Officer Aizawl Cadre!

Hman ni deuh khan ka hmelhriat pakhat hian MCS officer pakhat chanchin a sawi a, "Ani hi chu Aizawl Cadre a nia, Aizawl a chhuahsan ve thei lo. DC office bawr velah hian a kual a kual mai. Hetiang hi mi pathum vel an awm," a ti a, a sawite hi tute nge an nih hre ve lo mah ila sorkar hnathawk transfer leh posting hi chhut ngun a ngaiin rotation policy siam mai hi a ṭhat a rinawm thu ka rilruah a lo lut nghal zawk a ni.

Zirtirtu lam hian transfer leh posting-ah hian buaina neuh neuh an ngah ber mai hian kan hria a, sorkar hnathawk ni si sawn theih lohte an awm a, sawnaa kal duh lote an awm a, anni hi chu mipui pawhin an sawiselin an dem a, kan zirna chhiat chhanah puh an ni a, anni hi chu an hmingchhe sa tawh hrim hrim a. Tuna ka han hrut ve tur hi chu hmingchhe mang si lo, a ṭhenin mak ti em ema an lo ente an ni.

MCS officer senior lamah pawh hian sum tamna lama awm thei riau an awm a, heng mite hian a post hi an inchuh ni loin thuneitu lam hian 'Sum an hai chhuak thiam' tiin an dah ṭhin niin an sawi a, hei hi ngun deuha ngaihtuah chuan officer fing leh fel an nih vanga post ṭhaa awm an nihlaiin sum hai chhuak thei tih hi a negative zawng pawh a kawk theiin ka hria. Kei chuan MCS an ni emaw, eng service pawh hi rotation policy mumal taka neih hi ka duh dan a ni. A chhan chu an inthik theih bakah officer duat sual leh duat thau an awm dawn tihna a ni thei a ni.

Tichuan ka sawi tel leh duh chu MPS lam te, MF&AS lam te, MIS te, eng eng emaw service hming phuahchawp te te angah pawh hian ngun deuhin a hre chiangten an chhut an chhut chuan Aizawla awm thei em em hi an lo awm reng chu niin, hengte hi anmahni tan pawh a ṭha lova, sorkar tan pawh a ṭha chuang lova, an thawhhona (service chhungah) pawh inthikna leh inei lohna a thlen ṭhinin ka hria a, sorkar hian policy a neih ngam a ngai a nih hi mawle.

Tun anga an kal zel chuan 'Aizawl cadre' tia koh tur chi hi an awm chho zel ang a, hlawh inang, nihna inang, awmna inthlau deuh deuh sorkar officer an awm ruih mai dawn a nih hi maw... keia ngaihdanah chuan sorkar hian huaisen takin rotation policy nei ngam se, chu chu corruption dona ṭha tak pawh a ni thei ang.