Chhiah tihpun hi ka thlâwp

Ka thuziak lo chhiar ve mial ṭhin in awm a nih chuan, sum leh pai dinhmun ka ziahnaah chuan chhiah lak belhna kawng zawn ka thlawpzia in hmu hlawmin ka ring. Ka lehkhabu ropui lo tak buatsaihah pawh ka ziak uar ve hle. A tuartute zingah pawh ka tel ve ngei dawn tih pawh ka hria.

Mizoram Commercial Vehicle Union nawrna avanga sorkarin tuialhthei mana chhiah an lak an tihniam lote hi ka va han lawm tak em. A chhiah hrim hrim piah lamah kan aiawha rorel tura an thlante'n uluk taka thutlukna an siam tawh, tute emaw nawrna avanga an sut leh ṭhin hi a tlawmthlak ka tiin, confidence a neih lohthlak ka ti takzet.

Kan ram sum dinhmun ka thlirin, chhiah kan lak belh a nih loh chuan kan ram hian hma a sawn tak tak ngai dawn lo a, state changkang zawkte ka um phak ngai dawn loin ka hmu. Hma lo sawn ve bek bek pawh ni ila, central sum ringawta hmasawn chuan huaisen a har ṭhin.

Kan budget chanve aia tam daih Central Sorkara han innghah tawp mai hi chu kum 30 chuang state ni tawh tan chuan a zahte pawh a zahthlak. Chuvangin, sorkarin sum hmuhna a zawn hi a ngai a, chhiah bakah pawh kawng dang dap se ka ti.

Buhfaiah sorkarin mi rethei leh hausa ber thlenga inangkhat veka subsidy-a min pete hi kan ram dinhmun thlirin fuh lo ka tih thu ka lo ziak ve tawh ṭhin. MNF Sorkar liamtaa kan Chief Minister-in press conference a neih hmasak ber khan buhfai man chungchanga ka ngaihdan ka sawi chhuak a, min chhan dan aṭangin ṭha a ti viauin ka hria a, mahse ṭha a ti tawk lo a ni ang, an ti hlawhtling ta lo.

Supply Minister tharin huaisen taka buhfai man a rawn tidanglam hi thinlung takin ka lawm. Buhfai man mai ni lo, tui mante pawh hi ennawn se ka ti, thla khata nuai chuang fe lalut leh Rs. 10,000 pawh lalut mang lote, sorkarin angkhata min subsidised hi chu fuh ka ti ve thei lo, kan ram dinhmun thlirin.

Tuialhtheia chhiah huaisen taka an lak belhte hi ṭha ka va ti tak. Mahse, chhiah lak belh a nih hma aia kan kawngin ṭhat lam a pan lo emaw, social infrastructure-in hma a sawn phah lo a nih erawh chuan,s orkar hi a dem nasa bertu zingah ka telin ka ring. Kan ramin hma a sawn chuan mipuiin thawh ve tur kan neih a ngaia hre tlat ka ni pek. Keini aia chhiah pek tlemna state hi an vang viauin ka ring, sorkar hnathawkin income tax an chawi ve lo lehnghal.

Mi thiam zawkte'n an sawi ṭhin chu ram changkang apiangah chhiah pek a nasa a, mipuite pawhin sorkar lakah an thikthu a tichhe ngam ṭhin tih hi a ni. A dik ka ring. Chhiah kan pek hi ram hmasawnna atana hman a nih phawt chuan mipui hi kan phunin ka ring lo.

Tuna tuialhtheia cess (chhiah) an lak hnu hian kan kawngte ṭha sawtin, kan damdawi-in, zirna-in etc. hi changtlung phah sawt se, mipui hian chhiah pek hi kan hreh ka ring lo a, a aia tam pawh kan inhuam ka ring. Sorkarin eng ang chiahin nge tuialhthei aṭanga chhiah kan pek hi a hman tih kan thlir ang chu.

Chhiah lakna tur dang hi kan sorkar hian an ngaihtuah a la ṭulin ka hria, kan ram dinhmun ngaihtuahin. Zute hi han zuar ngam se ka va ti em, kan ram dinhmun ngaihtuahin a ṭul tlat. Zu khap avangin lei tur awm lo se chu zu khap hi ka support ang, whiskey, rum leh local a duh tan lei tur a awm reng tho.

Zu khap avangin kan zu a chhia (ka hmuh dan), Assam leh Meghalaya lamah chhiah kan chhung lut ṭeuh ṭeuh. Awmzia a awm lo. A ngaihna hre deuh leh sum nei deuhin a senchi an in a, a nei lo deuh leh a ngaihna hre lo deuhte'n local an in a ni ber mai. Kan kohhrante pawh hian han ngaihtuah chiang se ka va ti tak em.

Tuna kan Transport Minister hi ka kawm ṭumin toll tax-te pawh la ve turin ka'n rawt ngawt a, kan ram dinhmun thlirin ṭul ka ti tlat. Sorkar hian sum hmuhna han ngaihtuah zel se, chu'ng sumte chu an inhaivurna atan ni lo, kan ram tan an hman phawt chuan mipui hian chhiah pek kan hreh lo telh telh ngei ang. Tin, chhiah pek hi awlsam deuh deuh bawk se.

Tun ṭuma sorkarin huaisen taka buhfai man a tisang leh tuialhtheia chhiah a la hi thinlung takin ka lawm. A zatve pawh hre lo mah ila, kan ram sum leh pai dinhmun hi tlema zawng ka hriat ve avangin sorkarin sum lakluhna a zawn hi a ṭul tak zet zet a ni.

Chuti a nih loh chuan, kan state-in sum kan hmuhna hnar lian ber dawttu - Post Devolution Revenue Deficit Grant aṭanga kan sum hmuh a tlem telh telh bawk si, central sorkar hian tihtawp hun an nei ngeiin a la rinawm zui, kan state hmabak a eng dawn lo. Chawmhlawm state tan a huaisen tak tak theih loh.

- Malsawmdawngzela Hrahsel