Fa lak (adoption) hi

4th May, 2015

Mizo nunphungah chuan fa nei loten fa an lak dawnin an unaute fa emaw laina hnai fa emaw an nu leh pa an hriat chian, hriselna leh nunphunga mi pangngai fate an la (adopt) ṭhin. Chumi ti tur chuan naupang nu leh paten an phalna leh hriatpuitu (witness) mi 2/3 nen Khawtlang roreltu pawmpuina lain an in tifel mai ṭhin a ni.

Chuti chuan ram leh hnam lo ṭhang zel atan ziakin Mizoram Gazettee Extra ordinary No. Vol. XXXIV, Aizawl, Wednesday, 6.4.2005, Chaitra 16, 1927, issue No. 66-ah, kan sawrkar Law & Judicial Department chuan a lo dah ta a ni.

Heta Mizo Hnam Dan (Mizo Customary Law) Bung 6 - faa siam - chang 96 - 100 ah te hian chiang takin ziak a ni. Chang 97-ah fa siamtu leh siam tur dinhmuna sawi chian hnuah chang 98 (5) ah chuan, hriatpuitu puitling pahnih bakah khawtlang roreltute an ni.

Tichuan, Falak (adoption) chungchang Mizoram Gazettee Extra ordinary No. Vol. XXXIV, Aizawl, Tuesday, 28.3.2006, issue No. 209-in 1.8.2003 hnua fa lakte chu Junevile Justice (Care and Protection of Children Act, 2000 leh Amendment, 2006 ang a nih loh chuan, 'pawm a ni lo' tia Programme Manager, State Adoption Agency (SAA), Social Welfare Deptt., Laipuitlang Aizawlin Local Weekly Paper, Zalen, Sunday 1, March 2015 hian kan Mizo Dan a chunga mi ṭhiahna a lantir loh avangin a pahnih hian kan hmang kawp dawn em ni?

Hmeichhe uire mak chungchangah Pu KL Liana chuan Vanglaini 17.3.2015-ah "Hnam Dan" leh Gazette hman kawp theih a nih leh nih loh a rawn (zawh) tarlan tawh kha.

Central Service-ah kum 32 ka thawh tawha ka tawn hriat chu:-

(a) Statutory Order (Hnam Dante ang hi) Legislation and Executive Order-in a thai bo thei lo tih a ni. Example - Central Service Rule-ah chuan Govt. Servant reng rengin nupui pahnih neih a phal lo. Mahse Muslim leh Buddhist Danah chuan phal a ni a, nupui pahnih nei staff tam tak ka thawhpui.

(b) Mimal zalenna constitution-in a pek a kalh.

Tichuan, fa lak dan pahnih a awm thei ta a:- (a) Hnam dang leh Mizo inkar leh (b) Mizo leh Mizo inkar atan.

Sawrkar hnathawk mek leh Pensioner-te chuan fa kan lak hi kan tar huna min enkawltu mai ni loin kan pension rochungtu tur an ni dawn a, Mizo Dan ang loa fa lak chu a ngamawm lo a ni. Kan sawrkar hian a rang thei ang berin kan thu han tarlan hi rawn tichiang se a duhawm mang e.