sufai ang a, a inbualfai bawk ang a; tlai lamah chuan amah pawh chu a lo thianghlim tawh ang. Hetianga an intihthianghlim tawh chuan riah bukah leh biak buka hmun thianghlimah an lutin an kal thei tawh a ni, (Num. 19:17-19).

Hei hi Mosia dan a ni: A chunga dan thupek hi Mosia dan, Thuthlung Hlui dan a ni. Genesis, Exodus, Leviticus, Numbers leh Deuteronomy te hi Mosia lehkhabu (Pentateuch), Dan bu (Torah), Dan bu panga an tih te a ni. He dan hnuaiah hian sakhaw serh leh sang dan a tam em em a, tunah hian kan sawi vek seng lo ang a, mitthi ruangin mi a tihbawlhhlawh chungchang leh Mosia Dan laka ringtute kan fihlim dan kan thlur bik ang. He Mosia dan hi “Dan anchhia” (Gal.3:13), “Min chelhtu (dan) (Rom 7:6), “Lehkha ziak hlui” 9 Rom 7:6), “Thihna dan (Rom 8:2), “Thihna rawngbawlna lunga hawrawpa ziak”, (2 Kor. 3:7b) ti te a sawi a ni. He bawlhhlawhna laka intihthianghlimna, Mosia dan hman hi Thuthlung Thar hunah hian ringtuten kan hman a ṭul tawh lo. He dan anchhia bawlhhlawhna leh thihna lak ata hi Kristan ringtute chu min chhanchhuak tawh, engtin maw? “Krista chu kan aia anchhe dawng lo niin, Dan anchhe lak ata min tlan chhuak ta (Gal.3:13), chu vang chuan ringtute chu “Dan rorela awm kan ni tawh lo va, khawngaihna rorela awm kan ni ta (Rom 6:14b). Tichuan Krista taksa avangin Dan kawngah tihthihin kan awm ta (Rom 7:4b).

Tichuan he Mosia dan, mitthi ruang laka bawlhhlawhna, "dan anchhia” hian ringtute nunah thu a nei pha tawh lo, Krista rualin a thihsan tawh a, Krista rual vekin kaihthawh a nih tak avangin Danin a chungah thu a nei phak tawh lo, (Rom 6:1-8), tichuan Dan laka “zalen” kan lo ni ta, min chelhtu dan ata thlahin kan awm ta, (1 Kor.9:1; 1 Pet. 2:16; Rom 7:6). Mosia danin min phuar phak tawh lo, Lalpa chu fakin awm rawh se.

Dan anchhe lak ata chhandam, ringtu inpawl khawm te chu “Kohhran”, “Krista taksa” an lo ni ta a (Ephe. 1:23); “a taksa peng te” kan ni, (Ephe. 5:30). “Chung mite chu thisena hrin an ni lo va, tisa duhzawnga hrin an ni hek lo, mipa duhzawng pawha hrin an ni hek lo a, Pathian hrin an ni zawk” (Joh. 1:13). Tichuan “Beram no hmelhem lo leh bawlhhlawh kai lo thisen ang a Krista thisen hlu chuan tlan…” kan ni ta (1 Pet. 1:19).

“Sualna leh thihna dan (Mosia dan) ata” chhuak tawh ringtute chu Thlarau hruaiin an awm ta (Gal. 5:8). Dan hnuaia awm kan ni ta lo, khawngaihna rorelna hnuaia awm kan ni ta. “Thlarau hruaia awm apiangte chu Pathian fate an ni” ta (Rom 8:14). “Thlarau ngei chuan keimahni thlarau nen Pathian fate kan ni tih min hriattir thin” Rom 8:16). “Amahah chuan Thlarau Thianghlim tiam chuan chhinchhiahin in kan awm” (Ephe. 1:13). Tin, “Tlanna ni (mithianghlim lawr, lei rap lo va Krista lokalna - 1 Thes. 4:13-180) atan chuan amaha chhinchhiahin” kan awm bawk (Ephe. 4:30). Thlarau Thianghlima chhinchhiah kan nih tawh avangin leiah hian mikhual leh khualzin, mi cham mai kan ni ta a, mi thianghlimte nen chuan tualkhat leh Pathian chhungte, chi thlan, lal puithiamho, hnam thianghlim, Pathian mite ngei kan lo ni ta (Ephe. 2:19; 1 Pet. 2:9). Tichuan Thuthlung Thar ringtute chu “Dan rorela awm kan ni ta lova”, “khawngaihna rorela awm” kan nih tawh zawk avangin ringtu thi ruangin “engmah” leh “tumah” a tibawlhhlawh phak ta lo, Pathian biak in pawh an tibawlhhlawh lo. Chuvangin mitthi laka bawlhhlawhna hian ringtute chu a phuar phak tawh lo a ni.

Thuthlung Tharah chuan “mitthite” chu “Lalpaa thite” (Thup.14:13), “Kristaa thi” te (1 Thes. 4:16), “Isuaa muhil” te (1 Thes. 4:14) an ni ta zawk a. Chung mite ruang chuan an Pa in, Pathian biak in leh mi dang Thuthlung Hlui mitthite angin tumah an tibawlhhlawh lo, anmahni taksa ngei chu Pathian hnen
aṭanga an hmuh, an chhunga awm “Thlarau Thianghlim in” a nih vangin. Chumi avang chuan mitthi, Lalpaa muhil, kohhran upa leh Pastor te ruangin Mosia dan angin Biak in an tibawlhhlawh lo e. Hetianga Mosia dan sawimawitute hi Thuthlung Thar ringtute an ni lo a, Thuthlung Hlui ringtu, Dan hnuaia awmte an ni. Khawngaihna hi an pawm lo va, Mosia Dana rawngbawl a, thiltih leh mahni felnaa in chhandam an tum ṭhin a, boralna rama leng an ni.

Biak Ina vui an phu e: Krista thihna leh thawhlehna avangin ringtute chu “Pathian chhungte”, “Pathian nung Kohhranho”, “thutak ban leh innghahna” an ni ta a (1 Tim. 3:15). Tichuan, kohhran upa leh Pastor te chu kohhran chawmtu, enkawltu leh kohhran ban atana siam an ni, (Thup. 3 :12). Kohhran ngui leh chauh chang pawhin theihtawp chhuahin a kula taiah an ṭang a. Kan thlarau ngui leh chau, rilṭam leh tuihal chu tui leh chaw ṭha awmnaah min hruai ṭhin a, Kohhran te tan berampu an ni tak meuh a ni. Rinawm taka rawng bawltu an nih avangin beram vengtu lalber lo kal hunah “Ropuina Lallukhum,” vuai thei lo chu an la chang dawn a ni (1 Pet. 5:1-4). Hei hi an dinhmun a nih avangin an damlai ni liamin an hun hnuhnunga chawimawina hlana an ruang biak ina inkhawm puia thlahna kan neiha kan vui nawn ṭhin hi an va phu tak em! An ruangin an Pa in a tibawlhhawh si lo. “Tun hnuah chuan mitthi, Lalpaa thi te chu an eng a thawl ang; Thlarauvin, a ni, an thawhrimnate chu an chawlhsan tawh ang; an thiltihte chuan a rawn zui ve dawn si a” (Thup. 14:13). Krista tlanna avangin Thuthlung Hlui huna mite ai chuan Thuthlung Thar huna ringtute chu kan zalen ta zawk a, min phuartu leh chelhtu a awm ve ta lo a, zalen kan ni ta, (Rom 7:6; 1 Kor. 9:1; 1 Pet. 2:16).

Chawimawina ropui: Kohhran ziaktuin a damlaia Lalpa leh kohhran tana a rawngbawlna te Pulpit tlangah meuha a han sawi chhuak te chu a chhungte tan chuan a hluin a va ngaihnawm tak em! Chumi zawhah Chairman, Bialtu Pastor chuan “Thlamuanna Thuchah” sawi turin Presbytery Moderator a sawm a, Moderator-in thu a han sawi zawh chuan lungchhiat, ṭah, mittui tlak a tireh deuh duak mai - min thlamuan teh e. Chubakah Kohhran Zaipawlten puandum batin thlahna hla an han sa ve leh chu a ropui lehzual, ṭhen lohna ram min ngaih zualtir. Hun serh tawp nana a thlahna hla kan han sa a, ruang chungah lawm lungchhiat vanga mittui nena kan han lam te chu “thihna hnehin” kan lam a ni berin ka hria. Biak in kawta Kohhran hruaitu hrang hrangten thla an han lakpui leh sup sup chu a chhungte tan a lawmawmin a van ropui tak em!

“Tunlaiah inphumna a hla”, “Inzawn hah hrep a ngai”, “An nupuite kuang bula thu an zak, an hawi chhuak ngam lo”, “Upa hoin a nuam chinah an lo zawn”, “An ruangin biak in a tibawlhhlawh”, “Hnam dang, sap tihdan kan la”, “...chu chuan biak ina vui a duh loh” tih vel mai maia kohhran thiltih sawiseltute hi an chiang lo a ang ka ti. Lalpa berampu Kohhran Upa leh Pastor thi te Biak ina vuina hun serh leh anmahni chawimawina neia kan inkhawm pui ṭhin hi titawp mai loin Isua Krista ropui nan i ti chhunzawm zel ang u; chawimawi an phu si a.

- Biakhmingthanga Chhangte

Kolasib, Vengthar