Zah nachang hre ve rawh se

Ṭum khat chu Zarkawt aṭanga Durtlang North thleng kal turin two wheeler taxi ka hmang a, hman man Rs 250 min ṭhing a, a to in tih ve tho ka ring. Zarkawt leh Durtlang North hi km. 5 vel a hnih ka ring a, km. 5 ni ta se, tuna rate pangngai ang chuan Rs 110 chawina tur a ni. Sorkarin rate a bithliah aia a let thawk aia tam min chawitir tihna a nih chu.

Ṭum khat dang leh chu Sikulpuikawn aṭanga Dawrpui Multipurpose Hall thleng taxi (four wheeler) ka hmang leh bawk a, Rs 150 ka chawi; tam ka ti hle mai a, nangni pawhin tam in tih ka ring. Zingah hian ka walk ve zauh zauh a, ka phone-ah hian kal thui zawng tehna apps ka hman ṭhin avangin ka kalna ṭhin thui zawng ka hre ṭhin. Rs 150 ka chawina taxi ka hmanna chin hi km. 2 vel a nih hmel a, chuti a nih chuan Rs 80-90 inkar chawi tur awm tak ka ni a, mahse, rate pangngai let dawn lai ka chawi tihna a nih chu. Taxi rate dik tak erawh ka hre mai lo.

Aizawl khawpuia sumdawnna lirthei hman man tozia hi mipui mak tih a tling. To hle mah se, a hmang ṭhinte chuan an hmang lo thei si lo. Rate an tihsanzia tichiang turin ka tawn ngei, taxi chi hnih ka hman chungchang ka ziak a ni mai a; taxi ni lo, commercial vehicle dangte hman man pawh a sang em em vek mai.

Heng commercial vehicle-te hi an chiauhiar em em. Petrol/diesel man tlemte pawhin san belh hlek se, fare an tisang ve nghal thuai thuai a, rate tisang turin sawrkar an nawr nghal chung zel bawk a. Chutih laiin, oil man a tlakhniam lehin rate tihniam an tum ve leh tawh chuang miah lo! An zaktheilo tak zet a, mipui tawrhna thlentu leh mahni hmasialna dik tak a ni.

Commercial vehicle neitute'n tun hnaia sawrkarin oil-a chhiah lak a tihsan hret avanga oil man pung ve hret kaihhnawihah mipui hma ngai ni awm fahrana lem ang an han der kual vel hi chu an ngeiawm thlawt a ni. Mipui hma an ngaih lohzia chu hman aṭanga tun thlengin an chet danin a tichiang.

Sumdawnna lirthei neitute leh khalhtute hi zah nachang hre ve rawh se. An chêt ṭhin dan mipuiin kan hai lo. Chutih laia sawrkar nawrh khum an han relte hi chu a rapthlak zawk. Sawrkar avanga commercial vehicle nei thei an ni tih te, sawrkarin permit a pek avanga eizawnna ṭha nei thei leh hauhsakpui thei an ni tihte hi inhre ve rawh se. Sawrkar hi an nawrh khum mai mai tur a ni lo a, sawrkarin rate a siam hi thuawih takin an zawm tur a ni.

- Zoramchhana