Saptawng thiam loh a pawi em?

Hmanah Mizo ziaktu lar deuh pakhat ziak ka chhiar tawh a. Korean ho khi Saptawng thiam lo ber hnam an ni hial awm e. Saptawng thiam tuma nileng lenga librarya Korean- English Dictionary nena tawm te pawh ka tawng ve nual; ‘Its fery dif-fi-khult’ te an tia! An leili nen English kalhmang hi a inrem lo emaw tih mai tur a ni, tiin a sawi.

Mizo lehkha zir sang leh thiam fu zingah mi hmaa saptawnga tawng a tul huna bah nuai, eng ber nge sawi an tum tih pawh hriat mang loh a zuzi ta hi hmuh tur an awm nuk mai! Saptawng hi zir ila mahni tawng ni lo na na na chu thiam nal viau a har a nih pawhin kan sawi tum leh kan duh hi chu inring tawk taka sawi thei tura in buatsaih nachang hriat a tha hle mai.

Tun hnaiah kan Minister pakhat bial fang chu Assam Rifles duty ten an lo tiding a, khami boruak kal zelah khan kan Minister in saptawngin thil awm dan a rawn sawi a. Duh khawp loh a na viau mai. Saptawng leh vai tawng thiam nal lo kan Minister leh MLA te zingah an awm fo tawh a, an la awm fo ang. Heng vanga hian in hmuh hniam chhan tur chu a awm hauh lo. Mizo kan ni a, kan official language pawh Mizo tawng a ni. Hmanhmawh thilah Saptawnga kan sawi thei lo a nih pawhin a pawina a awm lo, Mizo tawnga biak mai tur a ni.

AR leh kan Minister team te inkara inhmuh thiam lohna awm kha ka sawi tum ber a ni lo, mahse Minister escort tu police te leh PSO te, a hnung zuitu official te kha khatiang buaina hmachhawn turin an tha tawk lo tih a lang reng mai.

Ministry hmasa lamah English press mite hmaa che buai hmuh tur an awm fo tawh a, khatiang hunah te chuan ziak sa chhiar mai te hi a finthlak thin. Inhnialnaah phei chuan tawng thiam zawkin advantage an nei lian thin a, kan Minister backup an tul hunah anmahni zuituten mawhphurhna sang tak an nei e. Kan Minister dangte pawh he thil thleng atang hian lo in zir lawk hlawm teh u.

- Ramhmangaiha