Chhiatna thleng leh 'Ringtu'

Nepal ramah nasa tak maiin lir a nghing vak a, mi tam tak an thi a, kan rama thleng nise kan va thi hnem dawn tak. Nepal-a lir a nghin tuk lawk aṭang khan whatsapp velah, Mizoram chu harhnain a tuam a, kan ṭawngṭai nasat avangin min hêl ti ang zâwngin thu a darh chiam mai a, hei hi chu mawl vang deuh a ni.

Pathian hian min hum a tih loh theih loh rualin, lirnghingin min hêl tih ang zâwng kha chuan dâwt kan sawi a ni thei mai awm mang e, ka ti. Manipur-ah a epicenter awm ta se, Mizoram sawi ve miah lo se, min hum kan ti ngei ang. Mahse Nepal, Kathmandu bul lawka epicenter awm khan kan awmna, Mizoram hi a hêl lo a, a rawn thleng pha lo zawk a ni. Lirnghing hi tuia lung kan vawm a, a fawn val kual pap pap ang hi a ni a, a epicenter hnaihna lai apiangah a fawn na emaw, a thawk na a, a hla tial tial a, a thawk na lo tial tial a, a zuih ral ṭhin.

Hemi avang hian Pathian hnathawh sawi mak loh emaw ka tum tihna emaw a ni lo a, Pathian min humhimna hre lo der ang zawnga sawina emaw a ni lo. Thil intu lo em em mai kan hmehbel lui hram hram ṭhin hi chu mawlna zia deuh a ni zawk.

Kha lirnghing kha Mizorama thleng tur ngei ngei a nih kan hre lo a, chutiang lo ni ta se, Nepal-a nghing ta daih nise, kan hmehbel leh kan sawi hi a dik ang.

Tin, Mizotena kan chîn ṭhin pakhat chu khawi ramah emaw, Kristian tlêmna rama chhiatna a thlenin Pathian hremna tia kan sawi fo mai hi a ni. Hetiang rilru zim kan la pu reng mai hi a ṭha lo hle.

Thuthlung Hlui ngaihdan ni âwm taka Pathian chu phuba la nghal deuh rum rum tura kan ngai ṭhin hi kan sim a hun viau mai. Misualte Lalpa leh Pathian kan tih kan tih laia hetiang ngaihdan kan nei bawk si hi a inkawkalh ve hle a, Pathian zia leh a hnathawh kan la hriat tâwk loh vang pawh a ni ang.

Kan ram bul hnai­ah chhiatna eng emaw thleng se, min hêl a ni, chuti khati kan ti thuai a, hemi phênah, sawi chhuak kher lo mah ila, thil awm chu anni chu an sual vang a ni tih hi a ni. Pathianin mitin ang khat vekin min hmangaih kan tih lai hian keini aiin kan chhehvel hnamte hi Pathianin a hmangaih lo zawk niin kan ngai a nih hmel. Ngaihdan mawl tak a ni. Pathian hnathawh mak tak mai, kan hriat chhuah thiam phak loh hi chu a awm ngei a, thil nazawng hi thilmaka chantir phêt kan tum erawh Kristiante rin­na aṭang chuan rin­na him lo a ni. Medieval age-a eng eng emaw thlarau sual lak veng theitu anga ngaihna ang kha kan hlat lo tihna a ni.

Thil thleng eng emaw hlek sawi mak phêt kan tum ṭhin chu kan thlarau mit a la meng tâwk lo tih lantirtu a ni ngei ang. 'An chutih vang, an khatih vang' emaw, 'Chuti tur chu a khati zawka' tia chhiatna thlengte sawi ṭhin lo ṭawngṭaipuiin, ṭanpui mai hi ringtute tih tur ni âwm zawk tak a ni.