MONITORING PERFORMANCE

Private school building chhia, educational facilities (laboratory, libra­ry, computer room, black/white board, playground, etc.) awm mumal lo, zirtirtute hlawh pe chhiate kan vei em em rualin kan fate hengah hian kan luhtir deuh vek lawi a. Zirtirtu (trained teacher) awmna, sawrkar ngei pawhin tehna fung hrang hrang hmanga a teh tlin ngei zirtirtu; zirna in leh a chhehvel pawh nei chhe em em lo sawrkar sikulah chuan kan lut ṭha duh tlat lo. Loh theih loh tawpah chiah kan fate kan dah ta emaw tih tur a ni.

Zirna hi mimal, pawl leh sawrkar ngei pawh hian a ngai pawimawh tih a hriat a, ngaih pawimawh tur pawh a ni. Tun hnai maiah pawh vawi tam tak kan buai luai luai a. Continuous and Comprehensive Evaluation (CCE) te, Early Childhood Care and Education (ECCE) te, Teachers’ Eligibility Test (PTET, MTET) te, sikul ṭan hma kan tihte leh zirtirtu lak reng rengah untrained an la ngai ta lote pawh hmasawn tumna zel a ni. Han belhchian tak tak chuan Mizoram Board of School Education (MBSE) leh State Council of Educational Research and Training (SCERT)-te hnathawh pawh hi namai lo tak a ni. Inrinni leh zankhaw tairek thleng thlenga lehkhabu buatsaiha office-a an awm hi a tam mai. Hma sawn kan tum a, National Curriculum Framework (NCF) mila kal dan kan zir mai ni loin, NFC-ina a tum zirna laimu tak tak kan tih kha kan hnaih ve hret hret e.

A lu lam pang chu fel fai viauin, eng anga curriculum, syllabus leh textbook ṭha pawh hmang ila, zirna sikul; a tihhlawhtlinna hmun tur bera zirlai, zirtirtu leh school environment-ina a zir si loh chuan enge awmzia awm ang? Private school hi discipline kenkawhah chuan an ṭha viau, zirtirtu inthlak ngun lutuk te, kan sawi tawh angin building leh education facilities chhe lutuk te, zirna senso tam ta lutuk te, teacher-pupil ratio inthlau te a tam mai, sumdawnna a nih miau avangin endik an ngai. Chutiang bawk chuan sawrkar school pawh discipline vawnṭhatah te, sawrkarin sum a sen tam angin zirna a hlawhtlin loh dante leh nu leh paten rinna kan nghat ngam ta lote hi uluk taka enfiah a ngai. Heng zawng zawng mumal leh felfai taka kan siamṭhat nan chuan “Monitoring Performance” kan mamawh hle.

Monitoring performance chu zirlai naupang, zirtirtu, zirna sikul leh a chhehvel an chaklohna lai leh an ṭhatna hre tur a endik kan ti thei ang chu. Zirna in chhung ngei ngeiah pawh hei hi hman theih a ni. Zirlai naupangin amahin kum tluanin self-monitor a nei thei a, chutiang bawkin zirna sikulin a zirlaite leh zirtirtute record fel tak hmangin a endik thei bawk.

Kan sawi tum chu heng zirna leh a environment hi thu neitu leh an chunga hremna dan siam theitu sawrkar aṭanga endik a ni. Chu chuan hmasawnna leh phurna nasa takin a pe dawn a ni. Thil pawimawh tam tak a awm thei ang entirnan tute chiah nge kan va endik ang a, tehfung engtin nge kan siam ang, kan teh tlin lohate chu eng hremna nge kan pek tak ang tih te. Tin, kan evaluate-in sikul tinte grade kan pe thei a, chu chuan hmasawn duhna leh hlutna thar a siam ang a, zirlai naupangte leh nu leh pa tan remhriatna a pe bawk ang.

A senso chu a hautak viau maithei mah se sawi tawh ang khian heng sawrkar, MHRD, NCERT, MBSE, CABE, CBSE etc. te thawhrimna hi a takin a puitling theiin ka ring.

Lo ti tak tak dawn ta ila zoram dung leh vangah nghawng a nei lian hle dawn a, chuvang chuan eng dan (Principles of Monitoring Performance) nge kan hman ang? Dan duansa entawn mai tur tam tak a awm a, kan duh khawp lo a nih pawn Education Reform Commission (ERC) kan nei a, a harsa lo turah ka ngai. Tum mumal tak kan nei anga a hlawhtlin theihna tur a tih ngei ngai kha chu dan a ni mai.

Eng chiah maw kan va endik dawn? A tam lutuk zirlai nu leh pate aṭang pawn information tam tak kan nei thei ang, chuvang chuan parent questionnaire te, zirlai naupangin nuam an ti em? An lungawi em? Pupil questionnaire te, School building mai ni loin a hmun a him em, ri bengchheng nuaih nuaihin a chiahpiah em? An zirlai neih zah leh an school building a inmil em? School facilities an nei ṭha em? Science laboratory, library, naupang infiamna hmun tualzawl, class room thawl nuam, white board/ black board etc. Teacher-pupil ratio enge a an, zirtirtu pakhatin zirlai naupang 50 chuang a zirtir em? Zirtirtuten thiamna an nei em? Trained nge untrained tam zawk, zirtirtute chu hlawh an pe ṭha em? Sawrkar sikulah chuan zirtirtu in naupang tih tham zirtir tur a nei lo em ni? Zirtirtu a in thlahdah em?

Hetianga kan ti a nih loh chuan khaw­vel a changkang zel ang a, zirlai a let tam takin an pung chho ang a, school a tam tial tial ang a, enkawl felfai a har tial tial bawk ang. Nu leh pa private school-a an fate kal tirtuten association an din ang a, BSc, MSc., BA, MA private school a hlawh tlemtea thawkten ṭangrualin pawl an din ang a, chutiang zelin an duh ṭheuh nawrh chhuah an tum hunah chuan kan zi leh luih luih mai dawn a ni.