Mi hla sak dawnin a phuahtu/neitute hnen aṭangin phalna lak a ngai em?

THUHMA

Digital khawvelah kan cheng mek a, Mizoramah pawh thingtlang kil tâwp lam thlengin internet chak ṭha pangngai kan hmang thei ta fur a nih hi. LPS lamin Icon an buatsaih pawh LPS Vision pawt kher lovin YouTube lamahte man chawia a en theih tak avangin tunlai Zoram khawvel titi luahtu pawh a ni mek awm e.

Live hian kei ka la en pek lo va, mahse, hriat loh pawh tum ila social media lamah hmuh turin hmun a luah hneh em avangin hriat loh luih theih a ni lo. Hetih lai hian, Mizote ze ṭha lo deuh, kan hriat tawk loh vang pawh a ni ang, a lo lang ve mek bawk a; chu chu thil namnûl mai mai leh en liam mai mai hi a ni.

Icon intihsiakna aṭangin mite inhnialna pakhat a lo chhuak a; chu chu icon contestant pakhatin mi hla a sak chu a phuahtu a lawm vak lo niin a lang a; YouTube lamah pawh a thusawi hmuh theihin a awm nghe nghe. A lungawi lohna chu mi tam tak chuan ho an ti viau thung a, amah an dem lêt titih rualin amah lo ṭantu pawh an awm ve bawk. Mipui kan thuhmun fo thei lo tih tichiangtu pawh a ni e.

Kan hnam la naupan vangte leh hmasawnna lama kan la hnufual avangte’n dan ang hian thil engkim hi ram changkang angin a la kal ve thei diak diak lo a, inhriatthiamna khawvelah kan la awm vek mai a nih hi. Mi’n an lungawi lohna an sawi chhuah phei chuan phuanchiar leh uikawm nihte an hlawh ta daih ṭhin bawk si a.

Chuvangin, hnam pui zawk leh changkang tawh zawkte’n mi hla an sak chungchangah hian engtin nge dan an lo neih leh, an kalpui ṭhin tih hi a tlangpui kan thuziakah hian kan tarlang dawn a ni. Heng thilte hi internet lamah chhiar theihin a awm vek a, sap ṭawngte a lo ni nen mi nâwlpui chuan kan chhiar peih chuang si lo. Chuvangin, kan thiam ang tawkin Mizo ṭawngin kan lo dah chhuak a ni. Sap ṭawng tlanglawn Mizo ṭawnga dah harsa a awm nual a, kan hrethiam vek thoin a rinawm.

Hla phuahtu pakhatin a hla phuah miin an sak chungchanga a lungawi lohna Facebook lama mite comment-naa kan hmuh tam berah chuan, Icon-a 'The Beatles Night' an hman khan, “Beatles ho kha an hla sak an dil bik em?” tih te, “American Idol-ah pawh an hla duh duh an sa alawm, an dil ngai lo,” tihte hmuh tur a tam hle mai.

Hre chiang lova thil sawi phawng phawng mai ching kan tam si a. Chu chu ṭhenkhatin thu dik emaw tiin an lo awih ve leh zel mai bawk si. Thil nihna dik tak hre loin, thil dik lo pawh kan ngaihdan chinah kan pawm dik thlup mai ṭhin hi a ṭha lo a ni.

Sap kan tihho hi chu hnam upa leh fing hmasa an ni bawk a, engkim mai hi a nih tur ang, a bu ang thlap maiin an kalpui thei tawh bik a, an awhawm khawp mai. Mizote chu dan hmang inkhinte hi a tâwpkhâwkah lo chuan kan hreh em em hlawm a. Chuvangin, dan hi a nihna anga a kal ai chuan, inhriatthiamnain kan inen tlang leh mai ṭhin a nih hi. A lehlamah chuan a nawm rualin, a tuartute tan erawh a huatthla la hle thung awm e.

Mizoramah hian ram changkangte angin thil hi a nih dan tur anga kalpui a la harsa viau tih kan hre vek ang a. Tin, thu leh hla khawvelah hian publisher leh producer pangngai tak pawh kan la neih chiah loh avangin copyright hi chu a phuahtu leh ziaktute’n an nei zel ti ila, kan sawi sual lo ang chu.

PHALNA LAK A NGAIH CHHAN

Intihsiakna hmun leh mipui hmaahte mi hla kan sak dawn chuan a phuahtu emaw, copyright neitu emaw hnenah phalna lak a ngai. Hei hi khawvel ram dang leh India ram danin a kalpui mek a ni. India ram leh khawvel ram danga an dan hman kan sawi kawp ang.

i. Copyright law-ah chuan hla phuahtu, thuziaktu chuan neitu nihna a nei vek a, tihchhuah chhawn (reproduce), sem darh (distribute) leh tar chhuah (display) a nih dawn apiangin phalna lak a ngai ṭhin. (He lai thu hi chu kan thuziak kal zel aṭangin kan hrethiam thei ang).

ii. Intellectual property hmangin hla phuah (composition), hla thu (lyrics) leh a rem dan (arrangment) chu a phuahtu tan humhalh tlat a ni.

ENG ATAN NGE PHALNA CHU LAK TUR

i. Sumdawnna thil atana hman a nih dawnin phalna lak tur a ni (e.g, selling, streaming, licensing).

ii. Mipui hmaa sak chhuah a nih dawnin phalna lak a ngai (song live, online, or on radio/TV).

iii. Sem darh tur a nihin; hei hian online, digital leh cassette/CD hmanga sem darh a huam a, phalna lak ngai bawk a ni (physical or digital means).

India leh khawvel ram dangah heng platform-a kan hman dawn pawhin phalna lak zel a ngai: YouTube, Spotify, Apple Music, TikTok, Instagram reels, SoundCloud, streaming service, radio station, live performance venue, JioSaavn, Gaana, Wynk Music, etc.

PHALNA LAK LOH VANGA A NGHAWNG THEIHTE

i. A neitu phalna lak loh avanga dan bawhchhiatna (copyright infringement).

ii. Court case neih theih a ni (lawsuits).

iii. An dahna hmun (eg: Youtube) aṭanga lak thlaktir (takedown notice).

iv. Sum chawitir (financial penalty).

v. Mi thu leh hla hlutna tihchhiat leh a zahawmna tihbawrhbansakna (damage to reputation).

A NEITU DIL NGAI LOA HRIATTHIAM THEIHTE

i. Vantlang hman atana pho chhuah (public domain) a nih tawhin. A bikin USA lamah chuan kum 1923 hma lama hla phuah/tihchhuah hote a ni. India ramah chuan kum 1947 hma lama hla phuah/tihchhuahte copyright-in a huam tawh lo.

ii. Inzirtir nan, education lamah te, fakselna atante hman phalsak a ni (fair use).

iii. A phuahtuin phalna a lo pek tawhte (creative commons license).

India ramah hian mi hla, phalna nei loa sak chhawn hi Indian Copyright Act, 1957-in a humhalh tlat avangin, mi hla sak dawn chuan a neitu phalna lak ngei ngei a ngai. Copyright India-in a kalpui dan chu:

i. Indian Copyright hian hla tih chhuah a nih aṭang emaw, a phuahtu thih aṭanga kum 60 emaw a liam hma chu a humhalh tlat a; kum 60 a pelh tawh chuan copyright a thi ve thei tawh thung.

ii. Online hmanga tihchhuah emaw, CD/DVD (digital) hmanga hralh chhuah a nih dawnin, a neitu phalna lak hmasak a ngai.

iii. Mipui hma emaw, intihsiakna emawa an sak dawnin, a neitu hnenah phalna an lak a ngai.

INDIA RAMA PHALNA PE THEITU

i. Indian Performing Right Society (IPRS)

ii. Phonographic Performance Limited (PPL)

iii. Indian Music Industry (IMI)

INDIA RAMA INHREMNA DAN

i. Copyright bawhchhiatna

ii. Court-a dan hmanga khinna, case siamsak

iii. Rs 2,00,000 thleng inchawitir.

iv. Kum 3 chhung lung in tan.

AMERICAN IDOL LEH INDIAN IDOL-A MI HLA AN SAK DAWNA CONTESTANT-TE DAN ZAWM NGAITE

i. Audition-ah hian mahni hla phuah emaw, mi phuah emaw, mite la hriat lar loh hla chu sak phal a ni lo (no original compostion). He tih rual hian, American Idols-ah chuan hriatthiamna bik vawi hnih a lo awm tawh a; Kelly Clarkson-in he show atana a phuah ‘A moment like this’ tih leh, Carrie Underwood-in ‘Before he cheats’ tih a phuah chu intihsiaknaa sak tur leh record atana dan zawm ngai a zawm hman avangin.

ii. Contestant-te chuan a buatsaihtute’n a neitute hnen aṭanga phalna an lo lak tawh sa, sak theih tura hla an dah chhuah aṭang chauhin an hla sak tur an thlang thei.

iii. A buatsaihtute’n copyright leh thil dang engkim a felfai vek a ni tih an hriat chian chauh contestant-te’n an sa thei.

iv. Hla inchuh, a phuahtu hriat chian loh hlate sak phal a ni lo.

HLA SAK TUR FELFAI TIH HIAN HENGTE HI A HUAM

i. Show siamtu (producer)-te chu music tichhuaktu/phuahtu (publisher) leh phalna petu (licensing authority)-te nen an thawkho tur a ni.

ii. Zai turte hla thlan chu engkim a felfai ngei tih intihsiaknaa an sak hmain a chiang vek tur a ni.

iii. Phalna hian online leh TV-a tihchhuah te, studio lama recording te, digital leh CD/DVD hmanga sem darhte a huam vek.

American Idol-a an music partner-te:

i. Universal Music Group

ii. Sony Music Entertainment

iii. Warner Music Group

iv. EMI Music Publishing

Indian Idol-a music partner-te:

i. Sony Music Entertainment

ii. Universal Music India

iii. T-Series

iv. Saregama

American Idol leh Indian Idol-a mi hla an sak man, lawmman (sum), hlawkna chu heng mite hian an lo dawng ṭhin:

i. Hla phuahtu emaw, a lo tichhuaktu (publisher) emawin.

ii. An hla sak kha a lâr chhoh dan leh eng emaw tana hman a hlawh nasat chuan, hman an phalna man zat kha a dang/sang zel dawn a ni.

TLANGKAWMNA

Felfai leh indawt dak thlarha ziah a har phian mai. A chhan chu India rama copyright an kalpui dan leh khawvel hmun danga an kalpui dante a hranga sawi loa sawi kawp zel kan duh si a. Mahse, uluk taka chhiar chuan kan man thiam vekin a rinawm tho e.

Digital khawvelah hian thil a awlsam tawlh tawlh mai a. Chutih rualin, kan ram Mizoramah chuan thil hi a la harsa deuh niin a lang a, sum leh pai sente a ngai ṭhin nen. Hla phuahtu leh ziakmite phei hi chu an la vannei thei rih lo a nih hi. Hmingṭhatna leh mite hriat hlawhna ringawt lo deuh, kut hah man, ngaihtuahna sen nasat mante hi ram changkangte angin an thu leh hla aṭang hian tel ve thei zel tawh se. An thu leh hla avanga hausa ta hi sawi tur an awm ve nuk tawh ang. JK Rowlings ten Harry Potter an millionare pui ut ut thei bik si a.

Hetih lai hian, Mizo zaimi leh hla phuahtu ṭhenkhat chuan an thu leh hlate digital lamah ti mai ila, copyright neitu nihna nei an awm ve ṭan ta nual a. Mi’n dil lovin lo sain emaw, YouTube lamah emaw an lo dah a nih pawn, a hlâwkna chu copyright neitute’n an têl zel thei dawn a, a lawmawm khawp mai.

Kan thuziak hi a sei ti in lo awm nual mai thei; heti chung hian sawi kim loh leh sawi hmaih, sawi fiah tawk loh kan la nei nualin a rinawm. A famkim lo lai a awm chuan inhriatthiamah kan ti a ni ang chu. Kan thuziak hi source dah a rem thei meuh lo bawk a, Google leh Meta AI nen ṭangkawpa kan ziah a ni tih min lo hriatsak dawn nia.

- Rohmingthanga Ralte, Nodal Officer, Intellectual Property Rights Cell, Govt. Mamit College