Ram leh hnam chhanin ruihhlo leh zu i do ang u

Tunlaiin kan ramah 'Zu' leh 'Ruihhlo' a hluar hle mai a, mi tinin kan hriain pawi kan ti em em ṭheuh mai a nih hi! Um bo turin kan sawrkar pawhin hma a la ṭha em em a, Excise & Narcotic Department-te, Assam Rifles leh kan Police-te leh YMA-ten a thim a var pawh thlu loin, zan mu pawh chhing hman loin an bei a, ṭhahnemngai taka lo kaihruaia an thil hriat ruk ang angte lo kawhhmuhtute zarah man pawh an man theiin, an man tam nangiang mai a, a lawmawm tak zet a ni. Chuti chungin kan ṭhalaite'n ruih tur an la hmu reng mai si hi a va pawi tak em!

Zirlai naupang ti chhin ve ṭan pawh an pung zel nitein an la sawi ta deuh deuh! Hawh teh u, chhungkaw tinah bul ṭanin ruihhlo laka fihlim turin i lo inenfiah ve teh ang u, chu chu kan ṭangkai ve theihna hnaivai ber a ni ang a, tin, a thawktute hnenah pawh kan in-report hreh hauh lo tur a ni.

Kan rinchhan bul ber YMA-ah bawk innghat ila, anni'n tlawmngaih lo chhuah leh hram se, Central YMA-in branch tin hruaitutte kokhawma zirtirin han fuih phur se la, branch hruaitute'n an section ṭheuhah In kawkipin han chhui chhuak se la. Zu leh damdawi zuartute leh lo kaihruaia lo ṭanpuitu zawng zawngte, zu in leh damdawi ti ṭhin kan hriatte, ṭhenawm khawveng, kan bulhnai pawh ni se report hreh hauh lo ila. YMA chu kan ta ni vek tho mah se, kohhran tin leh kohhran ṭhalaite MHIP leh MUP-te nen lam, 'Aw' neiin support vek bawk ila, a takin thawk ṭheuh ila, hnehna puang thei ngei turin Pathian i au teh ang u. A lama kan ṭanzia lanna tur pawimawh tak a nih bawk avangin hlawhtling tlakin theihtawp chhuahin, kan theih vena zawnah ṭangkai i tum ṭheuh ang u. Kan Pathian duhzawng a ni ngai e.

Hnenah chu Lalpa ta a ni si a, Amah chawimawi nan hnehna hla do kan la chham ngei ang.

- Parama, Kulikawn