YMA a kal dik e

Tun hma lama YMA-in ram leh hnam tana thil ṭha tam tak an lo tih tawhte leh hun eng emawti lai aṭanga demna leh rinhlelhna, sêlna ânkâ lo awm bawk ṭhinte nen, negative leh positive lam kha chu dahṭhain, tunlai chhoa YMA kal dan hian min tilawm ru hle mai. Tun hnai chho hian Central YMA hi a fim sawtin a huai sawtin ka hria.

Social media-a birth certificate siam thei nia inchhal te, driving license dik lo taka siam ṭhin te, thil veiawm em em, kum 18 an la pumhlûm loh vanga thil sual tih hreh lo leh chimawm em em te, sual bul inṭanna leh tihpunlunna zan lama inhawr khawm ṭhin an khuahkhirhte hi a va ṭha em. Heng thila CYMA-in hma a la chat chat hi an ti dik e.

Motor document leh license vel hi chu computerise vek a nih tirh chhoh vel kha chuan a fair hmel viau a, mahse, hun a lo kal leh deuh a, awlsam taka siam thei an lo awm chho leh ta a nih kha. Hei hi tun hnaivai mai thil ni lo, a rei leh tawh ang.

Sum kan duh luat vanga mikhual hnena in hmun lo ram kan tawktarh nasa lutuk leh document eng eng emaw siamsak kan ching lutuk hi chu a la pawi dawn chauh. Ram leh hnam humhalh thupui neitu YMA hian he lam hi rawn ngaihven nasa zel teh u. Mikhual license nei an tam vang emaw ni, taxi, a bik takin two wheeler taxi-te hian Aizawl chhunga kan kalna tur kan sawi hre lo hi an tam mai.

Aizawl mai bakah, Mizoram puma thil dik lo inthup langsar tam tak, ngaia kan neih tak titih leh kan enliam tak mai mai tam tak hi YMA hian han thur nghauh nghauh u la, a tawp thlengin, sawrkarin action a lak tawp thlengin tha thlah lovin han um zui zel teh u. Sawrkar pawh hian vantlang hriat khawpa thil dik lo titute chunga action a lak dante hi chu han puangzar ve ṭhin se la, mi dangin thil dik lo tih an hreh phah deuh ang. Amaherawhchu, puanzar vek chi loh tam tak chu a awm ngei ang.

Social media-a zak thei lo taka birth certificate kan siam thei titute leh, Transport department-a DTO chauh ni lo, mi dang mawhphurtute chunga action lak dan talte kha chu mipui nawlpui hian hre ve ila, thil dik lo titute chu mualpho se la, mipui rilru pawh a dam deuh ang a, mi dangin thil diklo tih kan hreh phah deuhin a rinawm.

Sawrkarin ram tana ṭha tur nia a hriat, a hmalakna tiṭhuanawp zawng ni lo, sawrkarin a tih tur ti turin finchhuah zel u la, tih tur han pe zat zat teh u. Political party-te leh eng pawl pawl emaw ni, hming ropui tak tak leh ṭha deuh deuh inphuah ṭhinte-ah hian rinna nghahtlak tak tak a nih loh hi.

YMA a kal dik e. Kan vaiin theihtawpin i YMA leh ang u.

- K Hmingthankaia